1 Judá aylluq mirayninkunataq hallp'ata sorteopi chaskikurqanku, chay hallp'ataqmi urayman mast'arikurqan Edom suyu Zin ch'inneq pampawan qorpakama. 2 Kachi Qocha uray patamantapachan Judá ayllu hallp'aq qorpanqa qallarirqan, 3 chaymantataq qorpaqa Nina Q'ara nisqa Q'asa uranta seqarqan, Zin ch'inneq pampanta aysakuspataq Cades-barneaq uranman chayarqan. Chaymantapas Hezronninta rispa Adarkama seqarqan, chaymantataq Carcaman kutirirqan. 4 Carcamantataq Asmonkama rirqan, Asmonmantataq Egipto suyu qorpa mayuman tariparqan, chay mayu patantakamataq lamar-qochaman taripapurqan. Uray ladopi Judá ayllu hallp'aq qorpantaq chaykuna karqan. 5 Inti lloqsimuy lado qorpataq karqan Kachi Qocha aysakuy patantin Jordán mayuwan tinkuykama. Chay tinkuymantan wichay lado qorpaqa qallarirqan. 6 Bet-hoglanta wichaspataq Bet-arabaq altonta pasarqan, chaymantataq Rubenpa churin nisqa Bohán Qaqaman chayarqan. 7 Chaymantataq Llakikuy Wayq'omanta Debirman wicharqan, kutirimurqantaq Gilgal kinrayman, chay Gilgaltaq karqan wayq'o uray lado Adumín Q'asaq ñawpaqenpi. Chaymantapas qorpaqa pasarqan En-semes pukyu-pukyunta En-rogelkamaraq. 8 Chaymantataq pasarqan Jebusman seqamuna uray lado qhataq Ben-hinom wayq'onta (Jerusalenmi Jebusqa karqan). Chaymantataq Hinom wayq'oq inti haykuy ladonpi orqo k'awchinta pasarqan (chay orqon Refaim wayq'oq wichay ladonpi karqan). 9 Chay orqoq k'awchinmantataq Neftoa pukyuman kutirirqan, chaymantataq pasarqan Efrón orqo llaqtakunakama, chaymantataq kutirirqan Quiriat-jearim sutiyoq Baalaman. 10 Baalamantataq qorpaqa kutirirqan inti haykuy ladoman Seir orqokama, chaymantataq pasarqan Jearim orqo wichay lado qhata Quesalonninta, chaymantataq uraykurqan Bet-semeskama, Timnantataq pasarqan. 11 Qorpaqa aysakurqan Ecrón llaqta wichay ladopi orqo qhatanta, Sicrón ladoman kutirispataq Baala orqonta pasarqan, chaymantataq Jabneelninta lloqsispa lamar-qochaman tariparqan. 12 Inti haykuy lado qorpataq lamar-qocha aysakuy patantakama karqan. Judá ayllu hallp'aq qorpankunataq chaykuna karqan, mirayninkuman hina rakisqa. 13 Josuemi Señor Diospa kamachikusqanman hina Jefoneq churin Calebman Judá ayllupi hallp'ata qorqan. Chaymi payqa Hebrón nisqa Quiriat-arbata chaskirqan (Arbaqa Anacpa taytanmi karqan). 14 Chay llaqtamantan Calebqa qarqorqan Anacpa miraynin Sesaita, Ahimanta, Talmaitawan. 15 Chaymantataq wicharqan Debirpi tiyaqkunawan maqanakuq (Debirpa ñawpaq sutinmi Quiriat-sefer karqan). 16 Nirqantaq: Kay llaqtata maqanakuspa atipaqmanmi ususiy Acsata warminpaq qopusaq, nispa. 17 Hinan Calebpa wawqen Cen runaq churin Otonielqa Debir llaqtata atiparqapurqan, chaymi Calebqa ususin Acsata payman qopurqan. 18 Casarakusqanku p'unchaytaq Otonielqa Acsata tanqarqan taytan Calebmanta chakrapaq hallp'ata mañakunanta. Chaymantataq warmiqa asnomanta uraykurqan, hinan taytanqa payta tapuykurqan: –¿Imatan munashanki? nispa. 