Josué 19

1Iskaykaq sorteasqa hallp'ataq Simeón aylluman mirayninkunaman hina qosqa karqan, chaytaqmi Judá aylluq hallp'an chawpipi karqan. 2Chaypin kay llaqtakuna karqan: Beerseba, Seba, Molada, 3Hazar-sual, Bala, Ezem, 4Eltolad, Betul, Horma, 5Siclag, Bet-marcabot, Hazar-susa, 6Bet-lebaot, Saruhempiwan, llapanpin chunka kinsayoq llaqta ayllukunantin karqan. 7Kallarqantaq Aín, Rimón, Eter, Asanpiwan ayllukunantin, 8hinallataq lliw ayllukuna Neguevpi Ramat nisqa Baalat-beer llaqtakama. Chay hallp'akunan rakisqa karqan Simeón aylluman mirayninkunaman hina. 9Judá aylluq hallp'anqa sinchi hatunmi paykunapaq karqan, chaymi Judá hallp'amanta wakinta Simeón aylluman qorqanku. 10Kinsakaq sorteasqa hallp'ataq Zabulón aylluman mirayninkunaman hina qosqa karqan. Chaymi hallp'anqa Saridkama chayarqan. 11Sarid llaqta inti haykuy ladopi qorpaqa Maralakaman aysakurqan, chaymantataq Dabesetman ayparqan, kaqllataq Jocneampa inti lloqsimuy ladopi mayumanpas. 12Sarid llaqta inti lloqsimuy ladopi qorpaqa Quislot-taborkama chayarqan, chaymantataq Daberatman rirqan, Daberatmantataq Jafiakama wicharqan. 13Chaymantapas qorpaqa aysakurqan inti lloqsimuy ladoman Gat-heferman Ita-cazinmanwan, Neanta muyumuspataq Rimonman chayarqan. 14Wichay lado qorpaqa muyumurqan Hanatonkama, chaymantataq wicharqan Jefte-el wayq'oman. 15Chay hallp'apin karqan Catat, Naalal, Simrón, Idala, Belén, huk llaqtakunapiwan, llapanpitaq chunka iskayniyoq llaqtakuna ayllukunantin karqan. 16Chay hallp'an llaqtakunantin lliw ayllukunantin ima Zabulón aylluman rakisqa karqan mirayninkunaman hina. 17Tawakaq sorteasqa hallp'ataq Isacar aylluman mirayninkunaman hina qosqa karqan. 18Chay hallp'api llaqtakunataq karqan: Jezreel, Quesulot, Sunem, 19Hafaraim, Sihón, Anaharat, 20Rabit, Quisión, Abez, 21Remet, En-ganim, En-hada, Bet-pasespiwan. 22Qorpataq ayparqan Taborman, Sahaziman, Bet-semesmanwan, Jordán mayupitaq tukukapurqan. Chaypitaq chunka soqtayoq llaqtakuna ayllukunantin karqan. 23Chay hallp'an llaqtakunantin ayllukunantin Isacar aylluman rakisqa karqan mirayninkunaman hina. 24Phisqakaq sorteasqa hallp'ataq Aser aylluman mirayninkunaman hina qosqa karqan. 25Chay hallp'api llaqtakunataq karqan: Helcat, Halí, Betén, Acsaf, 26Alamelec, Amad, Misealpiwan. Inti haykuy lado qorpaqa chayarqan Carmelo orqokama, Sihor-libnatakamapiwan. 27Inti lloqsimuy lado qorpataq wichay ladoman Bet-dagonkama rirqan, Zabulón aylluq hallp'anman Jefte-el wayq'omanwan aypaspa. Chaymantataq Bet-emecninta Neielnintawan pasaspa Cabulman, 28Hebronman, Rehobman, Hamonman, Canamanwan, Sidón hatun llaqtaman chayanankama. 29Chaymantataq qorpaqa q'ewirimurqan Ramá cheqasman, allichaq kallpachasqa Tiro llaqta ladoman, chaymantataq Hosa ladonta rispa lamar-qochaman lloqsirqan. Mahalebwan, Aczibwan, 30Umawan, Afecwan, Rehobpiwan yapakurqan iskay chunka iskayniyoq llaqtakuna llapa ayllukunantin. 31Chay hallp'an llaqtakunantin ayllukunantin Aser aylluman rakisqa karqan mirayninkunaman hina. 32Soqtakaq sorteasqa hallp'ataq Neftalí aylluman mirayninkunaman hina qosqa karqan. 33Qorpantaq Helefmanta, Saananimpi kaq encina sach'amantawan, Adami-necebninta, Jabneelnintawan, Lacumkama rispa Jordanman chayarqan. 34Inti haykuy lado qorpañataq rirqan Aznot-taborninta, chaymantataq Hucocninta, chay hinapin uray lado qorpanqa karqan Zabulón aylluq hallp'anwan, inti haykuy lado qorpataq Aser aylluq hallp'anwan, inti lloqsimuy lado qorpantaq Jordán mayuwan karqan. 35Chaypin allichaq kallpachasqa llaqtakuna karqan: Sidim, Zer, Hamat, Ragat, Cineret, 36Adama, Ramá, Hazor, 37Cedes, Edrei, En-hazor, 38Irón, Migdal-el, Horem, Bet-amat, Bet-semespiwan. Llapanpitaq chunka isqonniyoq llaqtakuna ayllukunantin karqan. 39Chay hallp'an llaqtakunantin ayllukunantin Neftalí aylluman rakisqa karqan mirayninkunaman hina. 40Qanchiskaq sorteasqa hallp'ataq Dan aylluman mirayninkunaman hina qosqa karqan. 41Chay hallp'api llaqtakunataq karqan: Zera, Estaol, Ir-semes, 42Saalabín, Ajalón, Jetla, 43Elón, Timnat, Ecrón, 44Elteque, Gibetón, Boalat, 45Jehud, Bene-berac, Gat-rimón, 46Mejarcón, Raconpiwan, chaymantapas Jope llaqtaq ñawpaqenpi kaq hallp'apiwan. 47Chay hallp'a paykunaman mana aypaqtintaq, Dan ayllu runakunaqa rirqanku Lesem llaqtata phawaykuq. Hinaspan chaypi lliw tiyaqkunata wañurachispa, llaqtata hap'ikapuspa kikinpi tiyakapurqanku. Taytankuq sutin Dan sutiwantaq suticharqanku. 48Chay hallp'an llaqtakunantin ayllukunantin Dan aylluman rakisqa karqan mirayninkunaman hina. 49Hallp'a rakinakuyta tukuspankutaq Israel runakunaqa, hallp'anku chawpipi Josueman tupaqnin hallp'ata qorqanku. 50Señor Diospa kamachikusqanman hinan Josueman mañakusqan hallp'ata qorqanku, Efraín orqo-orqopi Timnat-sera llaqtata. Hinan Josueqa wakmanta chay llaqtata perqachispa chaypi tiyakapurqan. 51Silopi Dios yupaychana karpaman haykunapin sacerdote Eleazarwan, Josuewan, llapan llaqta umalli runakunapiwan Señor Diospa ñawpaqenpi sorteaspa hallp'ata rakirqanku. Chay hinapin hallp'a rakiyta tukurqanku.

will be added

X\