Lamentaciones 5

1Señor Diosníy, imachus sucedewasqankuta yuyariy, qhawariwayku imaynachus p'enqachisqa kasqaykuta. 2Llapan hallp'aykupas wak llaqtayoqkunaq makinpiñan, llapan wasiykupas karu llaqtayoqkunaq makinpiñan. 3Wakchan kapuyku mana taytayoq, mamaykupas viuda hinan qheparqapun. 4Ukyanaykupaq unutapas rantikapushaykun, llant'amantapas pagapushaykun. 5Uywa hina soq'aspa qatisqan kashayku, sayk'urqapuykun, manañan samarichiwankuñachu. 6Mikhunayoq kanaykupaqmi makiykuta haywarikurqayku Egipto runakunaman, Asiria runakunamanwan. 7Tayta-mamaykun huchallikurqanku, paykunaqa wañupunkuñan, ñoqaykun rantinkupi muchushayku. 8Kunanqa kamachikunaq kamachisqanmi kapuyku, manataq pipas makinkumanta horqoqniyku kanchu. 9Wañuchiqkunan campopi kashanku, chaymi sinchi sasawan mikhunaykutapas tariyku. 10Aycha qaraykupas horno hinan rawrarin, yarqaymanta ruphapakuy onqoy hap'iwasqankurayku. 11Sión llaqtapin warmikuna violasqa rikukurqanku, Judá llaqtakunapin sipaskuna violasqa kapurqanku. 12Qollana runakunan makinkumanta warkusqa karqanku, kurak runakunapas mana respetasqan karqanku. 13Waynakunatan maranpi kutaqpaq churarqanku, erqekunataqmi llant'a q'epiq ñit'isqan karqanku. 14Llaqta punkukunapiqa manan kurak runakuna kapunñachu, waynakunaq tocasqanpas manan uyarikunñachu, 15sonqoykupi kusikuypas manan kapunñachu, tusuyniykupas llakimanmi tukupun. 16Mentasqa-kayniykupas manan kapunñachu. ¡Ay, imaraqmi ñoqaykumanta! ¡Huchallikurqaykun! 17Chayraykun sonqoykupas chiriyaykapun, chayraykun ñawiykupas ayphayaykapun, 18Sión orqoq yanqa raqay-raqay kasqanmanta, chacal animalkunaq chayninta kuti-tikrasqanmanta. 19Qanmi ichaqa, Señor Diosníy, wiñaypaq kamachikunki, miray-miraykunapin kamachikunki. 20¿Imanaqtintaq pasaqta qonqarparipuwankiku? ¿Imanaqtintaq kay hina unayri wikch'urparipuwankiku? 21Señor Diosníy, qanman kutirichiwayku, hinan kutirimpusaqku, imaynan ñawpaq kawsayniyku karqan chay hina kunanpas kachun. 22Icha, ¿pasaqtachu mana munapuwankiku? Icha, ¿sinchi phiñasqapunichu ñoqaykupaq kapunki?

will be added

X\