19 Paytaq nirqan: –Ama hinachu kay, huk qokuytawanpuni qoykuway. Ñataq qowankiña Neguevpi ch'aki pampata chayqa, qollawaytaq pukyukunatapas, nispa. Chaymi payqa altonpi uranpi pukyukunata ususinman qorqan. 20 Judá aylluq mirayninkunaman hina rakisqa hallp'akunataq kaykuna karqan: 21 Uray lado suyupi Edompa qorpan qaylla llaqtakuna: Cabseel, Edar, Jagur, 22 Cina, Dimona, Adada, 23 Cedes, Hazor, Itnán, 24 Zif, Telem, Bealot, 25 Hazor-hadata, Hazor nisqa Queriot, Hezrón, 26 Amam, Sema, Molada, 27 Hazar-gada, Hesmón, Bet-pelet, 28 Hazar-sual, Beerseba, Bizotía, 29 Baala, Iyim, Esem, 30 Eltolad, Quesil, Horma, 31 Siclag, Madmana, Sansana, 32 Lebaot, Silhim, Aín, Rimonpiwan. Llapanpitaq iskay chunka isqonniyoq llaqtakuna ayllukunantin karqan. 33 Shefela moqo-moqopi hap'isqanku llaqtakuna: Estaol, Zora, Asena, 34 Zanoa, En-ganim, Tapúa, Enam, 35 Jarmut, Adulam, Soco, Azeca, 36 Saaraim, Aditaim, Gedera, Gederotaimpiwan. Llapanpitaq chunka tawayoq llaqtakuna ayllukunantin karqan. 37 Hinallataq Zenán, Hadasa, Migdal-gad, 38 Dileán, Mizpa, Jocteel, 39 Laquis, Boscat, Eglón, 40 Cabón, Lahmam, Quitlis, 41 Gederot, Bet-dagón, Naama, Macedapiwan. Llapanpi chunka soqtayoq llaqtakuna ayllukunantin karqan. 42 Kaqllataq Libna, Eter, Asán, 43 Jifta, Asena, Nezib, 44 Keila, Aczib, Maresapiwan, llapanpi isqon llaqta ayllukunantin karqan. 45 Kaqllataq Ecronpas llaqtakunantin ayllukunantin, 46 hinallataq llapa Asdod qaylla llaqtakuna ayllukunantin Ecronmantapacha lamar-qochakama. 47 Kaqllataq Asdodpas llapa llaqtakunantin aylluntin ima, Gazapas llapa llaqtakunantin ayllukunallantintaq lamar-qocha patantakama Egipto suyu qorpa mayukamaraq karqan. 48 Orqo-orqopi hap'isqanku llaqtakunataq: Samir, Jatir, Soco, 49 Dana, Debir nisqa Quiriat-sana, 50 Anab, Estemoa, Anim, 51 Gosén, Holón, Gilopiwan, llapanpitaq chunka hukniyoq llaqtakuna ayllukunantin karqan. 52 Hinallataq Arab, Duma, Esán, 53 Janum, Bet-tapúa, Afeca, 54 Humta, Hebrón nisqa Quiriat-arba, Siorpiwan, llapanpi isqon llaqta ayllukunantin karqan. 55 Kaqllataq Maón, Carmel, Zif, Juta, 56 Jezreel, Jocdeam, Zanoa, 57 Caín, Gabaa, Timnapiwan, llapanpi chunka llaqta ayllukunantin karqan. 58 Chaymantapas Halhul, Bet-sur, Gedor, 59 Maarat, Bet-anot, Elteconpiwan, llapanpi soqta llaqta ayllukunantin karqan. 60 Quiriat-jearim nisqa Quiriat-baalpas Rabapas, lliw ayllukunantin karqan. 61 Ch'inneq pampapi hap'isqanku llaqtakunataq: Bet-arabá, Midín, Secaca, 62 Nibsán, Kachi Llaqta, En-gadipiwan, llapanpi soqta llaqta ayllukunantin karqan. 63 Jerusalenpi tiyaq Jebus runakunatataq ichaqa Judá ayllu runakunaqa mana qarqoyta atirqankuchu, chayraykun Jebus runakunaqa Judá ayllu runakunawan kuskallapuni tiyakapurqanku.
