Jueces 17

1Huk runan karqan Micaías sutiyoq Efraín orqo-orqopi tiyaq. 2Paymi mamanta nirqan: –Waranqa pachakniyoq qolqeykitan suwachikurqanki, hinan chay suwaqniykita ñakarqanki, chay qolqeykitaqa ñoqan suwakurqani, makiypin kashan, nispa. Mamantaq payta nirqan: –Wawalláy, Señor Diosmi saminchasunki, nispa. 3Churintaq chay waranqa pachaknin qolqeta mamanman kutichipurqan, hinan payqa churinta nirqan: –Ñoqaqa Señor Diosmanmi kay qolqeta qopusaq amaña qanman ñakayniy chayanasuykipaq, chay hinaqa, kay qolqeta pagaspa qolqewan llunch'isqa idolota ruwachimusaq. Kayqa qolqeta qosqayki, nispa. 4Mamanman qolqenta kutichipuqtintaq, mamanqa iskay pachak qolqeta apaspa qolqe unuyachiqman qorqan. Hinan qolqe unuyachiqqa qolqewan llunch'isqa idolota ruwarqan, chaytataq Micaiaspa wasinpi churarqan. 5Micaiaspa wasinpin yupaychana wasi kasqa. Paytaq ruwarqan sacerdoteq churakunan Diospa munaynin tapuna unkuta, wasipi kaq dioskunatapas. Hinaspan hukkaq churinta sacerdote kananpaq churaykurqan. 6Chay p'unchaykunapin Israel runakunaqa mana reyniyoq kasharqanku, sapanka runan ima munasqankuta ruwasharqanku. 7Chaypachan Judá aylluq Belén llaqtanpi Leví ayllu wayna tiyasharqan. 8Paymi Belenmanta puririmurqan wak tiyanata maskhaspa. Efraín orqo-orqopi purishaspataq Micaiaspa wasinman chayarqan. 9Hinan Micaiasqa tapuykurqan: –¿Maymantan hamushanki? nispa. Waynataq kutichirqan: –Ñoqaqa Leví ayllu runan kani, Judá aylluq Belén llaqtanpi tiyaq, kunantaq wak tiyanata maskhakushani, nispa. 10Hinan Micaiasqa nirqan: –Wasiypi tiyakushasun, taytay hina kapuwanki, sacerdoteraqtaq kankipas. Sapa watan chunka qolqeta pagasqayki, mikhuchisqayki p'achachisqayki ima, nispa. 11Leví ayllu waynataq Micaiasta nirqan: –Arí, tiyakusunmi, nispa. Churin hinataq kapurqan. 12Hinan Micaiasqa chay Leví ayllu waynata sacerdotenpaq churakurqan, waynapas chaypi tiyananpaq qhepakapurqan. 13Micaiastaq nirqan: –Leví runa sacerdoteyoq kaqtiyqa, Señor Diosmi allintapuni saminchawanqa, nispa.

will be added

X\