1 Llapallan runakuna mayuta chimpaqtinku hinan, Señor Diosqa Josueta nirqan: 2 –Sapanka ayllumanta huk qharita akllaychis. 3 Hinaspan paykunata kamachinki sacerdotekunaq sayasqan Jordán mayu chawpimanta chunka iskayniyoq rumikunata horqomunankupaq. Chaytan kunan tuta apanqaku maypichus puñunkichis chay cheqasman churanankupaq, nispa. 4 Chaymi Josueqa chunka iskayniyoq akllasqan runakunata waqyaspa 5 nirqan: –Mayu chawpiman kutiykuychis Diosniykichis Señor Diospa arcanpa kashasqanman. Sapankaykichistaq chay cheqasmanta huk rumitakama rikraykichispi aparikamunkichis, Israelpa chunka iskayniyoq ayllunpa kasqanman hina. 6 Chay rumikunataqmi yuyarichisunkichis imatachus Señor Diospa ruwapusqasuykichista. Hinan qhepa p'unchayman wawaykichiskuna tapuspa: “¿Imapaqtaq chay tawqasqa rumikunari?” niqtinku, 7 willankichis: Sacerdotekuna Señor Diospa arcanta wantuspa Jordán mayuman haykuqtinkun mayuqa iskayman t'aqakurqan. Chayta yuyarinanchispaqmi chay rumikunataqa tawqarqanku, nispaykichis, nispa. 8 Paykunataq Josuepa kamachisqanta hina ruwarqanku, Jordán mayu chawpimanta chunka iskayniyoq rumikunata horqomurqanku, sapanka ayllupaq huk rumitakama. Chaytataq karpankuq kasqanman apaspa chaypi tawqarqanku, Señor Diospa Josueta nisqanman hina. 9 Josuepas Jordán mayu chawpipi chunka iskayniyoq rumita tawqallarqantaq Señor Diospa arcanta wantuq sacerdotekunaq sayasqan cheqaspi. Chay rumi tawqasqataq kashallaqpuni. 10 Rimanakuy arcata wantuq sacerdotekunan Jordán mayu chawpipi sayaykurqanku, Josuewan Señor Diospa kamachisqanta Israel runakunaq lliwta ruwanankama. Llapallanmi ruwakurqan Moisespa Josueman kamachisqanman hina. Runakunataq usqhayllata chimparqorqanku. 11 Llapanku mayuta chimparqoqtinkuñan sacerdotekunapas chimpamullarqankutaq Señor Diospa arcanta wantuykukuspa, hinaspataq runakunaq ñawpaqenman churaykurqanku. 12 Moisespa kamachisqanman hinan Rubén ayllu, Gad ayllu, Manasés kuskan ayllu maqanakuqkunapas wakin Israel runakunaq ñawpaqenta rispa maqanantinkama chimparqanku. 13 Llapankutaq yaqa tawa chunka waranqa hina Señor Diospa qayllanpi Jericó pampaman maqanakunankupaq chayarqanku. 14 Chay p'unchaymi Señor Diosqa Josueta hatuncharqan Israel runakunaq qayllanpi, chaymi paykunaqa wañukapunankama respetarqanku, imaynan Moisestapas respetarqanku hinata. 15 Chaymantataq Señor Diosqa Josueta nirqan: 16 –Kamachikuy simi qelqayoq arcata wantuq sacerdotekunata kamachiy mayumanta lloqsimunankupaq, nispa. 17 Josuetaq sacerdotekunata kamachirqan lloqsimunankupaq, 18 paykunataq mayumanta lloqsimuspanku, chayllaraq ch'aki pampaman saruykuqtinku hina, mayuqa kaqta suchuripurqan chimpa-chimpantinta llimp'asparaq. 19 Israel runakunaqa Jordán mayuta chimparqanku wata qallariy killaq chunkakaq p'unchayninpin, Gilgalpitaq karpakurqanku Jericó llaqtaq inti lloqsimuy ladonpi. 20 Chaypin Josueqa Jordanmanta apasqanku chunka iskayniyoq rumikunata tawqaykurqan, 21 Israel runakunatataq nirqan: –Qhepa p'unchayman wawaykichiskuna tapuspa: ¿Imapaqtaq chay rumikuna tawqasqari? niqtinkun, 22 qankunaqa paykunaman willankichis: Ñoqaykun Jordán mayuta ch'akita chimpamurqayku. 23 Diosniykichis Señor Diosmi mayuta ch'akichirqan chimpamunaykupaq, imaynan Puka Qochatapas ch'akichirqan chimpamunaykupaq hinata, nispaykichis. 24 Señor Diosmi chaykunata ruwarqan tukuy-atiyniyoq kasqanta kay pachantinpi lliw llaqtakuna yachanankupaq, hinallataq qankunapas Diosninchis Señor Diosllatapuni yupaychanaykichispaq, nispa.
