Josué 20

1Señor Diostaq Josueta nirqan: 2–Israel runakunata niy: Pakakunapaq llaqtakunata akllaychis Moisesta kamachisqayman hina. 3Pillapas mana yuyaypichu runamasinta qonqaylla wañurqachinman chayqa, chay llaqtakunamanta hukninmanmi ayqekunman, wañuqpa ayllunkunaq vengakunanmanta pakakamunanpaq. 4Pipas pakakunanpaq chay llaqtakunaman ayqekuqqa, chay llaqta punkuman chayaspanmi, lliwta chay llaqtapi kurak taytakunaman willakunqa. Hinan paykunaqa haykuchinqaku, huk wasita qospataq chaypi payta tiyachinqaku. 5Wañuqpa aylluntaqchus vengakunanpaq maskhamunqa chayqa, llaqtapi kurak taytakunan pakakuq runataqa mana hap'iykuchinqachu, payqa mana yuyaykuspapunichu manallataq cheqnikuspapaschu wañuchisqanrayku. 6Chay pakakuq runataq ichaqa, chay llaqtapi llapan kurak taytakunaq ñawpaqenpi chaninchasqa kanankama pakakunqa, chaypacha kashaq uma sacerdoteq wañukapunankama. Chaykuna qhepataqa chay pakakuq runaqa wasinman kutipuyta atinmi, maymantachus ayqekamusqan llaqtamanwan, nispa. 7Hinan Israel runakunaqa kay llaqtakunata pakakunapaq akllarqanku: Galileapi Neftalí orqo-orqopi Cedes llaqtata, Efraín orqo-orqopi Shehem llaqtata, Judá orqo-orqopi Hebrón sutiyoq Quiriat-arba llaqtatawan. 8Jordán mayu inti lloqsimuy ladopitaq akllarqanku Jericó inti lloqsimuy lado ch'inneq pata pampapi Rubén ayllupi Beser llaqtata, Gad ayllumantataq Galaad suyupi Ramot llaqtata, Manasés ayllumantataq Basanpi Golán llaqtatawan. 9Chay hinaqa, Israel runakunapaq paykunawan tiyaq wak llaqtayoqkunapaqwan pakakunanpaqmi chay llaqtakunaqa karqan. Mana yuyaypichu runamasinta wañuchiqqa chaykunapi pakakuyta atiqmi, chay hinapin wañuqpa ayllun vengakunanpaq maskhaqpas mana wañuchiyta atiqchu, manaraq llaqta kurak taytakunaq chaninchasqan kashaqtinqa.

will be added

X\