Josué 24

1Josuemi llapan Israel ayllukunata Shehempi huñuykurqan, hinaspan kurak taytakunata, umalli runakunata, juezkunata, oficialkunatawan waqyarqan, hinan Diospa ñawpaqenman chimparqanku. 2Chaypitaq Josueqa llapan llaqtantinta nirqan: –Israelpa Diosnin Señormi nin: Ñawpa p'unchaymi Abrahampa, Nacorpa taytan Taré wak dioskunata yupaychaspa Eufrates mayu patapi tiyarqan. 3Chay Eufrates mayu patapi tiyashaqtinkun Abrahamta pusamurqani, hinaspan Canaán suyuntinta purichirqani. Askha wawatataq payman qorqani, ñawpaqtaqa Isaacllataraq. 4Isaacmantaq iskay wawata qorqani, Jacobta Esautawan. Esaumanmi Seir orqo-orqota qorqani, Jacobtaq wawankunapiwan Egipto suyuta ripurqan. 5Hinan Moisesta Aarontawan chayman kacharqani, chaypitaqmi Egipto runakunata wañurachirqani qankunata horqomunaykama. 6Ñawpa taytaykichista Egiptomanta horqomuqtiymi, Egipto runakunaqa qhepankuta qatipamurqanku carretakunantin caballokunantin Puka Qochakama. 7Chaypitaqmi Israel runakuna waqyakamuwarqanku, chaymi ñoqaqa Egipto runakunaq ñawpaqenman, Israel runakunaq qhepanman laqha tutayaqta kachaykamurqani, hinaspan Puka Qochawan Egipto runakunata millp'uchirqani, qankuna kikiykichismi chay ruwasqaykunataqa yacharqankichis. Chaymantataq unaytapuni ch'inneqpi tiyarqankichis. 8Ch'inneqmantataq Amor runakunaq hallp'anman pusamurqaykichis, Jordán mayu inti lloqsimuy ladoman. Paykunan sayarimurqanku qankunawan maqanakunanpaq, ñoqataq ichaqa qankunaq makiykichisman hap'iykachirqaykichis, qankunataq atipaspa hallp'ankutapas hap'ikapurqankichis. 9Chaymantapas, Moab suyu rey Ziporpa churin Balacmi sayarimullarqantaq qankunawan maqanakuq. Balacqa Beorpa churin Balaamtan maskhaqta kachamurqan qankunata ñakachinanpaq. 10Ñoqataq ichaqa Balaamwan mana ñakachirqaykichischu, aswanmi payqa samincharqasunkichis. Ahinapin qankunata qespichirqaykichis. 11Chaymantan qankunaqa Jordán mayuta chimpaspa Jericokama chayarqankichis. Chay llaqtapi tiyaqkunan, Amor runakuna, Ferez runakuna, Canaán runakuna, Het runakuna, Gerges runakuna, Hev runakuna, Jebus runakunapiwan qankunawan maqanakurqanku, ñoqataq ichaqa qankunawan atipachirqaykichis. 12Amor runakunaq iskaynin reynintaqa manan espadaykichiswanpaschu p'eqtaykichiswanpaschu atiparqankichis, aswanmi ñoqaqa haykusqaykichisman hina paykunata q'aqcharqani. Chaymi paykunaqa ayqekapurqanku, manaraq qankuna chayamushaqtiykichis. 13Ñoqataq qoykurqaykichis mana llank'asqaykichis chakrakunata, mana perqakusqaykichis llaqtakunatawan. Kunantaq chaypi tiyakushankichis, mikhushankichis mana qankunaq plantasqaykichis uvastapas aceitunastapas, nispa. 14Kunanqa Señor Diosta manchakuychis hinaspa yupaychaychis, cheqaq hunt'aq sonqowan payta servispa. T'aqakuychistaq ñawpa taytaykichiskunaq Eufrates mayu patapi, Egipto suyupi yupaychasqanku wak dioskunamanta, hinaspa Señor Diosllataña yupaychaychis. 15Manataqchus Señor Diospa kamachin ruwayta munankichis chayqa, kunanpacha akllakuychis mayqentachus servinaykichista. ¿Icha Eufrates mayu patapi ñawpa taytaykichispa servisqan dioskunatachu, icha kay hallp'api tiyaq Amor runakunaq diosnintataqchu servinkichis? Ñoqaqa familiantinmi Señor Diosllatapuni servisaqku, nispa. 