Josué 23

1Askha watakunañan pasasharqan, Señor Diospa Israel runakunata awqankumanta samachisqan. Hinan Josueqa sinchi machuña kaspa 2llapan Israel runakunata, kurak taytakunantinta, umallikunantinta, juezkunantinta, oficialkunantinta waqyachispa nirqan: –Ñoqaqa sinchitañan machuyaykapushani. 3Qankunaqa lliwtan rikurqankichis Diosninchis Señor Diospa ñoqanchista amachaspa chay llaqtakunata imaymana ruwasqanta, paymi ñoqanchisrayku maqanakurqan. 4Ñoqan aylluykichisman lliw hallp'akunata rakirqani inti lloqsimuy ladopi Jordán mayumanta inti haykuy ladopi lamar-qochakama. Ñoqan rakirqani llapan hap'isqa kaq hallp'akunata manaraq hap'isqa kaq hallp'akunatapas. 5Señor Diosmi wikch'unqa chay hallp'api tiyashaqkunata, qankunataqmi hallp'ankuta hap'ikapunkichis, Diosninchis Señor Diospa niwasqanchisman hina. 6Allintapuni sayaychis Moisespa kamachikuy qelqanta llapantapuni hunt'anaykichispaq, ama pañamanpas lloq'emanpas t'aqakuspa. 7Aman qankuna ukhupi tiyaq wak runakunawanpas mich'ukunkichischu, aman diosninkutapas yupaychankichischu, aman kasunkichischu, amapunin sutinkutapas rimarinkichischu, amallataq sutinkupipas jurankichischu. 8Aswanpas Diosninchis Señor Diosllamanpunin k'askakunkichis, imaynan kaykama ruwashankichis hinallatapuni. 9Señor Diosmi haykusqaykichisman hina ñawpaqeykichismanta llapan kallpasapa hatuchaq llaqtakunata wikch'urqan, manataq kunankama pillapas qankunawan churanakuyta atinchu. 10Qankunaqa huk runallaraqmi waranqa runata qatirirqankichis, Diosninchis Señor Diospa prometewasqanchisman hina ñoqanchismanta maqanakusqanrayku. 11Kunanqa, anchatapuni cuidakuychis, Diosninchis Señor Diosta munakunaykichispaq. 12Qankunataqchus Señor Diosmanta t'aqarikuspa qankuna ukhupi tiyaqkunawan mich'ukuspa casarakapunkichis chayqa, 13allinta yachakuychis, Diosninchis Señor Diosqa manan wikch'unqachu chay runakunata qankuna ukhumanta, aswanmi chay runakunata Diosqa tukuchinqa huk toqllata, huk llikata hina chaypi urmanaykichispaq. Chay runakunan qankunata nanachisunkichis hasut'i hina, ñawiykichispi khiska hina, Señor Diospa qosqasuykichis chay sumaq hallp'api llapaykichis tukukunaykichiskama. 14Ñoqaqa wañukapusaqñan, ichaqa ñawpaqtaraqmi munani qankuna tukuy alma, tukuy sonqo Señor Diospa sumaq nisqasuykichista llapanta hunt'asqanta reqsikunaykichista, payqa llapantapunin rimarisqantaqa hunt'arqan. 15Chhaynaqa, imaynan Señor Diosqa sumaq nisqankunata lliwta hunt'arqan, chay hinallataqmi qankunaman chayachimullanqataq imaymana rikch'aq llakikuykunata, kay sumaq qosqasuykichis hallp'api llapaykichis wañunaykichiskama. 16Paywan rimanakusqaykichista mana hunt'aspa wak dioskunata yupaychankichis chayqa, Señor Diosmi qankunapaq phiñakapunqa, kay sumaq qosqasuykichis hallp'amantapas llapaykichistan picharparisunkichis, nispa.

will be added

X\