Josué 9

1Het runakunaq, Amor runakunaq, Canaán runakunaq, Hev runakunaq, Jebus runakunaq reyninkunataq imachus pasasqanta uyarirqanku. Chay reykunan Jordán mayu inti haykuy lado orqo-orqopi, Shefela nisqa moqo-moqopi, lamar-qocha patapi Líbano orqokuna cheqaskama tiyarqanku. 2Hinaspan paykunaqa huk-nisqalla huñukurqanku Josuewan Israel runakunapiwan maqanakunankupaq. 3Gabaonpi tiyaq Hev runakunataq yacharqanku Josuepa Jericó llaqtata Hai llaqtatawan imayna ruwasqanta, 4chaymi sumaqllata q'oturqoyta yuyaykurqanku. Qoqawankutan asnokunaman thanta costalkunapi cargaykurqanku, kaqllataq vinotapas thanta qara p'uyñukunapi cargaykurqanku, hinaspan puririmurqanku. 5Hinallataq thanta p'achakunawan churakurqanku, mawk'a usut'akunawan usut'akurqanku. Ch'aki qhoqasqa t'antan qoqawankupas karqan. 6Gilgalpi karpa-karpaman chayaspataq Josueta Israel runakunatawan nirqanku: –Karu llaqtamantan hamushayku sumaqpi qankunawan rimanakuq, nispa. 7Israel runakunataq chay Hev runakunata nirqanku: –Kay qayllakunallapipaschá qankunaqa tiyashankichis. ¿Imaynataq qankunawanri rimanakuykuman? nispa. 8Paykunataq Josueta nirqanku: –Ñoqaykuqa kamachiykichismi kapusaqku, nispa. Chaymi Josueqa tapuykurqan: –Qankunari, ¿pipunitaq kankichis? ¿Maymantapunitaq hamushankichis? nispa. 9Hinan paykunaqa kutichirqanku: –Karu llaqtamantan hamushayku, Diosniykichis Señor Dios allin mentasqa kasqanta yachaspayku. Yachallaykutaqmi Egipto suyupi imaymana ruwasqanta, 10Astarot llaqtapi tiyaq Hesbón suyu rey Sehonta Basán suyu rey Ogta ruwasqantapas. Paykunan Jordán mayuq chimpanpi Amor runakunaq reynin kasqaku. 11Chayraykun kurak taytakuna llaqta-masiykupiwan niwarqanku: –Ñanniykichispaq qoqawata apakuychis, hinaspa riychis paykunaq kasqankama. Ninkichistaq: Qankunawan sumaqpi rimanakuqmi hamushayku, kamachiykichistaq kapusaqku, nispaykichis, nispa. 12Qankuna maskhaq hamushaspaykun, q'oñishaqllataraq kay t'antaykuta apakamurqayku, kunantaq purimushaqtiyku hina qhoqayarqapun. 13Kaqllataq kay vino apamusqayku qara p'uyñukunapas mosoqlla karqan, kunantaq t'oqo-t'oqollaña kapun, hinallataqmi ñanta sinchi karuta purimusqaykupi p'achaykupas usut'aykupas thantakamun, nispa. 14Chaymi Israel runakunaqa Gabaón runakunaq qoqawankuta malliykurqanku, ichaqa manan Señor Diosta tapuykurqankuchu. 15Hinan Josueqa paykunawan rimanakurqan sumaqpi kawsanankupaq, paykunata mana hayk'aqpas wañuchinanpaq. Israel umalli runakunapas Señor Diospa sutinpi juraspan: –Ahinapuni kachun, nirqanku. 16Kinsa p'unchay qhepatataq Israel runakunaqa yacharqorqanku Gabaón runakunaqa qayllallankupi tiyasqankuta. 17Hinaspan Gabaón runakuna maskhaq rirqanku, kinsa p'unchaymantataq llaqtankuman chayarqanku. Llaqtankun kaykuna karqan: Gabaón, Cafira, Beerot, Quiriat-jearim. 18Israel runakunataq ichaqa paykunata mana wañuchirqankuchu, Israelpi llapan umalli runakuna Israelpa Diosnin Señorpa sutinpi jurasqankurayku. Chay ruwasqanku hawan Israel runakunaqa umalli runakunaq contranpi rimarqanku. 19Umalli runakunataq ichaqa nirqanku: –Ñoqaykun Israelpa Diosnin Señorpa sutinpi jurarqayku mana wañuchinanchispaq, chayraykun mana imanaytapas atisunmanchu. 20Hinallapunin kawsanqaku, juramento ruwasqatachus p'akisunman chayqa, Diosmi ñoqanchispaq phiñakunman, nispa. 21Chay hinatan Israelpi umalli runakunaqa kamachikurqanku mana wañuchinapaq, Gabaón runakunatan ichaqa churakurqanku llaqtantinpaq llant'a ruwaqta unu aysaqtawan. Chay hinapin juramento ruwasqankuta hunt'arqanku. 22Chaymantataq Josueqa Gabaón runakunata waqyarispa tapuykurqan: –¿Imanaqtinmi qankuna: Karumantan kayku, nispa, q'otuwarqankiku qayllallaykupi tiyashaspaykichis? 23Kunanqa ñakasqan kankichis, wiñaypaqtaq kamachillapuni kankichis. Diosniypa wasinpaqmi llant'ata ch'eqtankichis, unuta aysamunkichis, nispa. 24Hinan paykunaqa Josueta nirqanku: –Willawarqankun Señor Diosniykichispa kamachin Moisesta kamachisqanta, paymi nisqa kay llapan suyuta qonasuykichista, hinaspa lliw kaypi tiyaqkunata wañuchinanta. Chaymi ñoqaykuqa wañuchiwanaykikuta manchakuspa chayta ruwarqayku. 25Kunanqa makiykichispin kayku, ima munasqaykichista ruwawayku, nispa. 26Ahinapin Josueqa Gabaón runakunata Israel runakunawan mana sipichirqanchu, 27ichaqa churaykapurqan llant'a ruwaqta unu aysaqta Señor Diospa altarninpaq llapan Israel runapaqwan. Chay p'unchaymantapachan maypichus Señor Diospa akllakusqan cheqaspi chayta ruwananku karqan.

will be added

X\