Jueces 15

1Sansontaq unaymantaña trigo ichhuy killapi cabrachata aparikuspa warmin watukuq rirqan. Chayaspanmi nirqan: –Pasaykachiway warmiypa puñunan wasiman, nispa. Warminpa taytantaq mana kachaykurqanchu, 2aswanmi nirqan: –“Wikch'upunñachá” nirqaykin, chaymi amigoykiwan casarachipurqani. Chaywanpas kayqa sullk'a ñañachan, kurak ñañanmantaqa aswan munaycharaqtaq kanpas, payllawanña casarakapuy, nispa. 3Sansontaq nirqan: –Kunanmi ichaqa mana huchaychu kanqa Filistea runakunata imanasaqña chaypas, manataqmi hinallachu kankichis, nispa. 4Chaymanta pasapuspataq Sansonqa kinsa pachak atoqkunata hap'irqorqan, hinaspataq iskay atoqtakama chupapurata watarqospa chawpinman ichhuta churaykurqan. 5Chaymantataq chay ichhuman ninawan hap'iykuchirqan, hinaspataq Filistea runakunaq chakran chawpiman watasqa atoqkunata kacharparirqan. Chay ninataqmi phawarispa ruphaykapurqan sayashaq trigo chakrakunata, winaychasqaña kashaqkunatapas, uvas chakrakunatapas, olivos chakrakunatapas. 6Chaymantan Filistea runakunaqa tapupakuspa nirqanku: –¿Pin kayta kanaykuwanchis? nispa. Wakin runakunataq willarqanku: –Timnat runaq qataynin Sansonmi kanaykamun, warminta amigonman qoykapusqanmanta, nispa. Chaymi Filistea runakunaqa rirqospa chay warmita taytantawan kanaykurqanku. 7Chaymantan Sansonqa nirqan: –Chay hinatataq ruwankichis chayqa, ñoqapas manan hinallachu kasaq, qankunamantaqa vengakusaqpunin, nispa. 8Chaymantataq waq'a hinaraq Filistea runakunata ñut'urqarirqan, hinaspan Etam qaqa wasiman tiyaq rirqan. 9Filistea runakunataq Judá aylluq hallp'anman wichaykuspa chaypi karpakurqanku, hinaspan Lehi llaqtaman phawaykurqanku. 10Chaymi Judá ayllu runakunaqa paykunata tapurqanku: –¿Imanaqtintaq ñoqaykuwan maqanakuqri hamunkichis? nispa. Filistea runakunataq nirqanku: –Sansón hap'iqmi hamushayku, imaynatachus ruwamuwasqankuta hina paytapas ruwanaykupaq, nispa. 11Chaymantataq Judá ayllumanta kinsa waranqa runa Etam qaqa wasiman rispa Sansonta nirqanku: –¿Manachu yachanki Filistea runakunaq kamachinpi kashasqanchista? ¿Imatan chayta ruwamuwankiku? nispa. Sansontaq paykunata nirqan: –Imaynatan ñoqata ruwawarqanku, chhaynatan paykunatapas ruwamurqani, nispa. 12Paykunataq nirqanku: –Qan hap'iqmi hamushayku, Filistea runakunaman apanaykupaq, nispa. Sansontaq nirqan: –Sut'inta niwaychis mana wañuchiwanaykichista, nispa. 13Hinan nirqanku: –Manan wañuchisqaykikuchu, aswanpas Filistea runakunaman apanallaykupaqmi hap'isqaykiku, nispa, hinaspataq mosoq waskhakunawan t'eqerqospa qaqa wasimanta horqomurqanku. 14Lehikama chayachimuqtinkutaq, Filistea runakunaqa kusikuymanta qaparkachaspa taripamurqanku, ichaqa Señor Diospa Espiritunmi Sansonta wakmanta kallpacharqan. Hinan Sansonpa rikran t'eqesqankuqa ruphasqa lino hina tukurqan, makin watasqa watanakunapas urmaqarqan. 15Hinan huk manaraq unay wañusqa asno qhaqllinta hoqarirqospa, waranqa runata wañurqarichirqan. 16Hinaspataq nirqan: –Asno qhaqllinllawanmi monton-montonta montonarqoni. Asno qhaqllinllawanmi waranqa runata sipirqarini, nispa. 17Chayta nispan asno qhaqllintaqa chanqarqan, hinan chay cheqasta suticharqan “Qhaqllin Moqo” nispa. 18Chaymantataq pasaqta unu ch'akiywan Sansonqa hap'ichikurqan, chaymi mañakuspa Señor Diosta nirqan: –Qanmi, Señorníy, paykunata atipachiwarqanki. Kunanri, ¿hinachu unu ch'akiymanta wañusaq mana iñiqkunaq hap'isqan? nispa. 19Chaymi Señor Diosqa Lehipi ch'aki p'uktumanta unuta phullpuchimurqan, chay unuta ukyaykuspataq Sansonqa qhalicharikurqan. Chayraykun chay cheqasta suticharqan “Waqyakuqpa Pukyun” nispa, chaytaq kunankama kashan. 20Filistea runakuna kamachikushaqtinkun Sansonqa iskay chunka watantin Israel runakunaq uma qollanan karqan.

will be added

X\