16Chaymi llaqtantin runakuna nirqanku: –¡Ñoqaykuqa manan hayk'aqpas Señor Dios serviytaqa saqeykumanchu wak dioskunata servinaykupaqqa! 17Egiptopi kamachi kashaqtinchisqa, Señor Diospunin ñawpa taytanchiskunatapas ñoqanchistapas horqomuwarqanchis. Paypunin imaymana musphanakunata qhawashaqtinchis ruwarqan. Askha llaqtakunaq chawpin ñanninta purimushaqtinchispas, paypunin waqaychaykuwarqanchis. 18Paymi lliw llaqtakunata ñawpaqenchismanta wikch'urqan, kaypi tiyaq Amor runakunatapas. Lliw chaykuna ruwapuwasqanchismantaqa Señor Diostapunin servisaqku, paypunitaqmi Diosninchisqa kanpas, nispa. 19Josuetaq ichaqa nirqan: –Qankunaqa manan Señor Dios serviyta atiwaqchischu, payqa ch'uya Diosmi, payqa ancha sienteq Diosmi, payqa huchaykichistapas mana kasukusqaykichistapas manan pampachanqachu. 20Qankunataqchus wak dioskunata yupaychaspa payta saqerparipunkichis chayqa, Señor Diosmi contraykichispi sayarispa ñak'arichisunkichis. Hinaña askha allinkunata ruwapurqasunkichis chaypas, pasaqtan tukupusunkichis, nispa. 21Llaqta runataq kutichirqan: –Manan chayqa kanqachu, ñoqaykuqa Señor Diosllatapunin servikusaqku, nispa. 22Hinan Josueqa nirqan: –Qankuna kikiykichismi Señor Diosllatapuni servinaykichispaq akllakusqaykichismanta testigokuna kankichis, nispa. Paykunataq nirqanku: –Arí, ñoqaykupunin testigokunaqa kayku, nispa. 23Josuetaq nirqan: –Chhaynaqa, qankuna ukhupi kaq dioskunata wikch'uychis, hinaspataq tukuy sonqoykichiswan Israelpa Diosnin Señorman kutirikapuychis, nispa. 24Llapa runakunataq kutichirqanku: –Ñoqaykuqa Señor Diosllatapunin servisaqku, ima niwasqankutapas ruwasaqkun, nispa. 25Chay p'unchaypachan Josueqa llapa runawan Shehempi rimanakurqan, chaypitaq paykunapaq kamachikuy simikunata churarqan. 26Chaykunatataqmi Diospa kamachikuy qelqanman qelqarqan. Chaymantataq hatun rumita hoqarispa Señor Dios yupaychana cheqaspi kaq encina sach'a chakipi churaykurqan. 27Hinaspan llapa runakunata niykurqan: –Kay rumin contraykichispi testigo kanqa, paymi uyarirqan Señor Diospa lliw rimaykuwasqanchista. Chay hinaqa, kay rumin contraykichispi testigo kanqa Diosta ama wasanchanaykichispaq, nispa. 28Chaymantataq Josueqa sapankankuta llaqtankuman kachapurqan. 29Chaykuna qhepatataq Señor Diospa kamachin Numpa churin Josueqa wañukapurqan, pachak chunkayoq watanpi kashaspa. 30Gaas orqoq wichaynin Efraín orqo-orqopi Timnat-sera hallp'anpin p'ampapurqanku. 31Israel runakunaqa Josuepa kawsanankaman Señor Diosta servirqanku, hinallataq Señor Diospa Israel runakunapaq imaymana ruwasqanta rikuq kurak taytakunaq kawsanankama. 32Egiptomanta Israel runakunaq apamusqanku Josepa tullunkunatan Shehempi p'ampapurqanku, Jacobpa pachak qolqewan Shehempa taytan Hamorpa churinkunamanta rantisqan hallp'api. Chay hallp'aqa Josepa mirayninpan kapurqan. 33Aaronpa churin Eleazar wañukapuqtintaq, Efraín orqo-orqopi churin Fineesman qosqanku moqopi p'ampapurqanku.

will be added

X\