Jueces 20

1Chaymi llapan Israel runakunaqa wichaypi kaq Dan llaqtamanta uraypi kaq Beerseba llaqtakamaraq Galaad hap'iynintin huk qhari hinalla Mizpapi Señor Diospa qayllanpi huñuykukurqanku. 2Chaypin tawa pachak waranqa soldadokuna espadantinkama kasharqan, paykunawanmi llapa Israel ayllukunaq umalli runankunapas kasharqan. 3Benjamín ayllu runakunataq Mizpapi Israel runakunaq huñukusqanta yacharqorqanku. Hinan Israel runakunaqa Leví ayllu runata tapuykurqanku: –Willawayku imaynan karqan chay millay ruwasqanku, nispa. 4Wañuq warmiq qosantaq nirqan: –Benjamín ayllupi Gabaa llaqtamanmi warmiypiwan qorpachakuq chayaykurqayku. 5Hinan chay qorpachakusqayku wasiman hamurqospanku Gabaa qharikunaqa muyupayawarqanku, wañuchiwayta yuyaykuwaspanku, ichaqa tiyaqmasiytan wañunankama violarqanku. 6Chaymi warmiypa ayanta kuchurqarispa llapa Israel runakunaq tiyasqankunaman apachimurqaykichis, Israel ukhupi paykunaq millay mana chaninta ruwasqankurayku. 7Kunanqa, llapan Israel runakunataq kaypi kashankichis chayqa, ¿ima ninkichistaq kay ruwasqankumanta? nispa. 8Chaymi llapallanku huk qhari hinalla hatarispa nirqanku: –Kunanmi ichaqa mana pipas kutisunchu karpanchisman wasinchismanpas, 9aswanpas Gabaaman mayqenchus phawaykunanchispaq sorteasunchis. 10Hinaspataq pachak runamanta chunkata, waranqamanta pachakta, chunka waranqamantataq waranqata t'aqasunchis mikhuyta llapankupaq apanankupaq. Wakinnintaq Benjamín ayllu Gabaapi runakunata muchuchiq rinqaku Israel ukhupi millay mana chanin ruwasqankumanta, nispa. 11Chay hinatan Israel runakunaqa ch'ulla qhari hinalla huñuykukuspa, Gabaa llaqtaman phawaykuq rirqanku. 12Chaymantataq runakunata kacharqan Benjamín aylluman tapuchiqta: ¿Imanaqtinmi chay hina millayta wakinniykichis ruwarqan? 13¿Maymi chay Gabaapi tiyaq millay runakuna? Horqomuwayku wañuchipunaykupaq Israel ayllukuna ukhupi amaña chay hina millaykuna kananpaq, nispa. Benjamín ayllu runakunataq ichaqa wawqenku Israel runakunata mana uyariqpas tukurqankuchu. 14Aswanraqmi paykunaqa llapa llaqtankumanta Gabaapi huñunakurqanku wakin Israel wawqenkuwan maqanakuq rinankupaq. 15Benjamín soldadokuna yupanakuqtinkutaq iskay chunka soqtayoq waranqa espadantinkama karqan, Gabaamanta aswan allichachaqnin qanchis pachak qharikunaqa manan yupasqachu karqanku. 16Chay llapan runakunamantan karqan qanchis pachak allin warak'ay yachaq lloq'enchukuna, paykunaqa warak'aspa mana hayk'aq pantaqmi karqanku. 17Wakin Israel runakunañataq huñunakuspa tawa pachak waranqa allin maqanakuq espadantinkama karqanku. 18Chaymantataq Israel runakunaqa yupaychana wasiman Diosta tapukuq seqaykurqanku, hinaspan nirqanku: –¿Ñoqaykumanta mayqenkaq ayllun ñawpaqta risaqku Benjamín aylluwan maqanakuq? nispa. Señor Diostaq nimurqan: –Judá ayllu ñawpachun, nispa. 19Chay hinatan Israel soldadokunaqa tutallamanta sayarispa Gabaa llaqtaq qayllanman chayaspa karpakurqanku. 20Chaymantataq Benjamín ayllu contra lloqsirqanku, hinaspan maqanakuy qallarinankupaq Gabaa llaqta chimpapi allinta sayaykurqanku. 21Chay p'unchaymi Benjamín ayllu soldadokunaqa lloqsirqamuspa iskay chunka iskayniyoq waranqa Israel soldadokunata wañuchirqanku. 22Israel soldadokunaqa kallpacharikuspan wakmanta maqanakuy qallarinankupaq allinta sayaykurqanku ñawpaq p'unchay maqanakusqanku cheqaspi. 23Israel soldadokunaqa Señor Dios yupaychana wasiman seqaykuspankun, tutayanankama waqamurqanku, hinaspan Señor Diosta tapumurqanku: –¿Wawqeyku Benjamín aylluwan maqanakuq kutillasaqkupunichu? nispa. Señor Diostaq kutichimurqan: –Arí, riychis, nispa. 24Hinan chay iskaykaq p'unchayqa aswanta qayllaykurqanku Benjamín aylluwan maqanakunankupaq. 25Kaqllataq chay kutipipas Benjamín runakunaqa Gabaamanta lloqsirqamurqanku paykunawan maqanakunankupaq, hinaspan Israelmanta chunka pusaqniyoq waranqa espadayoq soldadokunata wañuchillarqankutaq. 