Josué 7

1Judá ayllumantan huk qhari karqan Ahán sutiyoq, taytanmi karqan Carmi, Carmiq taytantaq Zabdi, Zabdiq taytantaq Zera. Paymi Señor Diospa sutinpi ch'usaqyachinapaq kaqkunamanta imaymanata hoqarikurqan. Chayraykun llapa Israel runakunaqa huchachasqa rikukurqanku, Señor Diospa phiñakuynintaq paykunapaq rawrarirqan. 2Josuemi Jericomanta Hai llaqtaman runakunata kachaspa nirqan: –Wichaychis, hinaspa chay hap'iyta qhawaramuychis, nispa. Paykunataq rispanku Hai llaqtata qhawaramurqanku. Chay llaqtaqa Betelpa inti haykuy ladon Bet-avén llaqta qayllapin karqan. 3Chaymanta kutimuspataq Josueta nirqanku: –Ama yanqaqa llapaykuta kachawaykuchu, iskay waranqa otaq kinsa waranqapas Hai llaqtata hap'iqqa richunku. Ama llaqtantin runataqa kachawaykuchu, pisillan chay llaqtamanta hark'apakamuqqa kasqaku, nispa. 4Hinan Hai llaqtaman kinsa waranqa hina qharikunalla seqaykurqanku. Hai runakunataq ichaqa paykunata atiparqospa qatirimurqanku. 5Llaqta punkumantapacha rumi horqonakama qatishaspan, ura qhatapi kinsa chunka soqtayoq Israel runakunata wañurachirqanku. Chayraykun Israel runakunaq kallpanqa pasaqta chiriyarqan. 6Chaymi Josueqa Israel kurak taytakunantin llakikuymanta p'achankuta llik'ikurqanku, umankumanpas ñut'u hallp'awan hach'ikurqanku. Hinaspataq Señor Diospa arcan qayllapi pampakama k'umuykukuspa, chaypi qhepakurqanku ch'isiyanankama. 7Josuetaq nirqan: –¡Ay! Apu Señor Diosníy, ¿imapaqraqmi Jordán mayutaqa kay llaqtaykita chimpachimuwarqankiku? ¿Amor runakunaq hap'isqan kanaykupaqchu hamurqayku? ¿Paykunaq thunisqan rikukunaykupaqchu hamurqayku? ¡Aswanchá Jordán mayuq chimpallanpiraq kamushaykuman karqan! 8¡Ay! Señor Diosníy, ¿kunanri ima nispataq rimarisaq Israel runakuna awqanmanta ayqerikapun chayri? 9Canaán suyupi tiyaq runakunaqa ayqerikapusqaykuta lliwchá yacharqonqaku, hinaspachá llapanku huñunarqokuspa ch'usaqta tukurqapuwanqaku. Qanri, chay hina kaqtin, ¿imanankitaq hatun sutiykimanta? nispa. 10Señor Diostaq nirqan: –¡Sayariy! ¿Imatan k'umurayashanki? 11Israel runakunan huchallikunku, paykunawan rimanakusqayta p'akispanku. Ch'usaqyachinapaq kaqmantan hoqarimunku, llullakunkuraqtaq, suwakusqankutapas kaqninku ukhumanmi pakarqonku. 12Chayraykun Israel runakunaqa awqankuwan churanakuyta mana atipunkuchu, aswanpas ayqerikapunku. Qankunapas ch'usaqyachinallapaqtaqmi kapushankichis, manachus ch'usaqyachinapaq kaqta kunan ch'usaqyachinkichis chayqa, manan ñoqaqa hayk'aqpas qankunawan kasaqchu. 13Sayariy, runakunata ch'uyanchamuy. Paykunata nimuy, Israelpa Señor Diosninmi nin: Israel runakuna, qankunan ch'usaqyachinapaq kaqkunata hoqarimurqankichis. Chaytachus qankunamanta mana llapantachu ch'usaqyachinkichis chayqa, manapunin awqaykichiswan churanakuytaqa atinkichischu. Chayrayku, paqarinpaq ch'uyanchakamuychis, nispa. 14Paqarinmi llapalla ayllu-ayllu hamunkichis, akllasqay ayllutaqmi chimpamuwanqa mirayninkuman hina t'aqa-t'aqa, akllasqay t'aqataqmi chimpamuwanqa familia-familia, akllasqay familiataqmi chimpamuwanqa ch'ulla-ch'ullamanta qharikuna. 15Chay qharikunamanta mayqentachus huchachasaq chaymi kanasqa kapunqa llapan familiantin, kaqninkunantin, ñoqawan rimanakusqata mana hunt'aspa Israelpi millay p'enqayta ruwasqanmanta, nispa. 16Qhepantin paqartaq tutallamanta sayarispa, Josueqa runakunata huñuchimurqan ayllu-ayllu t'aqasqata, chaymantataqmi Señor Diosqa Judá aylluta akllarqan. 17Hinan Josueqa Judá ayllu runakunata kamachirqan mirayninkuman hina t'aqa-t'aqata reqsichinanpaq, chaymantataqmi Zera nisqa t'aqa akllasqa karqan, chay t'aqamantataq Zabdi familia akllasqa karqan. 18Zabdiq wawankunañataq ch'ulla-ch'ullamanta chimparqanku, chaypitaq Carmiq churin Ahán hap'isqa karqan. Carmiq taytanmi karqan Zabdi, Zabdiq taytantaq Judá ayllumanta Zera. 19Hinaqtinmi Josueqa Ahanta nirqan: –Wawalláy, Israelpa Diosnin Señorta hatunchay, ama pakaykuspa sut'illanta ima ruwasqaykitapas willaykuway, nispa. 20Chaymi Ahanqa willakurqan: –Arí, cheqaqtapunin Israelpa Diosnin Señor contra huchallikurqani. 21Jericó llaqtamanta hoqarimusqaykupin rikurqani Babiloniamanta huk sumaq capata, iskay kilo kurak qolqeta, kuskan kilo kurak wask'a qoritawan. Chaykunan sonqoyta suwarqowarqan, chaymi aparikamurqani, chaykunatan karpay ukhuman p'ampaykurqani, qolqetaqmi chaykunaq pachanpiraq kashan, nispa. 22Josuetaq Ahanpa karpanman runakunata kacharqan, paykunataq tarirqamurqanku llapan pakasqa kaqkunata, qolqetataq aswan ukhunpi. 23Hoqarispataq Josueman Israel runakunamanwan aparqanku, chaytataq Señor Diospa ñawpaqenman churaykurqanku. 24Ahantataq Llakikuy Wayq'oman pusarqanku, llapan wawankunantinta, hinallataq wakankunantinta, asnonkunantinta, ovejankunantinta, karpantapas, lliw kaqninkunatapas, kaqllataq chay qolqeta, capata, wask'a qoritapas apallarqankutaq. 25Hinan Josueqa nirqan: –¿Imanaqtinmi kay hatun llakiman churaykuwankiku? Kunanmi Señor Diosqa hatun llakiwan muchuchisunki, nispa. Chayta niykuqtinmi llapan Israel runakunaqa rumiwan ch'aqespa Ahanta wañuchirqanku, chaymantataq tukuy imaymanankunatawan kanaykurqanku. 26Chay patamantaq askha rumiwan tawqaykurqanku, chaymantapachan chay rumi tawqasqaqa hinalla kapurqan. Chayraykutaqmi chay cheqasta suticharqanku Llakikuy Wayq'o nispa. Chayraqmi Señor Diosqa Israel contra manaña phiñakurqanchu.

will be added

X\