Josué 12

1Israel runakunan kay reykunata atiparqanku, hinaspan hallp'ankuta hap'ikapurqanku, chay hallp'ankutaqmi karqan Jordán mayuq inti lloqsimuy ladon hallp'akuna. Atipasqanku hallp'akunataq karqan uray lado Arnón mayumanta wichay lado Hermón orqokama, llapan Jordán qheswa wayq'ontin. 2Hukninmi karqan Hesbonpi tiyaq Amor runakunaq reynin Sehón. Paypa hallp'anmi karqan Aroer llaqta qaylla Arnón mayu patamanta Amón runakunaq hallp'an qorpapi Jaboc mayukama, chay hap'iypin karqan Galaadpa kuskan hallp'anpas. 3Jordán qheswa wayq'o inti lloqsimuy lado pampatapas kamachillarqantaq, Cineret qochamanta Kachi Qocha qayllapi Bet-jesimot llaqtakama, uray ladomantaq Pisga orqo chakikama. 4Hukkaq reytaq karqan Basán suyu rey Og, paymi karqan Refaim runakunamanta puchuqpa miraynin, tiyarqantaq Astarot llaqtapi Edrei llaqtapiwan. 5Paymi kamachirqan wichay ladopi Gesur suyu qorpamanta Maaca suyu qorpamantawan uray ladopi rey Sehonpa hallp'an qorpakama. Chay hallp'apin karqan Hermón orqo, Salca llaqta, llapan Basán suyu, Galaadpa kuskan hap'iyninpiwan. 6Moisesmi Israel runakunantin chay reykunata atiparqan, hinaspan Moisesqa chay hallp'ata rakirqan Rubén aylluman, Gad aylluman, Manasés aylluq kuskanninmanwan. 7Josueqa Israel runakunantinmi atiparqan llapan Jordán mayu inti haykuy ladopi tiyaq reykunata, Libanoq qheswanpi Baal-Gad llaqtamanta Seir qaylla Halac orqokama. Josueqa chay reykunaq hallp'antan Israel runakunaman tiyakapunankupaq rakirqan. 8Chay hallp'akunataq karqan llapan orqo-orqontin, Shefela moqo-moqontin, Jordán qheswa wayq'ontin, qhatakunantin, ch'inneq hallp'akunantin, Neguev hap'iynintin. Chay hallp'akunan kasqa Het runakunaq, Amor runakunaq, Canaán runakunaq, Ferez runakunaq, Hev runakunaq, Jebus runakunaq ima. 9Atipasqanku reykunan kaykuna karqan: Jericó llaqta rey, Betel qaylla Hai llaqta rey, 10Jerusalén llaqta rey, Hebrón llaqta rey, 11Jarmut llaqta rey, Laquis llaqta rey, 12Eglón llaqta rey, Gezer llaqta rey, 13Debir llaqta rey, Geder llaqta rey, 14Horma llaqta rey, Arad llaqta rey, 15Libna llaqta rey, Adulam llaqta rey, 16Maceda llaqta rey, Betel llaqta rey, 17Tapúa llaqta rey, Hefer llaqta rey, 18Afec llaqta rey, Sarón llaqta rey, 19Madón llaqta rey, Hazor llaqta rey, 20Simron-Merón llaqta rey, Acsaf llaqta rey, 21Taanac llaqta rey, Meguido llaqta rey, 22Cedes llaqta rey, Carmelopi Jocneam llaqta rey, 23Dor llaqta rey, Gilgalpi Goim llaqta rey, 24Tirsa llaqta rey ima. Llapanpitaq kinsa chunka hukniyoq reykuna karqan.

will be added

X\