Lamentaciones 4

1¡Imaraqmi qoripas yanayaykapurqan! ¡Imaraqmi ch'uya choqepas manaña k'anchapunchu! Hinantin k'uchukunapi ch'eqeykachisqan yupaychana wasiq ruminkunapas kashan. 2Sionpi munasqa waynakunan qori hina qhawasqa karqanku, kunantaq manka ruwaqpa ruwasqan t'uru manka hina qhawarparisqa kapunku. 3Chacal animalkunapas uñantaqa ñuñunmi, llaqtaytaqmi ichaqa ch'inneqpi suri hina sinchi millay wawankunapaq. 4Ñuñuq wawakunan unu ch'akiymanta kashanku, siminkumanmi qallunkupas k'askarqapun. Wawakunan t'antata mañakun, manataqmi pipas kanchu qoykuqnin. 5Sumaq hatun mikhuylla mikhuqkunan kunanqa callekunapi yarqaymanta puripushanku. Allin sumaq p'achakunayoq wiñaqkunan kunanqa q'opa patapi maskhapakapushanku. 6Llaqtayqa huchanmanta aswan ñak'arichisqaraqmi karqan Sodoma llaqtaq huchanmanta muchusqanmantaqa, chay llaqtaqa kaq ratopacha thunisqan karqan, mana piqpa phawaykusqallan. 7Akllasqa runankunaqa rit'i hina yuraqmi karqan, lechemantapas aswan yuraqmi karqan. Cuerponkupas coral umiñamantaqa aswan pukaraqmi karqan, rikch'ayninkupas anqas umiña hina munaymi karqan. 8Kunantaq ichaqa qhechinchamamantapas aswan yanaraq kapushan, callenkunapipas mana reqsiy atiyraqmi kashan. Aychankupas tullunkumanñan k'askapusqa, k'aspi hina ch'akillañan kapusqakupas. 9Aswan kusisamiyoqmi maqanakuypi wañuyqa karqan yarqaypi wañuymantaqa, paykunaqa pisi-pisimantan wañunku chakraq rurusqan mana kapuqtin. 10Llaqtay thunisqa kaqtinmi llakikuy p'unchaykunapi, sumaq sonqo warmikuna wawankuta wayk'ukapurqanku chayta mikhunankupaq. 11Señor Diosmi phiñakuyninta kachaykamurqan, k'arak phiñakuynintan senq'apata hina kacharparirqan. Siontan ninawan kanaykurqan, teqsinkamaraqmi thunirqan. 12Kay pacha reykunaqa lliw suyukunapi tiyaqkunapas manapunin hayk'aqpas yuyarqankuchu, awqakunapas llat'anaqkunapas Jerusalén punkunta haykunankutaqa. 13Ichaqa haykurqankun, profetakunaq huchanmanta, sacerdotekunaq millay mana chanin ruwasqankumantawan, paykunan llaqta ukhupi chanin runakunata wañuchirqanku. 14Kunantaq paykunaqa callekunapi ñawsa hina thampi-thampita purishanku. Yawarkamallañan purishanku, manañan pipas paykuna llamiykuytaqa munankuñachu. 15Paykunataqa runapas waqyamunmi: ¡Lloqsiychis qhelli runakuna! ¡Lloqsiychis! ¡Ama llamiykuwaychispaschu! nispa. May llaqtapi purimusqankupipas nimurqanku: Manan kaypiqa tiyayta atiwaqchischu, nispa. 16Señor Diosqa qhawarispallaraqmi ch'eqerparichirqan, chaymantataqmi manaña qhawarinpasñachu, sacerdotekunatapas manañan respetarqankuchu, kurak taytakunatapas manañan khuyapayarqankuchu. 17Ñawipas ayphallañan qhawapakurqayku, yanqapaqmi yanapayta suyakurqayku. Torre patamantan qhawasharqayku mana qespichiy atiq suyuq chayamunanta. 18Purisqaykupas qhawasqallañan karqan, manan callekunaman lloqsiyta atirqaykuchu. Wañuyqa patallaykupiñan karqan, chay horaqa chayamurqanñan, chayamurqanpachan tukukapunaykuqa. 19Alton phalaq ankamantapas aswan phawaqmi ñoqaykuq qatiykachaqniykuqa, orqon-orqontan qatiykachawarqanku, ch'inneqpi pakakuspan suyawarqanku. 20Señor Diospa hawisqan reytapas presotan hap'irqanku, payllan kawsachiqniyku karqan, paymantan nirqayku: Payqa wak suyukuna ukhupi hark'akuwasunmi, nispa. 21Yaw, Edom suyupi tiyaqkuna, asikuychis, yaw, Uz suyupi tiyaqkuna, kusikuychis, qankunamanpas chayamullasunkichistaqmi haya vaso ukyayqa, machaspa q'ala chichi kanaykichispaq. 22Sión llaqtalláy, muchunaykiqa tukukapunmi, Señor Diosqa manañan kamachi-kayman apachisunkiñachu. Qanmi ichaqa, Edom suyu, huchaykimanta muchuchisqapuni kanki, Señor Diosqa huchaykikunatapas sut'imanpunin horqorparinqa, nispa.

will be added

X\