Jueces 11

1Jefteqa Galaad suyumanta kallpasapa allin qharin karqan, payqa rabona warmiq wachakusqan Galaad sutiyoq runaq churinmi karqan. 2Galaadpa warmintaq churikunata wachakurqan, chaykunan wiñarqarispa Jeftetaqa taytanpa wasinmanta qarqorqanku: Manan taytanchispa imanpas qanpaqqa kananchu, qanqa wak warmiq wawanmi kanki, nispanku. 3Chaymi Jefteqa wawqenkunamanta ayqekapuspa Tob llaqtaman ripurqan. Chaypin qella, tumaqaya runakunata huñuspa paykunaq umallin kapurqan. 4Chay pisi killakunamanta hinataq Amón runakunaqa Israel runakunaman phawaykurqanku. 5Hinan Galaadpi kurak taytakunaqa Tob llaqtata rirqanku Jefteta pusamunankupaq, 6hinaspan nirqanku: –Haku ripusun, Amón runakunawan awqa-tinkuypi qollanayku kanaykitan munayku, nispa. 7Jeftetaq paykunata nimurqan: –Qankunaqa cheqnikuspan taytaypa wasinmanta qarqowarqankichis, ¿kunantaqchu sonqo nanay llakikuypi rikukuspaykichis maskhaqniyraqtaq hamuwankichis? nispa. 8Galaad kurak taytakunataq nirqanku: –Arí, chaywanpas qan maskhaqpunin puririmuyku. Haku ripusun. Amón runakunawan awqa-tinkuypi tupaysimuwayku, hinallataq Galaadpi llapaykuq qollanayku kapunki, nispanku. 9Hinan Jefteqa paykunata nirqan: –Qankunapunitaq llaqtayman pusawankichis Amón runakunawan maqanakuqta, chaypitaq Señor Diosqa ñoqawan atipachiwanqa chayqa, ñoqan qankunaq qollanaykichis kapusaq, nispa. 10Chaymi kurak taytakunaqa kutichirqanku: –Señor Diosmi uyarishawanchis, nisqaykiman hinapunin ruwasaqku, nispa. 11Hinan payqa llaqta taytakunawan kutimpurqan, paykunataq qollanankupaq Mizpapi churakapurqanku, chaypitaq Jefteqa ñawpaq rimasqankuta Señor Diospa ñawpaqenpi wakmanta nillarqantaq. 12Chaymantataq Jefteqa Amón runakunaq reyninman willaqkunata tapumunanpaq kacharqan: ¿Iman qan ñoqawan ruwanayki, chaymi suyuykamaraq maqanakuq phawaykamuwanki? nispa, nimunankupaq. 13Chaymi Amón runakunaq reyninqa Jeftepa willaqninkunata nimurqan: –Egiptomanta hamushaspankun Israel runakuna hallp'aykuta qechuwarqanku, Arnón mayumanta Jaboc mayukama, chaymantapas Jordán mayukamaraq. Kunanqa sumaqllapi chay hallp'aykuta kutichipuwayku, nispa. 14Chaymantan Jefteqa Amón runakunaq reyninman willaqkunata wakmanta kacharqan: 15Kay hinatan Jefteqa nin: Israel runakunaqa manas qechusqakuchu Moab hallp'atapas Amón hallp'atapas. 16Egiptomanta hamushaspankuqa, ch'inneqnintas hamusqaku Puka Qochaman chayamunankukama, chaymantapas Cadesmansi chayasqaku. 17Hinaspas Israel runakunaqa Edom reyman kachasqaku: Ama hinachu kay, hallp'ayki chawpillanta pasakusaqku, nispa, niqta. Hinas Edom reyqa mana munasqachu, chaymantapas Moab reyman kachallasqataqsi, manallataq chay reypas munasqachu, chayraykus Israel runakunaqa Cadesllapiña qhepakapusqaku. 18Chaymantataqsi ch'inneqninta rispa, Edom suyuq Moab suyuqpiwan qorpantakama muyusqaku, Moab suyu inti lloqsimuy ladoman chayasqaku, hinaspas Arnón mayuq wichayninpi karpakusqaku. Hinas Moab hallp'amanqa mana haykusqakuchu, chay mayu qorpa kasqanrayku. 19Chaymantas kachallasqakutaq Amor runakunaq reynin Hesbonpi kaq Sehonman: Ama hinachu kay, hallp'ayki chawpillanta pasakusaqku hallp'aykuman ripunaykupaq, nispa, niqta. 20Hinas Sehonqa mana munallasqataqchu hallp'ankuq chawpin pasanankuta, aswansi llapan soldadonkunata huñurqospa, Jahazaman rispa karpakusqaku, hinaspataqsi Israelwan maqanakusqa. 