Lamentaciones 1

1¡Ay, imaraqmi Jerusalenqa sapan kapushan, haqay hina askha runakunayoq llaqta! ¡Ay, imaraqmi viuda warmi hina kapushan, lliw suyukunaq uman kashaqqa! Mit'anipin llank'apushan, lliw llaqtakunaq ñust'an kashaqqa. 2Tutan-tutanmi unuy-parata waqaykushan, uyapas p'aspay-p'aspallaña. Llapan munaqninkunamanta manan hukllapas kanchu sonqochaykuqnin. Llapan reqsinakuq-masinkunapas manan rikuqpas tukupunkuchu, llapallanmi awqanman tukupunku. 3Judá runakunan kamachi-kayman apasqa kanku, chaypin sinchita llank'aspa muchushanku. Hinantin suyukunapi tiyaspan manaña samaykuytapas tarinkuñachu. Sinchi sasachaypa ñit'iykusqan kashaqtinmi, qatiykachaqninkuna tariparqanku. 4Sionman rina ñankunapas llakiy-llakiymi kapushan, hatun fiestamanqa manan pipas rinñachu. Llaqta punkukunapas ch'usaqmi kapushan, sacerdotekunan: ¡Ikiraqmi! ¡Imaraqmi! nishanku, doncella sipaskunan llakiraykukushanku, Jerusalentaqmi simipas hayallaña kaykushan. 5Awqankunan Jerusalenta munaychakapushanku, kunanqa kusisqan tiyapushanku. Señor Diosmi paytaqa llakichin sinchi askhata huchallikusqanrayku. Wawankunan apasqa rikukapun awqankun kamachipaq apapun. 6Sionpa ususinpa k'acha-kayninmi chinkarqapun. Umalli runankunapas q'achuta mana tariq taruka hinan purishan, chakinta aysaspallañan chakuqninpa ñawpaqenta ayqeshan. 7Llaki-phutiypi awqankunaq apaykachasqan rikukuspanmi Jerusalenqa chayraq yuyarin ñawpa sumaq-kayninta. Awqanpa makinman urmaykuqtinmi, mana pillapas yanapaykuqnin karqanchu. Awqankunapas payta rikuspan thunikusqanmanta asipayarqanku. 8Sinchitapunin Jerusalenqa huchallikurqan chaymi qhellillaña kapushan. Allin rikuqninkunan kunanqa pisichapunku, q'alalla kaynintan rikurqapunku. Chaymantan payqa waqashan, p'enqakuymantan manaña rikhuriytapas munanchu. 9P'achanpas lliwpa rikunanmi qhellichasqa karqan, ichaqa manan yuyarqanchu chhaynaman chayananta. ¡Imaynapipunin urmaykurqanqa! ¡Manan pipas sonqochaqnin karqanchu! Paytaq waqyakun: ¡Qhawariway, Señor Diosníy, muchuchisqa kasqayta, awqaymi atiparqapuwan! nispa. 10Awqanmi munaychakapurqan Jerusalenpa llapan qhapaq kayninkunata. Jerusalenmi rikurqan yupaychana wasiman wak suyu runakunaq haykusqanta, Señor Diospa llaqtanwan huñukunanta hark'asqan runakunaq haykusqanta. 11Waqaykukuspan llaqtantin runakuna mikhunata maskhashanku, qhapaq kayninkutan mikhunawan chhalarqapunku chaywan kawsanankupaq. Jerusalentaq waqyakun: ¡Señor Diosníy, qhawariway! ¡Khuyapayaway pisichasqa kasqayta! nispa. 12Qankuna kay ñanninta puriqkuna, ¿manachu imapas qokusunkichis kay nanayniymanta? Qhawariychis hinantinta, ¿pillapas kanchu ñoqa hina ñak'ariq? ¡Señor Diosmi kay llakiwan kachaykuwarqan phiñakuynin rawrariqtin! 13Hanaqmantapacha Señor Diospa kachaykamusqan ninan tulluykamaraq haykun. Urmanaypaqmi llikata churarqan, qhepamanraq kutichiwarqan. Sapaytan wikch'urpariwarqan, nanayllapipunin p'unchay-p'unchay kashani. 14Señor Diosmi huchayta yuparqan, pay kikinmi huchayta wataykurqan, kunkaymantaq warkuykurqan, chay hinapin kallpay chiriyarqan. Señor Diosmi hap'iykachiwarqan mana atipay-atiy runakunaq makinman. 15Señor Diosmi llapan soldadoykunata pisicharparirqan, phawaykuspa wañuchiwanankupaqmi soldadokunata apamurqan allichachaq waynaykunata ch'usaqyachinanpaq. Señor Diosmi Judá llaqtata t'usturqapurqan vino horqonankupaq uvas saruq hinaraq. 16Chayraykun pasaqtapuni waqashani, ñawiypas weqe hunt'aykusqallañan kashan. Manan piniypas kanñachu sonqochaqniy, manan piniypas kanñachu kallpachaqniy. Wawaykunan wikch'usqa raqay-raqaypi rikukun, awqay ñoqata atipawasqanrayku. 17Sión llaqtan valepakuspa makinta haywarikun, manataq pillapas sonqochaqnin kanchu. Señor Diosmi unancharqan Jacobpa llaqtamasinkuna awqan kapunanta, llaqta-masinkunapaqmi Jerusalenqa mana serviq qhelli kapurqan. 18Señor Diosqa chaninpunin, ñoqataq kamachikuyninta p'akirqani. Llapa llaqtakuna uyariwaychis, nanayniyta qhawariwaychis. Wayna-sipasniykunapas lliwmi kamachipaq apasqa kapurqan. 19Munaqniykunaq yanapawanantan waqyakurqani, paykunataq ichaqa yanqalla q'otuykuwarqanku. Sacerdoteykunan kurak runaykunapiwan kikin llaqtapi wañupurqanku, kawsanankupaq mikhunata maskhashaspanku. 20¡Señor Diosníy, llakikuyniyta qhawariy! Sonqoyraqmi phatatatashawan, nanaymi sonqoyta k'iriykuwan, sinchi mana kasukuq kasqaymanta. Hawapin espadaqa runata wañurachishan, kay ukhupipas wañuyllataq kashan. 21Runakunan khuyay anchisqayta uyariwan, manataqmi sonqochaqniyqa pillapas kanchu. Lliwmi awqaykunaqa khuyay muchusqayta yacharqan, kusikushankutaqmi qanpa ruwasqaykimanta. ¡Unanchasqayki p'unchayta chayachimullayña, paykunapaqpas ñoqapaq hina kachun! 22Lliw mana allin ruwasqankumanta paykunata huchachay, ñoqata ruwawarqanki hinata huchankumanta taripay. Pasaqtapunin ñoqaqa waqashani, sonqoypipas k'irisqallañan kashani.

will be added

X\