Josué 14

1Sacerdote Eleazarwan, Josuewan, Israel ayllukunaq umallinkunawanmi Canaán suyuta Israel runakunaman rakirqanku. Kaytaqmi chaymanta willakuy. 2Paykunan chay hallp'akunata isqon ayllu kuskanniyoqman sorteaspa rakirqanku, Señor Diospa Moisesta kamachisqanman hina. 3Ñawpaqtañan Moisesqa Jordán mayu inti lloqsimuy lado hallp'akunata Rubén aylluman, Gad aylluman, Manasés aylluq kuskanninmanwan qorqan, Leví ayllumanmi ichaqa mana hallp'ata qorqanchu. 4(Josepa mirayninmi iskay aylluman tukurqan: Manasés aylluman, Efraín ayllumanwan). Leví ayllumanmi ichaqa mana hallp'ata qorqankuchu, aswanpas llaqtakunallata tiyanankupaq uywa michina campontinta. 5Ahinatan Israel runakunaqa hallp'ata rakinakurqanku Señor Diospa Moisesta kamachisqanman hina. 6Judá ayllu runakunataq Gilgalta rirqanku Josuewan parlaq, chaypitaq Jefoneq churin Cen runa Calebqa Josueta nirqan: –Qanqa yachankin Cades-barneapi Señor Diospa Moisesman ñoqanchismanta nisqanta. 7Tawa chunka watayoq kashaqtiymi, Moisesqa Cades-barneamanta hallp'a qhamiyaqta kachawarqan, kutimuspaypas ñoqaqa sut'intan willakurqani. 8Ñoqawan wakin riqkunan ichaqa llaqtata iskayrayachirqanku, ñoqataqmi Diosniy Señor Diospaq tukuy sonqo karqani. 9Chaymi Moisesqa juraspa niwarqan: Qanqa tukuy sonqopunin Señor Diospaq karqanki, chayraykun saruykusqayki hallp'aqa qanpaqpuni mirayniykipaqwan kapunqa, nispa. 10Israel runakuna ch'inneq pampapi kashallaqtinkuraqmi Señor Diosqa chayta Moisesman nirqan, chaymantapachataqmi tawa chunka phisqayoq watantin payqa kunankama kawsachikushallawanpuni. Kunanqa pusaq chunka phisqayoq watayoqñan kashani, 11ichaqa hallp'a qhamiyaqta kachashawarqan chay p'unchay kallpayoq hinallaraqmi kashani. Maqanakuypi tupanaypaqpas, ima ruwanaypaqwanpas allinraqmi kashani. 12Chayraykun valekuyki Señor Diospa prometewasqan orqo-orqota qowanaykipaq. Qanmi uyarirqanki Anac runakunaq allichachaq hatun llaqtakunayoq chaypi tiyashasqankuta. Ichapaschá Señor Diosqa yanapawanman, yanapawaqtinqa chay runakunata qarqosaqraqmi, Señor Diospa nisqanman hina, nispa. 13Chaymi Josueqa Calebta samincharqan, hinaspan Hebronta qopurqan paypaq mirayninpaqwan hallp'anku kapunanpaq. 14Hinan Hebrón orqo-orqoqa chay p'unchaymantapacha Jefoneq churin Calebpa, mirayninpaqwan kapurqan, Calebpa Israelpa Diosnin Señorpaq tukuy sonqo kawsasqanrayku. 15Hebronpa ñawpaq sutintaq kasqa Quiriat-arba, Arbaqa allin reqsisqan karqan Anac runakuna ukhupi. Chaymantaraqmi suyuntinpi maqanakuymanta samarirqanku.

will be added

X\