26Chaymi Israel soldadokunaqa llapa llaqta runakunantin Betelman rirqanku, Señor Diospa qayllanpitaq waqarqanku. Chaypitaq tutayanankama ayunarqanku, hinallataq Señor Diosman haywarqanku ruphachina sacrificiokunata sumaq kawsay sacrificiotawan. 27Chay p'unchaykunapitaqmi Diospa rimanakuy arcanqa Betelpi kasharqan, Aaronpa churin Eleazarpa churin Fineestaq sacerdote kasharqan. Hinan Israel runakunaqa Señor Diosta tapullarqankutaq: –¿Wakmanta wawqeyku Benjamín aylluwan maqanakuq kutillasaqkutaqchu? Icha, ¿amañachu risaqku? nispa. Señor Diostaq kutichimurqan: –Rillaychis, paqarinqa atipamunkichismi, nispa. 29Hinan wakin Israel soldadokunaqa Gabaa llaqtaq muyuriqninpi qonqaylla phawaykunankupaq pakarqarikurqanku. 30Wakinkaq soldadoñataq chay kinsakaq p'unchaypi wakin kutikuna hina Gabaa llaqta chimpapi allinta sayaykurqanku Benjamín aylluwan maqanakunankupaq. 31Soldadokuna llaqtamanta maqanakuq lloqsimuqtintaq, Israel soldadokuna qhepaman rispa paykunata llaqtanmanta karunchachirqan. Ñawpaq kutipi hinataq Benjamín soldadokunaqa wañuchiyta qallarirqanku, Betelman rina ñanpi Gabaaman rina ñanpiwan, kinsa chunka Israel soldadokunatataq wañuchirqanku. 32Benjamín soldadokunan yuyarqanku: –Ñawpaq kuti hinan atipashanchis, nispa. Israel soldadokunataq ichaqa ninakurqanku: –Astawan karuman ayqesunchis, llaqtamanta hatun ñankama paykunata karunchachisunchis, nispa. 33Hinaspan paykunaqa ayqerikuspa Baal-tamarpi wakmanta maqanakunankupaq sayaykurqanku. Chaykunata ruwashanankukamataq Gabaa llaqtaq muyuriqninpi qaqa-qaqapi pakakuqkunaqa Gabaaman usqhaylla phawaykurqanku, 34paykunaqa chunka waranqa allichachaq qharikunan karqanku. Maqanakuytaq sinchi manchakuy karqan. Benjamín ayllu soldadokunaqa manan yachakurqanchu chay kutipi urmaykapunankuta. 35Chay hinatan Señor Diosqa Benjamín aylluta Israelwan atipachirqan, chaymi Israel runakunaqa Benjaminmanta espadayoq soldadokunata iskay chunka phisqayoq waranqa pachakniyoqta wañuchirqanku. 36Chaymi Benjamín ayllu runakunaqa atipasqaña kasqankuta reparakurqanku. Israel soldadokunan maqanakuspa Benjaminmanta qhepaman kutirqanku, Gabaa llaqtaq muyuriqninpi pakakuq runakunapi suyakusqankurayku. 37Chay runakunataqmi Gabaaman qonqaylla phawaykuspa llaqtantin runakunata espadawan wañuchirqanku. 38Paykunan rimanakusqaku wakin Israel soldadokunawan llaqtaman phawaykuspaqa nina q'osñiwan willanankupaq. 39Chay hinapin waktasqanta ayqekuq soldadokunaqa nina q'osñiqta rikumuspanku, Benjamín soldadokunaman kutirimurqanku. Benjamín soldadokunataq kinsa chunka Israel soldadokunata wañurqachispa nirqanku: –Ñawpaq kuti hinan atipashanchis, nispanku. 40Chay ratopachataq llaqtamanta q'osñiqa sayarimurqan, Benjamín soldadokunaq qhawarimunankupaq nina rawray q'osñiqa llaqtantintaña tutayasharqan. 41Hinan Israel soldadokunaqa kutirimurqanku, Benjamín soldadokunataq atipasqa kasqankuta reparakuspanku pasaqta llaksakurqanku. 42Chaymi Israel soldadokunamanta ch'inneq ladoman ayqerikuyta yuyaykurqanku, ichaqa manan atirqankuchu llaqtamanta lloqsimuq soldadokunaqpas ñawpaqenkupi kaq soldadokunaqpas chawpinasqan kasqankurayku, chaypitaq wañupurqanku. 43Israel soldadokunataq awqanta muyuykuspa pasaqta qatiykachaspa t'usturqanku Menuhá llaqtamanta Gabaa llaqta inti lloqsimuy ladokamaraq. 44Chay hinapin wañurarqanku chunka pusaqniyoq waranqa Benjamín ayllu allichachaq soldadokuna. 45Wakintaq kutipuspa ayqekapurqanku Rimón Salla nisqaman, chay ñanpitaqmi phisqa waranqa soldadokunata wañuchirqanku. Israel soldadokunaqa astawanraqmi qatirqanku Gidom llaqtakama, chaypipas iskay waranqatawanraq wañuchirqanku. 46Hinan Benjamín ayllu allichachaq soldadokunaqa chay p'unchay iskay chunka phisqayoq waranqa wañurqanku. 47Soqta pachak runataq ayqekurqankupuni ch'inneqninta Rimón Salla nisqaman, chaypitaq tawa killantin pakakamurqanku. 48Chaymi Israel soldadokunaqa wakin Benjamín runakunaman kutirirqanku, sapanka llaqtapitaq espadawan wañurachirqan llapa runakunatapas uywakunatapas, llaqtakunatapas kanaykurqanku.

will be added

X\