1 Qhepantin p'unchaymi tutallamanta Josueqa llapa Israel runakunantin Sitim pampamanta puririspa Jordán mayu pataman chayarqanku, manaraq chimpashaspankutaq chayllapiraq karpakurqanku. 2 Kinsa p'unchaymantataq umalli runakunaqa karpan-karpanta purimuspanku, 3 Israel runakunata kamachirqanku: Diosniykichis Señor Diospa rimanakuy arcanta Leví runa sacerdotekunaq apashasqanta rikurqospaykichismi, puririmunkichis maypichus kasqaykichismanta, hinaspan qhepanta rinkichis. 4 Qankunaqa manan chay ñanta rikunkichisraqchu, chayraykun paykuna pusasunkichis maynintachus rinaykichista. Rimanakuy arcamanmi ichaqa ama qayllankichischu, yaqa huk kilómetro hina qhepallanta rinkichis, nispa. 5 Chaymantataq Josueqa Israel runakunata nirqan: –Señor Diosmi paqarin qankunaq rikushasqaykichis imaymana musphanata ruwanqa, chayrayku ch'uyanchakuychis, nispa. 6 Hinallataq sacerdotekunata kamachirqan: –Rimanakuy arcata apaychis, hinaspa llaqtaq ñawpaqenta riychis, nispa. Paykunataq arcata wanturikuspa runakunaq ñawpaqenta rirqanku. 7 Chaymantataq Señor Diosqa Josueta nirqan: –Kunanmantapachan Israel runakunawan mentachisqayki, chay hinapin paykuna yachanqaku qanwan kashasqayta imaynan Moiseswanpas karqani hinata. 8 Hinallataq rimanakuy arca wantuq sacerdotekunata kamachinki Jordán mayu unu pataman chayaspanku, mayu ukhupi sayaykunankupaq, nispa. 9 Chaymantataq Josueqa Israel runakunata nirqan: –Qayllaykamuychis, Diosniykichis Señor Diospa nisqantan willasqaykichis. 10 Kunanmi yachankichis Kawsaq Diospuni qankuna chawpipi kashasqanta, yachallankichistaq suyuman haykusqaykichisman hina Canaán runakunata, Het runakunata, Hev runakunata, Ferez runakunata, Gerges runakunata, Amor runakunata, Jebus runakunata Diospa wikch'usqanta. 11 Teqsimuyuntin Kamachiq Señor Diospa rimanakuy arcanmi qankunaq ñawpaqeykichista Jordán mayuta chimpanqa. 12 Kunanqa chunka iskayniyoq qharikunata akllaychis huktakama Israelpi sapanka ayllumanta. 13 Teqsimuyuntin Kamachiq Señor Diospa rimanakuy arcanta wantuq sacerdotekuna Jordán mayu unuman saruykuqtinku hinan, mayuqa iskayman t'aqarikunqa. Wichaymanta phawamuq unun kasqanpi qochachakunqa, urayman phawaqñataqmi ch'akipunqa, nispa. 14 Israel runakunan karpankumanta puririrqanku Jordán mayuta chinpanankupaq. Rimanakuy arcata wantuq sacerdotekunataq paykunaq ñawpaqenta rirqanku. 15 Mayu chimpay yuyaykusqanku p'unchaykunaqa cosecha tiempon karqan, sapa watallapunitaq chay tiempopi Jordán mayuqa patantintaraq llimp'aspa suchuykamuq. Rimanakuy arcata wantuq sacerdotekuna mayuta saruykuqtinkutaq, 16 wichaymanta phawamuq unuqa kasqanpi takyarparispa, paykunaq chimpanan cheqasmanta karupiraq qochachaykukurqan Saretán qaylla Adam llaqtakama. Arabá qheswa wayq'onta Kachi Qochaman haykuq unutaq ch'akirqapurqan. Hinan chayninta Israel runakunaqa Jericó cheqasman chimparqanku. 17 Paykunaqa allin ch'aki hallp'ata hinan Jordán mayuta chimparqanku, Señor Diospa rimanakuy arcanta wantuq sacerdotekunataq chaykama Jordán mayu ukhupi allin ch'aki hallp'api hina sayasharqanku.
