1 Chay p'unchaykunapin Israel suyuqa mana reyniyoq kasharqan. Efraín orqo-orqomanta aswan ukhuneqpin Leví ayllumanta huk runa tiyakuq. Paymi Judá aylluq Belén llaqtanmanta huk sipasta tiyaqmasin kananpaq pusakurqan. 2 Chay warmitaqmi ichaqa phiñarqokuspa Belenpi taytanpa wasinman pasakapurqan, chaypitaq tawa killantin tiyamurqan. 3 Chaymantataq qosanqa kamachinta pusarikuspa iskay asnonta qatiykukuspa qhepanta puririrqan warminta sumaqta rimaykuspa pusakampuq. Chayaqtintaq warminqa pusaykurqan, taytanpas payta rikuspa mayta kusikuspa chaskiykurqan. 4 Suegrontaq hark'arqan qhepakunanpaq, hinan mikhurqanku ukyarqanku chaypi puñupurqanku, paytaq kinsa p'unchayta qhepakurqan. 5 Tawakaq p'unchaypitaq tutallamanta sayarispa ripunanpaq q'epichakurqan, suegrontaq ichaqa hark'aykurqan: –Imallatapas mikhuykuyraq, chaymantaña ripunkichis, nispa. 6 Hinan suegrontin tiyaykuspa mikhurqanku ukyarqanku, suegrontaq qatayninta nirqan: –Kunan tutatawan kaypi puñukuy, hinaspa kusikunki, nispa. 7 Wakmanta ripunanpaq sayariqtintaq, suegronqa hark'aykurqan, hinan payqa qhepakurqan. 8 Phisqakaq p'unchaytaq tutallamanta sayarillarqankutaq, hinan wakmanta suegronqa hark'aykullarqantaq: –Ama pasapuyraqchu, imallatapas mikhuykunkiraq, huk chhikanta suyaykuyraq, nispa. Chaymi paykunaqa tiyaykuspa mikhurqanku. 9 Wakmanta Leví ayllu runa warmintin kamachintin ima ripunanpaq sayariqtintaq, suegronqa hark'allarqanpunitaq: –Qhawariy intita, kay horasñamá, kay tutatawan qhepakuy kusikunaykichispaq, paqarinña ichaqa tutallamanta wasiykiman ripunkichis, nispa. 10 Leví ayllu runataq ichaqa mana qhepakuyta munaspa pasapurqanpuni iskaynin caronayoq asnontin, tiyaqmasin warmintin, kamachintin ima. 11 Manaraq inti haykuytataq Jerusalén nisqa Jebusman qayllaykurqanku, hinan kamachiqa nirqan: –Haku, Jebus runakunaq llaqtanman qorpachakuq haykusun, nispa. 12 Leví ayllu runataq kutichirqan: –Manan wak runakunaq llaqtanmanqa mayqenmanpas haykusunmanchu, paykunaqa manan Israel runakunachu kanku. Rillasun Gabaakama, 13 hinaspa qorpachakusun Gabaa llaqtapipas otaq Ramapipas, nispa. 14 Ahinapin inti haykuyllataña Benjamín aylluq Gabaa llaqtanman chayarqanku. 15 Ñanmanta t'aqarikuspataq qorpachakunankupaq Gabaa llaqtaman haykurqanku, hinaspan plaza pampapi tiyaykurqanku, manataq pillapas: Qorpachasqayki, nirqanchu. 16 Tutayaykuytañataq huk yuyaq runa chakramanta hamusharqan, payqa Efraín orqo-orqomantan karqan, Benjamín aylluq Gabaa llaqtanpi tiyakuq. 17 Chay yuyaq runataq purikuq runa plazapi tiyashaqta rikuspa chimpaykurqan, tapuykurqantaq: ¿Maymantan hamushankichis? ¿Maytataq rishankichisri? nispa. 18 Paytaq nirqan: –Tutayarqachikuykun. Judá aylluq Belén llaqtanmantan hamushayku, Efraín orqo-orqoq ukhun tiyasqaymanraqmi kutipushayku. Belenpi kasqaykumantan kutipushayku, ichaqa manan mayqenpas: Qorpachasqayki, niwankuchu. 19 Kashanmi q'achupas ichhupas asnoykupaq, kashallantaq t'antapas vinopas warmiypaq, runaypaq, ñoqapaqpas, imaykupas kashankaman, nispa. 20 Hinan yuyaq runaqa kutichirqan: –Allinpunin, chay hinaqa, hakuyá wasiyta, ima munasqaykitan qosqayki, manan munaymanchu plazapi illarinaykitaqa, nispa. 21 Hinan wasinman pusarikurqan, chaypitaq asnokunaman qaraykurqan. Paykunataq chakinkuta maqchikurqanku, chaymantataq mikhurqanku ukyarqanku. 22 Allin kusisqaña kashaqtinkutaq, chay llaqta millay runakunaqa hamurqospa chay yuyaq runaq wasinta muyuykurqanku, wakintaq punkuta takaspa nirqanku: –¿Maymi chay qorpachasqayki runa? Horqomuwayku t'inkikunaykupaq, nispanku. 23 Wasiyoq taytataq lloqsimuspa paykunata nirqan: –Wawqeykuna, amayá kay millaytaqa ruwaychischu, kay runaqa wasiypin qorpachakushan. 24 Kayqa ususiy kashan, mana qhariwan kaqraq, kashallantaq kay runaq warminpas. Kunanpacha paykunata horqomusqaykichis ima munasqaykichista ruwanaykichispaq. Kay runata ichaqa amapuni chay millaytaqa ruwaychischu, nispa. 25 Chay runakunataq mana uyariq tukurqanku, chaymi Leví ayllu runaqa warminta paykunaman horqorqan. Hinan chay runakunaqa chay warmita ima munasqankuta ruwaspa violarqanku illariq tutantin, illarimuytataq wikch'upurqanku. 26 P'unchayamuqtintaq warmiqa hampurqan chay qorpachasqa kasqanku wasipi qosanpa kasqanman, punkuman chayamuspataq laq'akuspa wikch'urayapusharqan. 27 Qosantaq tutallamanta sayarispa punkuta kicharikamurqan wakmanta puririnanpaq, hinan punku haykunapi tiyaqmasin warmiqa laq'arayapushasqa, punku sarunaman makinkunata churaykuspa. 28 Paytaq nirqan: –Sayariy, haku ripusun, nispa. Warmiqa manan rimarirqanñachu. Hinan payqa warminpa ayanta asnonman cargaykuspa wasinman apakapurqan. 29 Wasinman chayaspataq warminpa ayanta cuchillowan chunka iskayniyoqman kuchurqarirqan, chaytataq apachirqan Israel runakunaq tiyasqankunaman. 30 Hinan chayta llapan rikuqkuna nirqanku: –¡Egiptomanta Israel runakunaq lloqsimusqanmanta kunankamaqa manan kay hina rikukurqanraqchu! ¡Manan hayk'aqpas kay hinaqa karqanraqchu! Kunanri, ¿imanasuntaq? ¡Manan hinallaqa kanmanchu! ¿Ima ruwananchistapas yuyaykusunpunin? nispa.
