Lamentaciones 3

1Ñoqan kani Señor Diospa phiñakuspa hasut'isqan runa. 2Ñawpaqenmanta qarqowaspanmi k'anchaypi purinaymantaqa tutayaq ñanpi purichiwarqan. 3Kuti-kutirispan sapa rato hina ñoqaman hasut'in chayawarqan. 4Aychaytapas qaraytapas qawiyachipurqanmi, tulluykunatapas p'akirqarirqanmi. 5Muyuriqniymanta ñit'ichiwaspanmi sinchi haya muchuywan rawkharqowarqan. 6Tutayaq ukhullapiñan tiyaykachiwarqan ñawpa p'unchaypi wañuqkunata hina. 7Mana punkuyoq kanchamanmi wisq'aykuwarqan, llasa bronce watanakunawanmi wataykuwarqan. 8Yanapayta mañakuspaña qaparini chaypas, manan uyariwanchu valepakusqaytaqa. 9Qaqamanta perqawanmi purinayta wisq'awarqan, ñanniytapas q'ewimanmi tukuchirqan. 10Señor Diosmi hap'irqoq ukumari hina qhawapayawarqan, pakakuq león hina suyawarqan. 11Ñanniymanta pantarqachiwaspan llik'irqariwarqan, qonqasqatan wikch'upuwarqan. 12P'eqtanta chutarispan qhawaykuwarqan, wach'inantan chayachiwayta munarqan. 13Señor Diospa kacharimusqan wach'ikunaqa ukhuykamaraqmi t'urpuykuwarqan. 14Llaqtaypa asipayananmanmi tukupuni, sapa rato hinan ñoqamanta takinku. 15Señor Diosmi hunt'aykachiwarqan haya kaywan, amichiwarqanmi ajenjowan. 16Khullu rumiwanmi kiruyta p'akirqan uspha patapin saruwarqan. 17¡Imachá thak-kaypas kakun! ¡Imaynataqchá kusisqa-kaypas kakun! 18Kallpaymi chiriyarqapun, Señor Diospi suyakuyniypas manan kapunñachu. 19Llakikuyniyta yanqa purisqaykunatawan yuyariy, chayqa haya kaywan ajenjowan hinaraqmi. 20Chaykunata yuyariqtiymi, aswantaraq kallpaypas chiriyaykapuwan. 21Ichaqa kashanraqmi ñoqapaq kayllapiña suyakuyniy: 22Señor Diospa munakuyninqa mana tukukuqmi, khuyakuyninqa manan pisiyanchu, 23chaykunaqa sapa paqarmi mosoqyan. ¡Señor Diosqa hunt'aqllapunin! 24Señor Diosmi ñoqapaqqa lliw imaymanay, chaymi paypi suyakushani, nispa. 25Señor Diosqa sumaqllapunin payman hap'ipakuqpaqqa, lliw payta maskhaqkunapaqqa. 26Señor Diospa qespichiyninta ch'inlla suyakuymi aswan allinqa. 27Runapaqqa wayna kasqanmantapacha kasukuq kayninmi may allinqa. 28Runaqa Señor Dios ñak'arichiqtinqa ch'inlla sapallan tiyachun. 29Huch'uyyaykukuspa pampata much'aykuchun, icha imaynapi kanmanraq suyakuy. 30Ch'aqlaqninwanqa hinalla ch'aqlachikuchun, k'amisqataqa hinalla chaskikuchun. 31Señor Diosqa manan wiñaypaqchu runakunataqa saqerparin. 32Muchuchinña chaypas khuyapayanpunin, munakuynin ancha hatun kasqanrayku. 33Payqa manan munanchu runakuna llakichiytaqa, manallataq munanchu runakuna nanachiytaqa. 34Señor Diosqa yachanmi suyupi preso kaqkunata sarunchasqankutaqa. 35Señor Diosqa rikunmi Ancha hatun Diospa qosqan chaninchayta q'ewiqtaqa. 36Señor Diosqa yachanmi hukman sayakuspa runaq mana chanin ruwasqantaqa. 37Señor Dios mana kamachikuqtinqa, ¿pitaq imatapas willakunman? 38Lliw allinkunapas mana allinkunapas hamun Ancha hatun Diospa unanchasqanmi. 39¿Imamantataq runaqa quejakunman huchanmanta muchuchisqa kashaspari? 40Cheqaqtapuni purisqanchista t'aqwirikusun, Señor Diosmantaq wakmanta kutirikapusun. 41Hanaq pacha Diosman sonqonchista kicharispa, makinchista haywarispa nisun: 42Ñoqaykun contraykipi k'ulluchakuspa huchallikurqayku, qantaq mana pampachawarqankikuchu. 43Sinchita phiñakuspaykin qatiykachawarqankiku, mana khuyapayaykuspan wañuchiwarqankiku. 44Phuyuwanmi p'istukurqanki mañakusqaykuta mana uyariwanaykikupaq. 45Suyukuna ukhupin q'opaman tukuchiwarqankiku. 46Llapa awqaykun contraykupi rimanku. 47Ñoqaykun manchachisqa kaspa t'oqoman urmaykurqayku, kunantaq thunisqaña kashayku pasaq raqay-raqay, nispa. 48Munasqa llaqtay thunikuqtinmi ñawiymanta waqayniypas mayu hinaraq phawan. 49Mana thaniykuspan waqasaq, manataqmi samaykusaqchu, 50hanaqmanta Señor Diospa qhawarimuwanankama. 51Sonqoypas nanawanñan llaqtaypa ususinkuna ñak'arisqanta rikuqtiy. 52Awqaykunapas mana ima huchaymantan phalaq animalta hina hap'iwarqanku. 53Kawsashaqtan t'oqoman winarqowarqanku, punkuntapas qaqawanmi wisq'arqowarqanku. 54Pasaqtan unupas p'ampaykapuwarqan, hinan yuyaykurqani: Wañusqa hinañan kashani, nispa. 55Señor Diosníy, ukhu t'oqomantapachan waqyakamurqayki: 56Uyariway yanapayniyki mañakamusqayta, nispa. Uyariwarqankin waqyakamusqayta. 57Waqyakamuqtiymi qayllaykamuwarqanki: Ama manchakuychu, niwarqanki. 58Qanmi, Señor Diosníy, hark'aykuwarqanki, qanmi, Señor Diosníy, qespichiwarqanki. 59Qanmi, Señor Diosníy, mana allin ruwawasqankuta rikurqanki, yanapaykuwaspa chaninchaykuway. 60Qanmi, Señor Diosníy, awqa sonqo kasqankuta rikurqanki, lliw yuyaykusqankuqa ñoqa contrakama kasqanta. 61Qanmi, Señor Diosníy, k'amiwasqankuta uyarirqanki, lliw yuyaykusqankuqa ñoqa contrakama kasqanta. 62Awqaykunaqa p'unchay ch'isiyaqmi contrallaytapuni chhuchupakunku. 63¡Qhawariy! Sayaspapas tiyaspapas ñoqamanta burlakuspan takinku. 64Señor Diosníy, paykunamanqa tupaqninkutapuni qoy, ruwasqankuman hinapuni qopuy. 65Sonqonkuta rumiyaykachiy, paykunataqa ñakaypuni. 66Señor Diosníy, phiñakuspayki qatiykachay, kay pachamantaqa chinkachiypuni.

will be added

X\