Josué 2

1Chaymantataq Nunpa churin Josueqa Sitim pampamanta iskay qhamiyaqta pakallapi kachaspa nirqan: –Riychis, chay suyuta qhawararqamuychis, aswantaqa Jericó llaqtata, nispa. Paykunataq rispanku, Jericopi rabona Rahab warmiq wasinman haykuykurqanku, chaypitaq qorpachakurqanku. 2Chaytan Jericó llaqta reyman willarqamurqanku: –Israel runakunan llaqtanchis qhawaraq hamusqaku, nispa. 3Chaymi reyqa Rahabman kachaspa nichimurqan: –Wasiykiman haykumuq qharikunata horqomuy, paykunaqa llaqtanchis hallp'anchis qhawaraqmi hamunku, nispa. 4Warmitaq ichaqa iskaynin qhamiyaq qharikunata pakarqamusqaña, hinaspa nirqan: –Arí, chay runakunaqa hamusqakun wasiyta, ichaqa manan yacharqanichu maymantachus kasqankuta. 5Llaqta punku wisq'ana horastan tutayarqoshaqtinña chay runakunaqa kaymanta lloqsirqapunku, manataqmi yachanichu maymanchus risqankuta. Qhepantayá phawaychis, tariparqonkichisraqmi, nispa. 6Warmitaq ichaqa chay iskaynin qhamiyaqkunata wasi pataman wicharqachispa pakarqamurqan ch'akinanpaq churasqa lino montón ukhuman. 7Hinan reypa runankunaqa maskhaq puririrqanku Jordán mayu chimpanakama. Qatipaq lloqsiqtinku hinataq, llaqta punkutaqa wisq'apurqanku. 8Rahabtaq wasi pataman seqarqorqan pakasqan runakuna manaraq puñushaqtin, 9hinaspa nirqan: –Ñoqaqa yachanin kay hallp'ata Señor Dios qopusqasuykichista, chaymi ñoqaykuqa sinchita manchakushaykiku, llapan kay suyupi tiyaqkunan qankuna hawa pasaqllataña khatatataykushayku. 10Uyarirqaykun qankuna Egiptomanta lloqsimushaqtiykichis Puka Qochata chimpanaykichispaq Señor Diospa ch'akirqachisqanta. Yachallarqaykutaqmi Jordanpa chimpanpi Amor runakunaq iskaynin reyninta, Sehonta Ogtawan, wañuchisqaykichistapas. 11Chayta uyarirqospayku hinallaraqmi pasaqta mancharikurqayku, llaksakuymantan kallpaykupas chiriyapurqan. Diosniykichis Señor Diosqa hanaq pachapipas kay pachapipas Diosmi. 12Chayraykun ñoqa valekuykichis, Señor Diospa sutinpi juraspa niwaychis, ñoqata llapa familiaytawan khuyapayawanaykichispaq, imaynan ñoqapas sumaqta khuyapayarqaykichis hinata. Kunanqa imallatapas saqeykuwaychis hunt'aq runa kasqaykichista yachanaypaq. 13Chay hinaqa, amapuni wañuchiwankikuchu tayta-mamayta, turaykunata, ñañaykunata, paykunaq wawankunatawan, nispa. 14Paykunataq nirqanku: –Kay rimasqaykuta mana hunt'aqtiykuqa Señor Dios ñoqaykuta wañuchiwachunku. Qanpas amapunin ima ruwashasqaykutapas pimanpas rimarinkichu. Señor Dios kay hallp'ata qowaqtinkun ñoqaykuqa rimarisqaykuta hunt'aspa khuyapayasqaykiku, nispa. 15Rahabqa tiyarqan kikin llaqta perqa patapi ruwasqa wasipin, chaymi payqa wasi ventananta waskhawan warkuykuspa paykunata kacharparipurqan. 16Niykurqantaq: –Orqo-orqoman ripuychis ama maskhaqniykichiswan qonqay tupanaykichispaq. Kinsa p'unchaymi pakakunkichis paykuna kutimunankukama, chaymantañan ripunkichis, nispa. 17Qharikunataq payta nirqanku: –Qanpa jurachiwasqaykikutaqa hunt'asaqkupunin. 18Llaqtaman haykumushaqtiykun, lloqsipusqayku ventanaman kay yawar puka waskhata warkuykunki. Wasiykimantaq huñunki tayta-mamaykita, turaykikunata, ñañaykikunata, taytaykiq llapan ayllunkunatawan. 19Pillapas wasiykimanta lloqsirqamunqa chayqa, wañuchisqan kanqa, ñoqaykuqa manan ima huchayoqpaschu kasaqku. Qanwan kuska kashaqtataqchus imananqakupas chaymi ichaqa, ñoqaykuq huchayku kanqa. 20Imallatapas hamusqaykumanta rimayta ch'eqechinki chayqa, qanpa jurachiwasqaykikutaqa manañan hunt'anaykuñachu kanqa, nispa. 21Rahabtaq nirqan: –Arí, qankunaq nisqaykichis hinapuni kachun, nispa. Kacharparipuqtintaq qharikunaqa ripurqanku. Chaymantataq ventanaman yawar puka waskhata warkullarqanña. 22Iskaynin qhamiyaqkunataq orqo-orqoman rirqanku, chaypin kinsa p'unchay pakakamurqanku. Maskhaqkunataq hinantinta maskhaykurqanku, mana tarispankutaq Jericoman kaqta kutiykapurqanku. 23Hinan iskayninku orqo-orqomanta uraykamurqanku, Jordán mayuta chimpaspankutaq Josuepa kasqanman chayapurqanku. Paymantaq lliwta willaspa 24nirqanku: –Cheqaqtapunin Señor Diosqa llapan chay suyuta qowanchis, ñoqanchis hawan kikinpi tiyaqkunapas khuyaytaña manchakushanku, nispa.

will be added

X\