1 Efraín ayllu runakunataq huñunakuspa, Jordán mayuta chimpaspa Zafón llaqtaman rirqanku. Chaypitaq Jefteta nirqanku: –¿Imanaqtintaq Amón runakunawan maqanakuqri sapallayki rirqanki, riysinaykupaq mana willarikuspaykiri? Kunanmi chaymanta qanta wasiykipi kanaykusqaykiku, nispa. 2 Chaymi Jefteqa nirqan: –Ñoqataqa llaqtay runatawanmi Amón runakunaqa sinchita churanakuwarqanku, hinan qankunaman willamurqaykiku, manataq yanapaqniyku hamurqankichischu. 3 Chayraykun ñoqalla wañuytapas mana manchakuspa, Amón runakunawan maqanakuq ripurqani, Señor Diostaq paykunata atipachiwarqan. Chayri, ¿imanaqtintaq kunan qankunari ñoqawan maqanakuq hamunkichis? nispa. 4 Chaymi Jefteqa llapan Galaad runakunata huñurqorqan, Efraín runakunawan maqanakuspataq atiparqan. Efraín runakunan k'amisqaku: –Yaw, Galaad runakuna, qankuna Manasespa hallp'anpi Efrainpa hallp'anpi tiyashasparaqtaqchu, Efraín aylluta wikch'upunkichis, nispa. 5 Galaad runakunaqa Efraín runakunaq Jordán mayu chimpanankuta soldadokunawan wisq'arqorqanku, maypacha Efraín runa ayqekuspa: Hinallata chimpachiway, niqtinmi, Galaad runakunaqa: ¿Efrainmantachu kanki? nirqanku. Manan, niqtintaq, 6 paykunaqa nirqanku: Shibolet niy, nispa. Runataq mana chay simita rimayta atispa: Sibolet, nillaq. Chaymi kaq ratopacha payta hap'ispa mayu chimpanapi wañuchiqku. Chaypachan maqanakuypi Efraín runakunaqa tawa chunka iskayniyoq waranqa wañurarqanku. 7 Jeftetaq soqta watata Israelpi uma qollana karqan, chaymantataq wañukapurqan, p'ampapurqankutaq kaq Galaad hallp'api. 8 Jeftepa qhepantaqa Belenmanta Ibzanñataqmi Israelpi uma qollana karqan. 9 Paypa churinkunan kinsa chunka karqan, kinsa chunkallataq ususinkunapas, llapan chay wawankunatataq casarachirqan wak ayllu runakunaq wawankunawan. Ibzanqa qanchis watatan Israelpi uma qollana karqan, 10 wañupuqtintaq Belenpi p'ampapurqanku. 11 Paypa qhepantataq Zabulón ayllumanta Elonqa chunka wata Israelpi uma qollana karqan, 12 wañupuqtintaq Zabulón aylluq hallp'an Ajalón llaqtapi p'ampapurqanku. 13 Paypa qhepantataq Piratón llaqtamanta Hilelpa churin Abdón Israelpi uma qollana karqan. 14 Paypa churinkunataq karqan tawa chunka, nietonkunataq kinsa chunka, sapankan silla asnoyoqkama karqanku. Israelpitaq uma qollana karqan pusaq wata. 15 Wañupuqtintaq Amalec orqo-orqo Efraín aylluq hallp'an Piratonpi p'ampapurqanku.
