1 Llapan suyu atipasqaña kashaqtinmi, lliw Israel ayllukunaqa Silopi huñuykukuspa Dios yupaychana karpata karparqanku. 2 Karqanraqmi Israel runakunamanta qanchis ayllu hallp'ankuta mana chaskiqkuna. 3 Chaymi Josueqa Israel runakunata nirqan: –¿Hayk'aqkaman suyankichis taytaykichispa Diosnin Señorpa qosqasuykichis hallp'ata hap'ikapunaykichispaq? 4 Akllaychis sapanka ayllumanta kinsa qharikunata, paykunatataq kachasaq llapan hallp'ata qhawamunankupaq. Hinan suyuntinta rispa tukuy rikusqankuta qelqamunqaku, kutimuspataq willawanqaku. 5 Chay hallp'atan qanchisman t'aqamunqaku, Judá aylluta uray ladoman saqerparispa, Josepa miraynintapas wichay ladoman saqerparispa. 6 Chay hallp'ata qanchisman t'aqarqarimuspataq qelqasqata apamuwanqaku, ñoqataq Diosninchis Señor Diospa qayllanpi sorteasaq. 7 Leví ayllumanmi ichaqa mana maypipas hallp'ata qonqakuchu, paykunaq herencianqa Señor Diospa sacerdoten kayninkun. Gad ayllupas, Rubén ayllupas, Manasespa kuskan ayllunpas hallp'ayoqñan kanku Jordán mayu inti lloqsimuy ladopi, chaytan Señor Diospa kamachin Moisesraq qorqan, nispa. 8 Hallp'a qhawaq riqkunataq puririnankupaq q'epichakurqanku, hinan Josueqa kamachirqan: –Riychis, llapan suyuta t'aqarqarimuychis. T'aqasqaykichistataq qelqamunkichis. Tukuspataq kayman kutimunkichis Señor Diospa qayllanpi sorteanaypaq, nispa. 9 Chay runakunataq puririrqanku suyuntinta muyumunankupaq, hinaspan qanchis t'aqaman suyuta t'aqamuspa qelqamurqanku. Chaymantan Josuepa kasqan Silopi karpa-karpaman kutimurqanku. 10 Chaypitaq Josueqa Señor Diospa qayllanpi sorteaspa, hallp'akunata Israel runakunaman rakiykapurqan. 11 Benjamín aylluq mirayninkunapaq sorteaqtinkutaq hallp'aqa tuparqan, Judá aylluq Josepa miraynin ayllukunaq chawpinpi. 12 Wichay ladon qorpataq qallarirqan Jordán mayumanta, chaymantataq wicharqan Jericó wichay lado qhatanta, chaymantataq qorpaqa orqo-orqonta inti haykuy ladoman rirqan, chaymantataq Bet-avenpa ch'inneqninman lloqsirqan. 13 Chaymantataq Betel nisqa Luz llaqtanta uray ladoman rirqan, chaymantataq uraykurqan Ura Bet-horonpa uran orqopi Atarot-adarkama. 14 Chaymantataq qorpaqa kutirirqan uray ladoman Bet-horonpa ñawpaqenpi orqoq wichay lado qhatanta Quiriat-jearim nisqa Quiriat-baalkama (chay llaqtaqa Judá aylluqmi karqan). Chaytaq inti haykuy qorpa karqan. 15 Uray lado qorpataq Quiriat-jearimmanta Neftoa pukyukama rirqan, 16 chaymantataq uraykurqan Ben-hinom wayq'oq ñawpaqenpi orqo chakikama (chay orqoqa Refaim wayq'oq wichay ladonpin karqan). Chaymantataq uraykurqan Jebusman seqamuna uray lado Ben-hinom wayq'onta En-rogelkama aysakamuspa. 17 Chaymantataq kutirirqan wichay ladoman, lloqsirqantaq Ensemesman, chaymantataq aysakurqan Adumín wichana qhataq ñawpaqenpi Gelilotkama, chaymanta uraykurqan Rubenpa churin nisqa Bohán Qaqakama. 18 Chaymantataq Jordán qheswa wayq'oq ñawpaqen qhataq wichay ladonta Jordán mayukama aysakurqan. 19 Bet-hoglaq wichay lado wasanta pasaspataq Kachi Qochaman uraykurqan, Jordán mayuq haykunan patapitaq tukukurqan. Chaytaq uray ladon qorpa karqan. 20 Jordán mayutaq inti lloqsimuy ladomanta qorpa karqan. Chaykunan karqan Benjamín aylluq mirayninkunaman qosqa hallp'akunaq qorpankuna. 21 Benjamín aylluq mirayninkunaman qosqa llaqtakunan kaykuna karqan: Jericó, Bet-hogla, Emec-casis, 22 Bet-arabá, Zemaraim, Betel, 23 Avim, Pará, Ofra, 24 Quefar-haamoni, Ofni, Gabapiwan, llapanpin chunka iskayniyoq llaqtakuna ayllukunantin karqan. 25 Chaymantapas Gabaón, Ramá, Beerot, 26 Mizpa, Cafira, Mozah, 27 Requem, Irpeel, Tarala, 28 Zela, Elef, Jebus (chayqa Jerusalenmi), Gabaa, Quiriat-jearimpiwan, llapanpi chunka tawayoq llaqtakuna ayllukunantin. Chay llaqtakunan rakisqa karqan Benjamín aylluman mirayninkunaman hina.