21Israelpa Diosnin Señortaqsi ichaqa Israelwan atipachipusqa rey Sehonta soldadonkunatawan, hinaspas llapan Amor runakunaq hallp'anta Israel runakunaqa hap'ikapusqaku, 22Arnón mayumanta Jaboc mayukamaraq, ch'inneqmantapas Jordán mayukamaraq. 23Chay hinaqa, Israelpa Diosnin Señormi Amor runakunamanta qechuspa, Israel runakunaman hallp'ankuta qosqa. ¿Chaytachu qanqa qechuyta munawankiku? 24Qankunapas Quemos diosniykichispa qosqantaqa manan kacharikuwaqchischu riki, chay hinallataqmi ñoqaykupas Diosniyku Señorpa qowasqankutaqa manapuni kacharillasaqkutaqchu. 25¿Qanri aswan allinchu kayta munanki Moab rey Ziporpa churin Balacmanta? Paypas manan Israel runakunawan churanakurqanchu, manallataqmi maqanakurqanpaschu. 26Kinsa pachak watañan Israel runakunaqa tiyashayku Hesbón llaqtapi ayllunkunantinpi, kaqllataq Aroer llaqtapi llapa ayllunkunallantinpitaq, Arnón mayu patapi llapan llaqtakunapipas. ¿Imanaqtintaq mana chay p'unchaykunapiraqchu qechukapurqankichisri? 27Ñoqaqa manan qantaqa rimapayaykichu, qanmi aswan mana allintaqa ruwashawankiku ñoqaykuwan maqanakuq hamuspayki, ichaqa Señor Diosmi chaninchaqqa, paypuni chaninchachun Israel runakunata Amón runakunatawan, nispa, niqta. 28Chaywanpas Amón runakunaq reyninqa manan kasukurqanchu Jeftepa willachisqanta. 29Hinan Señor Diospa Espiritunqa Jefteman hunt'aykurqan. Chaymi payqa Galaad hap'iyta Manasés aylluq hallp'anta muyurqamurqan, hinaspan Mizpa llaqtaman rirqan. Chaymantataq Amón runakunaq hallp'anman chimparqan. 30Chaypitaq Señor Diosman prometekurqan: Ñoqamanchus Amón runakunata hap'ichiwanki chayqa, 31paykunata atiparqospa kutipushaqtiy, mayqenchus wasiymanta ñawpaqta taripamuwanqa, chaytan qanman ruphachina sacrificiota haywamusqayki, nispa. 32Hinaspan Jefteqa mayuta chimparqospa Amón runakunawan maqanakurqan, Señor Diostaq paywan atipachirqan. 33Chaymi Jefteqa askhatapuni awqankunata wañurachirqan, hinaspan hap'ikapurqan iskay chunka llaqtakunata, Aroermanta Minitninta Abel-keramimkama. Chay hinapin Israel runakunaqa Amón runakunata k'umuchirqanku. 34Mizpapi wasinman Jefteqa kutipuqtintaq, sapallan ususin payman chaskiq lloqsimurqan tusukuspa tinyata tocakuspa. Payllapunitaq sapallan wawan karqan, 35chaymi ususin hamushaqta rikurqospa, llakikuymanta p'achanta llik'ikurqan, nirqantaq: –¡Imaraqmi wawalláy! ¡Qanraqtaq hamunkipas kay llakiman churaykuwanaykipaq! Kunanri, ¿imanaykusaqtaq? Señor Diosmanmi prometekurqani, chaytaqa hunt'asaqpunin, nispa. 36Ususintaq nirqan: –Papáy, ñataq Señor Diosta nirqankiña chayqa, ñoqawan hunt'allay, ñataq Señor Diospas awqayki Amón runakunata atipanña chayqa. 37Chaywanpas ama hinachu kay, iskay killata suyaykuway orqon-orqonta sipasmasiykunawan purimunaypaq wawayoq-kayman manaraq chayasqaymanta waqaspay, nispa. 38Jefteqa ususinta nirqan: –Wawalláy, riyyá, nispa, kacharparipurqan iskaynin killantin. Chay killakunapitaq sipasmasinkunawan orqon-orqonta purimurqan wawayoq-kayman manaraq chayasqanmanta waqaspa. 39Iskaynin killa tukukuqtintaq taytanman kutimpurqan, paytaq ima rimarisqanta Diosman hunt'apurqan, ususinqa doncellallaraqmi karqan. 40Chay p'unchaymantan Israelpi sipaskuna watapi huk kuti tawa p'unchaynintinta Jeftepa ususinmanta orqota waqaq riqku.

will be added

X\