Jueces 2

1Señor Diospa angelninmi Gilgalmanta Boquimman wicharqan, chaypin Israel runakunata nirqan: –Ñoqan Egipto suyumanta horqomurqaykichis, hinaspan pusamurqaykichis ñawpa taytaykichisman prometesqay kay hallp'aman. Paykunatataq nirqani: Rimanakusqanchistaqa manan hayk'aqpas p'akisaqchu, 2qankunaqa amapunin kay suyupi tiyaq runakunawan rimanakunkichischu, aswanpas altarninkunatan thuninkichis, nispa. Qankunan ichaqa mana kasuwarqankichischu. ¿Imanaqtintaq chay hinari kankichis? 3Chayraykun ñoqapas kay runakunata ñawpaqeykichismanta mana qarqosaqchu, aswanmi paykunaqa toqlla hina qankunapaq kanqaku, diosninkutaq misk'achiqniykichis kanqa, nispa. 4Señor Diospa angelnin rimayta tukuqtintaq, llapa Israel runakunaqa qaparispa waqaykurqanku. 5Chaymi chay cheqasta suticharqanku Boquim nispa. Chaypitaq Señor Diosman sacrificiokunata haywarqanku. 6Josuetaq Israel runakunata kacharparipurqan, hinan paykunaqa sapankanku ripurqanku sorteopi chaskisqanku hallp'ankuta hap'ikapuq. 7Israel runakunataq Josuepa p'unchayninkunapi Señor Diosta allinta servirqanku, hinallataq Josuemanta qhepakamaraq kawsaq kurak taytakunaq p'unchayninkunapipas. Chay taytakunan Señor Diospa Israelrayku hatuchaq ruwasqankunata rikusqaku. 8Chaymantataq Señor Diospa kamachin Nunpa churin Josueqa wañukapurqan pachak chunka watayoq kashaspa. 9Hinan Efraín orqo-orqopi Gaas orqoq wichaynin Timnat-heres hallp'anpi p'ampapurqanku. 10Hinallataq Josuepa wiñaymasin llapan kurak taytakunapas wañukapurqanku, qhepa wiñay runakunataqmi ichaqa Señor Diosta mana reqsirqankuchu, manallataq Israelrayku imaymana Señor Diospa ruwasqantapas yacharqankuchu. 11Chaymantataq Israel runakunaqa Señor Diospa mana munasqan millaykunata ruwarqanku, Baal dioskunata yupaychaspanku. 12Egiptomanta ñawpa taytankuta horqomuq Diosninku Señortan qonqapurqanku, hinaspan muyuriqninkupi tiyaq runakunaq diosninkuta yupaychaspa Señor Diosta phiñachirqanku. 13Señor Diosta saqerparispataq Baal diosta Astarte diosata servirqanku. 14Chaymantan Señor Diospa phiñakuyninqa Israel runakunapaq rawrarirqan, hinan kaqninkutapas llat'anaqkunawan ch'utichirqan, muyuriqninkupi tiyaq runakunawantaq atipachirqan, churanakuytapas mana atinankukama. 15Sapa kuti awqa-tinkuyman riqtinkun, Señor Diosqa awqankuwan atipachillarqanpuni, paykunaman juraspa nisqanman hina. Chaymi paykunaqa hatun llakillapipuni kasharqanku. 16Chaymantañataq Señor Diosqa Israel runakunaman uma qollanakunata churarqan llat'anaqninkumanta qespichinanpaq. 17Chaywanpas manapunin chay qollanakunatapas kasurqankuchu aswanmi wak dioskunata yupaychaspanku qhellichakurqanku. Ñawpa taytankuqa Señor Diospa kamachikuyninta kasukuspan kawsarqanku, paykunañataqmi ichaqa manaraq imapi Señor Diosta saqerparipurqanku. 18Paykunaman sapa kuti uma qollanata churaspan, Señor Diosqa uma qollanata yanapallaqpuni. Chay hinapin qollanakunaq kawsasqan p'unchaykunapi Señor Diosqa awqankumanta Israel runakunata qespichillaqpuni, paykunaq waqasqankuta ñak'arisqantawan khuyapayaspa. 19Sapa kuti uma qollananku, wañupuqtintaqmi wakmanta huchallikurqanku taytankumantaqa aswan mana allintaraq ruwaspanku. Wak dioskunata servispan yupaycharqanku, millay ruwayninkutapas manapuni qonqaspan k'ulluchaykukurqanku. 20Chaymantan Señor Diospa phiñakuyninqa Israel runakunapaq rawrarirqan, chaymi Señor Diosqa nirqan: Kay runakunan ñawpa taytankuwan rimanakusqayta p'akinku, kamachikuyniykunata mana kasukuspa. 21Chaymi ñoqapas Josué wañukapuspa saqesqan kikin suyupiraq tiyaq llaqtakunataqa manapuni qarqosaqchu. 22Chay llaqtakunawanmi Israel runakunata probasaq, ñawpa taytanku hina kamachikuyniykunata hunt'anqakuchus icha manachus chayta yachanaypaq, nispa. 23Chay yuyaywanmi Señor Diosqa mana wikch'urqanchu Josuepa mana atipasqan llaqtakunata, aswanmi kaqllapiraq qhepachirqan.

will be added

X\