Levítico 15

1Señor Diosmi Moisestawan Aarontawan nirqan: 2–Israel runakunata nimuychis: Mayqen qharipas q'eya hisp'ay onqoywan hap'ichikuspaqa qhellin kanqa. 3Q'eya hisp'ayninchus purimunqa otaq watakamunqa chayqa, payqa qhellin kanqa. Chay q'eya hisp'aymi kay hinata qhellichan: 4Q'eya hisp'aqpa puñusqan puñunaqa qhellin kanqa, tiyasqan ima tiyanapas qhellin kanqa. 5Pipas puñunanta tupaykuqqa p'achankunatan t'aqsakunqa, pay kikinpas unuwanmi bañakunqa, ch'isinkamataq qhelli kanqa. 6Pipas q'eya hisp'aqpa tiyasqan patapi tiyaykuqqa p'achankunatan t'aqsakunqa, pay kikinpas unuwanmi bañakunqa, ch'isinkamataq qhelli kanqa. 7Hinallataqmi q'eya hisp'aqta tupaykuqpas p'achankunata t'aqsakunqa, pay kikinpas unuwanmi bañakunqa, ch'isinkamataq qhelli kanqa. 8Q'eya hisp'aqtaq ch'uya runa pataman thoqaykuqtinqa, thoqaykusqa runan p'achankunata t'aqsakunqa, unuwanmi bañakunqa, ch'isinkamataq qhelli kanqa. 9Q'eya hisp'aqpa sillakusqan monturapas qhellin kanqa. 10Pipas tiyasqanpi kaqta imatapas tupaykuqqa, ch'isinkaman qhelli kanqa. Chayta apaqpas p'achankunatan t'aqsakunqa, unuwanmi bañakunqa, ch'isinkamataq qhelli kanqa. 11Q'eya hisp'aq runachus makinta mana maqchikuspa pitapas tupaykun chayqa, chay tupaykusqan runaqa p'achankunatan t'aqsakunqa, pay kikinpas unuwanmi bañakunqa, ch'isinkamataq qhelli kanqa. 12Q'eya hisp'aqpa tupaykusqan t'uru mankaqa p'akisqan kanqa, k'ullumanta apaykachanakunataq unuwan mayllisqa kanqa. 13Q'eya hisp'aq qhaliyapuqtinqa, qanchis p'unchaymi yupakunqa ch'uyanchakunanpaq. Hinaspataq p'achankunata t'aqsakunqa, pukyumanta horqomusqa unuwan cuerpontapas bañakunqa, ch'uyataq kapunqa. 14Pusaqkaq p'unchaypitaq iskay kullkuta otaq iskay urpi malqota aparikuspa Señor Diospa ñawpaqenman qayllaykunqa Dioswan Tupana Karpa punkuman, hinaspan chaykunata sacerdoteman qonqa. 15Sacerdoten hukninta haywanqa hucha pampachay ofrendapaq, huknintataq ruphachina ofrendapaq. Chay hinatan sacerdoteqa Señor Diospa ñawpaqenpi q'eya hisp'asqanmanta ch'uyanchanqa. 16Muhun phawachikuq qhariqa unuwanmi cuerpontinta bañakunqa, ch'isinkamataq qhelli kanqa. 17Ima p'achatapas ima qaratapas muhun kharkachanqa chayqa, unuwanmi t'aqsasqa kanqa, ch'isinkamataq qhelli kanqa. 18Huk qharitaq huk warmiwan puñunqa, hinataq muhun phawaykunqa chayqa, iskayninkun unuwan bañakunqaku, ch'isinkamataq qhelli kanqaku. 19Warmiq killanchus purinqa chayqa, qanchis p'unchaymi qhelli kanqa. Pipas payta tupaykuqqa ch'isinkaman qhelli kanqa. 20Killayoq kashaspa ima patamanpas siriykusqanqa qhellin kanqa, hinallataq ima patamanpas tiyaykusqanqa qhelli kanqa. 21Pipas puñunanta tupaykuqqa p'achankunatan t'aqsakunqa, unuwanmi bañakunqa, ch'isinkamataq qhelli kanqa. 22Pipas tupaykunqa paypa tiyaykusqan ima tiyanatapas chayqa, p'achankunatan t'aqsakunqa, unuwanmi bañakunqa, ch'isinkamataq qhelli kanqa. 23Ahinaqa, pipas puñunantapas tiyaykusqan ima tiyanatapas tupaykuqqa ch'isinkaman qhelli kanqa. 24Pipas killayoq warmiwan puñunqa, hinataq warmiq yawarninwan qhellichakunqa chayqa, qanchis p'unchaymi qhelli kanqa. Chay p'unchaykunapi chay qhariq puñusqan mayqen puñunapas qhellin kanqa. 25Warmiq killanchus purimunanmantapas askha p'unchaytawanraq purimunqa, otaq killan mana purinanpi purinqa chayqa, killan purimunan p'unchaykunapi hinan yawarnin purishasqan p'unchaykunapi qhelli kanqa. 26Yawarnin purishasqan p'unchaykunapi puñusqan puñunapas tiyaykusqan ima tiyanapas qhellin kanqa, killan purimushaqtin puñuna hina. 27Pipas chaykunata tupaykuqqa qhellin kanqa, p'achankunatapas t'aqsakunqan, pay kikinpas unuwanmi bañakunqa, ch'isinkamataqmi qhelli kanqa. 28Yawar puriynin thanipuqtintaq qanchis p'unchayta yupanqa, chaymantataq ch'uya kapunqa. 29Pusaqkaq p'unchaypitaq payqa hap'imunqa iskay kullkuta mana chayqa iskay malqo urpitapas, hinaspan chaykunata sacerdoteman apamunqa Dioswan Tupana Karpa punkuman. 30Sacerdotetaq hukninta hucha pampachaypaq haywanqa, huknintataq ruphachina ofrendapaq, hinaspan sacerdoteqa Señor Diospa ñawpaqenpi payta yawar puriyninmanta ch'uyanchanqa. 31Ahinatan Israel runakunataqa qhelli kayninkumanta t'aqankichis, mana chayqa paykuna ukhupi kaq karpayta qhelli kasqankuwan qhellichaspankun wañunkuman. 32Chay kamachikuykunan q'eya hisp'aq qharipaq, muhun phawaywan qhellichakuq qharipaqwan, 33killan puriq warmipaq, yawar hisp'aq qharipaq, yawarnin puriq warmipaq, killanwan qhellichakushaq warmiwan puñuq qharipaqpas, nispa.

will be added

X\