1 Israel runakunaqa wakmantan manapuni Señor Diospa munayninman hinachu ruwarqanku, chayraykun Diosqa Filistea runakunaq kamachinman churaykurqan tawa chunka watantin. 2 Dan ayllumantan huk runa karqan Zora llaqtapi tiyaq Manoa sutiyoq, paypa warmintaq mana hayk'aq wachakuq karqan. 3 Chay warmimanmi Señor Diospa angelnin rikhurirqan, hinaspan nirqan: –Qanqa manan hayk'aqpas wachakurqankichu, kunanmi ichaqa wiksallikunki, hinaspan qhari wawata wachakunki. 4 Kunanmantaqa aman ukyankichu vinotapas ima machachikuq ukyanatapas, amallataq mikhunkichu Diospa hark'asqan mikhunatapas. 5 Wachakusqayki wawaqa nacesqanmantapachan Diospaq t'aqasqa Nazareo runa kanqa, chaymi chukchantapas mana rutuchikunqachu, paymi Israel llaqtata Filistea runakunamanta qespichiyta qallarinqa, nispa. 6 Hinan warmiqa qosanman rispa chay nisqanta willamurqan: –Huk runan Diospa angelninman rikch'akuq hamuwasqa, payqa sinchi mancharikuymi kasqa, manan sutintaqa willawanchu, may llaqtamanta hamusqantapas manataqmi tapuykurqanichu. 7 Paymi niwarqan: Kunanmi qan wachakunki huk qhari wawata, kunanmantaqa aman ukyankichu vinotapas ima machachikuq ukyanatapas, amallataq mikhunkichu Diospa hark'asqan mikhunatapas, chay wawaqa nacesqanmanta wañukapunankaman Diospaq t'aqasqa Nazareo runa kanqa, nispa. 8 Hinan Manoaqa Señor Diosmanta mañakurqan: –Señorníy, warmiyman kachamusqayki runata wakmanta kachamuwayku, hinaspa willaykuwayku nacemuq wawawan imatachus ruwanaykuta, nispa. 9 Chaymi Diosqa Manoaq mañakusqanta uyarispa, wakmanta angelta kachamurqan, hinan chakrapi sapallan warmi kashaqtin angelqa rikhurillarqantaq. Manoataq mana chaypichu kasharqan. 10 Chaymi payqa phawaylla qosanman willaq rirqan: –¡Qosáy! Qayna rikhuriwaqniy runan kunan wakmanta rikhurirqowan, nispa. 11 Manoataq warminpa qhepanta phawarispa chay runawan tuparqan, hinaspan nirqan: –¿Qanchu warmiyta qayna rimapayarqanki? nispa. Paytaq kutichirqan: –Arí, ñoqan, nispa. 12 Manoaqa nillarqantaq: –Chay nisqayki hunt'akuqtinri, ¿imaynatataq uywasaqku wawatari? Paypari, ¿imakunataq ruwanan kanqa? nispa. 13 Señor Diospa angelnintaq Manoata nirqan: –Warmiykin lliw nisqaykunata llapantapuni hunt'anqa. 14 Aman ukyanqachu vinotapas ima machachikuq ukyanatapas, amallataq mikhunqachu ima rikch'aq uvastapas, Diospa hark'asqan mikhunatapas. Chay nisqaykunatan llapantapuni hunt'anqa, nispa. 15 Chaymi Manoaqa Señor Diospa angelninta nirqan: –Ama hinachu kay, tiyaykuyraq, huk cabrachallatapas q'asparqapusqaykiraq, nispa. 16 Manoaqa Señor Diospa angelnin kasqanta manan yacharqanchu. Hinan Señor Diospa angelninqa payta nirqan: –Qhepachiwankiña chaypas, manan mikhunaykitaqa mikhusaqchu. Señor Diosman ruphachina sacrificiota haywayta munaspaqa, haywallay, nispa. 17 Chaymantapas Manoaqa nillarqantaq: –¿Imataq sutiykiri? Niwasqaykiku hunt'akuqtin yupaychamunaykupaqmi munayku, nispa. 18 Señor Diospa angelnintaq nirqan: –¿Imanaqtintaq tapuwanki sutiytari? Sutiyqa sinchi musphanan, nispa. 19 Manoataq usqhaylla cabrachata ruru ofrendatawan qaqa patapi sinchi musphana ruwaq Señor Diosman haywarqan. 20 Altarmanta nina rawrariqtintaq, paykunaq rikushasqan angelqa chay nina sonqopi hanaq pachaman wicharipurqan. Chayta rikuspataq paykunaqa warmi-qhari qonqoriykukurqanku uyankuq pampaman tupanankama. 21 Señor Diospa angelninqa manañan astawan paykunaman kutimurqanchu. Chayraqmi Manoaqa repararqan Señor Diospa angelninpuni kasqanta. 22 Hinaspataq payqa warminta nirqan: –Kunanqa Diosta rikurqonchis chayqa, wañurqapusunchá, nispa. 23 Warmitaq payta nirqan: –Wañunanchista Señor Dios munanman chayqa, manachá ruphachisqa sacrificiotapas ruru ofrenda haywasqanchistapas chaskiwasunmanchu, imachus kanantapas manachá willawasunmanchu, manallataq chaykunatapas rikuchiwasunmanchu karqan, nispa. 24 Killan hunt'akuqtintaq qhari wawata wachakurqan, suticharqantaq Sansonta. Wawan wiñarqan, Señor Diostaq payta samincharqan. 25 Señor Diospa Espirituntaq Sansonta kallpachasharqanña Zora llaqtawan Estaol llaqtawan tupay Dan aylluq karpankunapi.
