Judas 1

1Jesucristoq kamachin, Jacoboq wawqen ñoqa Judasmi kay cartata qelqamuykichis Diospa waqyasqankunaman. Qankunatan Dios Yaya munakusunkichis, Jesucristotaq waqaychashasunkichis. 2Diosmi anchatapuni khuyapayasunkichis, thak-kaytapas qosunkichis, munakusunkichispas. 3Munakusqay wawqe-panaykuna, maytapunin munarqani llapanchispa qespikuyninchismanta qankunaman qelqamuyta, ichaqa kunanmi kikiymanta obligasqa rikukuni kaykunata qelqamunaypaq: Qankunatan kallpachaykichis iñiypi qaqatapuni sayanaykichispaq, chay iñiytan ch'ulla kutillata Diosqa ch'uya llaqtanman qorqan. 4Diosta mana manchakuq wakin runakunan, mana reparachikuq hinalla haykumurqasunkichis. Paykunaqa millay runakunan kanku, chayraykun ñawpaqmantaña huchachanapaq nisqaña karqanku, Diosninchispa khuyapayakuynintapas q'ewispa qhelli kawsayman tukuchinku, sapallan munaychakuq Señor Jesucristotapas negankun. 5Yachashankichisña chaypas, munanin huk kutitawan qankunata kayta yuyarichiyta: Señorqa Israel llaqtantan Egipto suyumanta horqomurqan, ichaqa chay qhepatan mana iñiqkunata wañurachirqan. 6Hinallataq qallariypi munayniyoq kasqankuwan mana contentakuq angelkunatapas wiñaypaq watasqata laqhayaq ukhupi hatun taripay p'unchaypaq Diosqa waqaychashan, hanaq pacha tiyanankuta saqepusqankurayku. 7Kaqllataqmi Sodoma llaqtapas, Gomorra llaqtapas, muyuriqpi llaqtakunantin, chay angelkuna hinallataq qhelli huchapi purirqanku, aychaq sinchi millay munasqankunata ruwaspanku, chay hawa wiñay ninaq muchuchiyninta ñak'arirqanku. Chaykunaqa llapa wanananchispaq ejemplo churasqan kashan. 8Chay hinallataqmi chay mosqokuq runakunapas cuerponkuta qhellichanku, atiyniyoq Señorta pisichanku, hanaq pachapi atiyniyoqkunatapas k'aminku. 9Kikin Arcangel Miguelpas saqrawan churanakushaspa, Moisespa ayanta qechunakushaspanqa, manan saqrata k'amispa huchacharqanchu, aswanmi nirqan: Señormi anyasunki, nispalla. 10Chay runakunan ichaqa mana yachashaspa imatapas k'aminku. Paykuna kikinkumanta munasqankupitaq mana yuyayniyoq uywakuna hina, waqllinku, wañuyman rinankupaq. 11¡Ay, imaynaraqmi paykunaqa kanqa! Cainpa ruwasqanta hinan ruwashanku. Qolqeraykun Balaam hina pantaykunku. Coré hina awqa sayarisqankuraykun wañuchisqa kanku. 12Iñiqkunapaq wakichisqa mikhuyniykichiskunapipas sinchi p'enqaymi paykunaqa kanku, chaypin qankunawan kuska kusisqa mikhunkupas ukyankupas mana p'enqarikuspa, chaykunaqa paykuna kikillankutan michikunku. Paykunaqa kanku wayraq apaykachasqan mana parayoq phuyu hinan, cosecha tiempopi mana ruruyoq saphinmanta t'irasqa mullpha sach'a hinan. 13Paykunaqa lamar-qochaq sinchi phoqchiqesqan hinan kanku, p'enqay ruwasqankuqa qochaq wikch'usqan qhelli phosoqo hinan rikhurin. Paykunaqa mana takyaykuspa phawaykachaq ch'askakuna hinan kanku. Chaymi paykunaqa huchachasqa kashanku, laqhayaq ch'ampi tutayaqpi wiñaypaq kanankupaq. 14Paykunamantan Adanpa qanchiskaq miraynin Enocpas profetizarqan: “Señortan rikurqani waranqa-waranqa ch'uya angelkunawan hamushaqta, 15lliwta taripananpaq, hinaspa llapa millay runakunata lliw mana chanin ruwasqankumanta, Diosta mana manchakuspa huchasapakunaq paypa contranpi llapa k'arak simikunata rimasqankumantawan huchachananpaq”, nispa. 16Chay runakunaqa millay munasqallankuta ruwayta munaspankun chhuchupakunku, qhepallapin rimanku, hinallataq hatunchakuspanku runakunapaq allinta rimaq tukunku imatapas chaskinankuraykulla. 17Qankuna ichaqa, munakusqay wawqe-panaykuna, yuyariychis Señorninchis Jesucristoq apostolninkunaq ñawpaqmantaña willasqanku simikunata. 18Paykunan nirqasunkichis: “P'uchukay qaylla tiempokunapiqa kanqan asipayakuqkuna, millay munayninkuman hina puriqkuna”, nispa. 19Paykunaqa t'aqanachiqkunan kanku, kay pacha kaqpi yuyayniyoqmi kanku, manataqmi Diospa Espiritunqa paykunapi kanchu. 20Qankuna ichaqa, munakusqay wawqe-panaykuna, ancha ch'uya iñiyniykichispi wiñachinakuychis, Santo Espirituq yanapayninwan Diosmanta mañakuychis. 21Diospa munakuyninpi allinta takyaychis, Señorninchis Jesucristoq khuyapayakuyninpi, wiñay kawsay qonasuykichista suyakuychis. 22Wakin iskayrayaqkunata iñiyninkupi yanapaykuychis. 23Wakinta qespichiychis, ninamanta qechurqoq hina, wakintataq cuidakuspa khuyapayaychis, ichaqa mana chanin kawsayninkupi qhellichasqa p'achatapas cheqnikuychis. 24Chay hinaqa, mana urmaqta waqaychaqniykichis atiyniyoq Diosman, ancha kusikuywan qhapaq qayllanman mana huchachanata asuykachiqniykichis, 25sapallan qespichiqninchis Diosman, qhapaqchaypas, hatunchaypas, hatun kamachikuypas, qhapaq-atiypas, qaynapas, kunanpas, wiñay-wiñaypaqpas Señorninchis Jesucristoq sutinpi kachun. Amén.

will be added

X\