1 Señor Diosmi Canaán suyupi wakin llaqtakunata hinallata saqerqan awqa-tinkuy mana rikuq qhepa wiñay Israel runakunata probananpaq. 2 Chay llaqtakunawanmi Señor Diosqa awqa-tinkuy mana rikuq qhepa wiñay runakunaman imaynachus awqa-tinkuy kasqanta yachachinan karqan. 3 Chaypaqmi qheparqan phisqantin Filistea reykuna, llapan Canaán runakuna, Sidón runakuna, Baal-hermón orqomanta Hamat Q'asakama Líbano orqo-orqopi tiyaq Hev runakunapiwan. 4 Chay llaqtakunawanmi Señor Diosqa Israel runakunata probayta munarqan Moiseswan ñawpa taytankuman qosqan kamachikuyman hina hunt'anqakuchus icha manachus chayta yachananpaq. 5 Israel runakunataqmi ichaqa Canaán runakunawan, Het runakunawan, Amor runakunawan, Ferez runakunawan, Hev runakunawan, Jebus runakunapiwan tiyarqanku. 6 Israel runakunaqa chay runakunawan mich'uykukuspan wawankuwanpas casarakurqanku, diosninkutapas yupaychaysikurqanku, kaqllataq chay llaqta runakunapas casarakurqanku Israel runakunaq wawankunawan. 7 Chaymantapas Israel runakunaqa manapunin Señor Diospa munayninman hinachu ruwarqanku, Diosninku Señor Diosta qonqaspankun Baal diosta, Asera diosata yupaycharqanku. 8 Chaymantan Señor Diospa phiñakuyninqa paykunapaq rawrarirqan, chaymi Mesopotamia suyu rey Cusan-risataimman hap'iykachirqan, hinan Israel runakunaqa chay reypa kamachin kapurqanku pusaq watantin. 9 Chaymantataq Israel runakunaqa Señor Diosta waqyakurqanku, paytaq qespichiq runata churamurqan, hinan chay runaqa qespichirqan. Paypa sutinmi karqan Otoniel, Calebpa sullk'an Cen runaq churin. 10 Otonielmantaq Señor Diospa espiritunqa hunt'aykurqan, hinan payqa Israel runakunata kamachirqan, awqa-tinkuyman riqtinpas chaypi Señor Diosqa paywan rey Cusan-risataimta atipachirqan. 11 Chaymantataq Israel suyupi thak-kawsay karqan tawa chunka watantin, Otonieltaq wañukapurqan. 12 Wakmantan Israel runakunaqa manapuni Señor Diospa munayninman hinachu ruwarqanku, chay hawan Señor Diosqa Moab suyu rey Eglonta Israelmanta aswan atiyniyoqman tukuchirqan. 13 Hinan Eglonqa Amón runakunawan, Amalec runakunapiwan huñunakuspa Israel runakunata atiparqanku, Palmerakunayoq Llaqta nisqatapas hap'ikapurqanku. 14 Chaymi Israel runakunaqa chunka pusaqniyoq watantin Eglonpa kamachin kapurqanku. 15 Chaymantan Israel runakunaqa Señor Diosta waqyakullarqankutaq, paytaq huk qespichiq runata churamurqan. Chay qespichiqmi lloq'enchu karqan Benjamín ayllumanta Geraq churin Aod sutiyoq. Israel runakunan rey Eglonman sumaq sonqota Aodwan apachirqanku. 16 Hinan Aodqa iskay ladonpi filoyoq puñalta ruwakurqan iskay cuarta hina sayayniyoqta, chaytataq warkuykukurqan paña teqnin p'achan ukhuman. 17 Hinaspan sumaq sonqota Moab rey Eglonman qoykurqan. Eglonqa sinchi wirallañan karqan. 18 Eglonman sumaq sonqota qoykuspataq, Aodqa apaysimuqninkunata kacharparipurqan. 19 Gilgal qayllapi yupaychana saywa rumikunaq kasqanman chayaspataq, Aodqa Eglonman kutirimurqan. Hinaspan nirqan: –Reyníy, huk willakuyta willaykusqayki ichaqa sapallaykiman, nispa. Hinan reyqa runankunata: Lloqsiychis, nirqan. Llapankutaq lloqsirqanku. 20 Rey Eglón sapallan ruphay tiempo llanthukunan wasinpi tiyashaqtintaq, Aodqa chimpaykuspa nirqan: –Reyníy, Diospa willakuynintan apamushayki, nispa. Chayta niqtinmi Eglonqa tiyananmanta sayariykurqan. 21 Aodtaq lloq'enchu kaspa lloq'e makinwan puñalta hap'ispa Eglonta wiksanpi sat'irqorqan. 22 Hinan puñalqa hap'inantinraq reypa wiksanman chinkaykurqan, wirasapa runa kasqanrayku. Chaymi Aodqa puñalta manaña aysarqanñachu. 23 Chaymantataq punkuta p'utiwan wisq'aykuspa, ventananta lloqsipurqan. 24 Pasakusqan qhepanmantataq reypa kamachinpi kaq runakunaqa hamuspa p'utiwan wisq'asqata punkuta tarirqanku, chaymi ninakurqanku: –Hisp'ana wasipichá kashan, nispanku. 25 Manapuni punkuta kicharikamuqtintaq, runakunaqa sayarayasqankupi mana imanakuyta atispanku, p'utiq sullunta aparqamuspa kicharqanku. Reytaq wañusqa chutarayapushasqa. 26 Punkuq kichakunanta suyarayashanankukamataq, Aodqa Gilgalpi yupaychana saywa rumikunatapas pasarqospa Seiratkamaña ayqekurqan. 27 Chayarqospataq Efraín orqo-orqopi waqra pututunta tocaykurqan Israel runakunata awqa-tinkuyman rinanpaq waqyaspa. Israel runakunataq llapanku huñurqokuspa Aod qollanayoq rirqanku. 28 Paytaq nirqan: –Haku ñoqawan, Señor Diosmi awqanchis Moab runakunata hap'iykachiwanchis, nispa. Hinan paykunaqa rispanku Jordán mayu chimpanata wisq'arqorqanku, manataq chayninta pitapas purichirqankuchu. 29 Chay kutipitaqmi yaqa chunka waranqa hina Moab runakunata wañurachirqanku, allichachaq kallpasapa qhari soldadokunataraqtaq kanpas. Manapunin ch'ullallapas kawsarqanñachu. 30 Chay hinatan Israel runakuna Moab runakunata chiriyachirqanku. Chaymantataq Israel suyupi thak-kawsay karqan pusaq chunka watantin. 31 Chaymantataq Anatpa churin Samgar Israelpa qollanan karqan, paymi llank'aq toro chhukuna k'aspillawan wañurachirqan soqta pachak Filistea runakunata. Paypas Israel runakunata qespichillarqantaqmi.
