Levítico 21

1Señor Diosmi Moisesta nirqan: –Aaronpa churin sacerdotekunata nimuy, Señor Diosmi nin: Aman llaqtaykichispi ayata tupaykuspa qhellichakunkichischu. 2Ichaqa qaylla familiaykichis, mamaykichis, taytaykichis, churiykichis, ususiykichis, wawqeykichis, 3wasiykichispi tiyaq soltera panaykichispas wañullaqtinmi qhellichakuwaqchis. 4Ichaqa manan qhellichakuwaqchischu wak familiaykichispa ayanta llamispaqa. 5Wañuqniyoq kashaspaykichisqa aman umaykichista rutukunkichischu, aman sunkhaykichistapas rutukunkichischu, amallataq cuerpoykichistapas kuchukunkichischu. 6Ñoqa Diosniykichispaqmi ch'uya kankichis, amataq sutiyta pisichankichischu, qankunaqa mikhuna ofrendakunatan ñoqaman haywawankichis, chayrayku ch'uya kaychis. 7Aman casarakunkichischu rabona warmiwanpas, violasqawanpas, qosanpa wikch'usqan warmiwanpas, sacerdoteqa ñoqapaq ch'uya kasqaykichisrayku. 8Llaqtaqa Diospaq t'aqasqatan qhawasunkichis, qankunaqa ñoqa Diosniykichispa t'antaytan haywankichis. Llaqtaqa ch'uyatan qhawasunkichis, ch'uyanchaqniykichis Señor Diosqa ch'uya kasqayrayku. 9Sacerdoteq ususinchus qhelli huchapi puriyta qallarinqa chayqa, taytantan p'enqayman churan. Ninawan kanasqan kanqa. 10Wawqenkuna ukhupi uma sacerdoteqa hawina aceitewan uman hawiykusqan karqan, ch'uya p'achakunata p'achakunanpaqpas churasqan karqan. Chaymi uma sacerdoteqa chukchanta ama paskakunqachu, p'achankunatapas ama llik'ikunqachu wañuqniyoq kaspa. 11Aman pi runa wañusqamanpas qayllaykunqachu, aman taytanraykupas mamanraykupas qhellichakunqachu. 12Amallataq yupaychana cheqasmantapas lloqsinqachu, chaytapas qhellichanqachu, hawina aceiteywan t'aqasqa kasqanrayku. Ñoqaqa Señor Diosmi kani. 13Uma sacerdoteqa doncella warmiwanmi casarakunqa. 14Aman viudawanpas, wikch'usqawanpas, violasqawanpas, rabonawanpas casarakunqachu, aswanpas llaqtan doncella warmiwanmi casarakunqa. 15Ahinapin mirayninta llaqtanpi mana qhellichanqachu. Ñoqa Señor Diosmi paytaqa ch'uyanchani, nispa. 16Señor Diosmi Moisesta nirqan: 17–Aaronta nimuy, Señor Diosmi nin: Qhepa mirayniykipi mayqen mirayniykipas imanpas mana qhali kaqtinqa, aman ñoqa Diosninpa t'anta ofrendayta haywaq asuykamuwanqachu. 18Mayqen qharipas imanpas mana qhali kaqtinqa aman asuykunqachu: ñawsa qharipas, wist'upas, iman wit'usqapas, millay rikch'ayniyoqpas, 19p'akisqa chakiyoqpas, p'akisqa makiyoqpas, 20qhopupas, eqopas, qoyrusqa ñawiyoqpas, qarachiyoqpas, seqsi onqoyniyoqpas, kapasqapas. 21Aaronpa mirayninmanta mayqen qharipas imanpas mana qhali kaqtinqa, aman ñoqa Señor Diosman ruphachina ofrendata haywawananpaq qayllaykamuwanqachu. Manan payqa qhalichu, manan ñoqa Diosninpa t'anta ofrendayta haywaq asuykamuwanqachu. 22Mikhunataqa ch'uyay-ch'uyamanta kaqtapas ch'uyamanta kaqtapas mikhunmanmi, 23ichaqa manan cortina ukhumanqa qayllaykunqachu, manallataq altarmanpas, paypa imanpas mana allin kasqanrayku. Chay hinapin ñoqa yupaychana cheqasta mana qhellichanqachu. Ñoqaqa Señor Diosmi kani, paykunata ch'uyanchaqmi kani, nispa. 24Moisestaq chayta willarqan Aaronman, churinkunaman, Israel llapa runakunamanwan.

will be added

X\