Josué 10

1Jerusalén llaqta rey Adonisedectaq uyarirqan Josuepa Hai llaqtata reynintinta thunisqanta imaynatachus Jericó llaqtatapas reynintapas ruwasqanta. Hinallataq uyarirqan Gabaón runakuna Israel runakunawan rimanakuspa paykunawan tiyapushasqanta. 2Gabaonqa reyniyoq hatun llaqta sayaymi karqan, Hai llaqtamantapas aswan hatun, llapan qharikunapas kallpasapakaman karqan. Chaymi Adonisedecqa sinchita mancharikurqan, 3hinaspan payqa Hebrón llaqta rey Hohamman, Jarmut llaqta rey Pireamman, Laquis llaqta rey Jafiaman, Eglón llaqta rey Debirmanwan willachirqan: 4Hamuychis Gabaón runakunawan maqanakuypi yanapawayku, paykunaqa Josuewan Israel runakunapiwanmi rimanakusqakuña, nispa. 5Chaymi Amor runakunaq phisqantin reyninkuna Jerusalenmanta, Hebronmanta, Jarmutmanta, Laquismanta, Eglonmantawan soldadontinkama huñukurqanku. Gabaonta muyuykuspataq phawaykurqanku. 6Gilgal karpa-karpapi Josué kashaqtintaq, Gabaón runakunaqa payman willachimurqanku: Ama “manan” niwaykuchu, kay kamachiykikunata yanapaykuwayku. Orqo-orqopi tiyaq Amor runakunaq reyninkunan llapanku huñukuspa contraykupi sayarimunku. Usqhaylla hamuspayki hark'aykukuwayku, nispa. 7Hinan Josueqa Gilgalmanta llapan soldadokunantin kallpasapa qharikunantin seqaykurqan. 8Señor Diostaq Josueta nirqan: –Ama mancharikuychu, ñoqan qanman hap'iykachisqayki, manataqmi hukllapas qanwan churanakuyta atinqachu, nispa. 9Chaymi Josueqa Gilgalmanta lloqsirqan, illariqta purispataq qonqaylla Amor runakunata hap'irparirqan. 10Señor Diosmi chay runakunata Israel runakunaq ñawpaqenpi q'aqcharqan, chay hinapin Israel runakunaqa Gabaonpi askhatapuni wañurachirqan. Chaymantapas Bet-horón q'asanta qatiykachaspa Amor runakunata Azeca ñanpi Maceda ñanpi wañuchirqanku. 11Bet-horón q'asa qhatataña Amor runakuna Israel runakunamanta ayqeshaqtinkutaq, Señor Diosqa paykuna pataman Azeca ñannintinpi hatuchaq chikchita chikchichimurqan, chay chikchin Israel runakunaq wañuchisqanmantapas aswan askhataraq wañuchirqan. 12Señor Diosqa Israel runakunaq makinman Amor runakunata hap'iykachiqtinmi, Josueqa Señor Diosta rimapayarqan. Hinaspan Israel runakunaq ñawpaqenpi nirqan: –Inti, kaq Gabaonllapi sayaykuy. Killa, Ajalón wayq'ollapi takyaykuy, nispa. 13Hinan intipas killapas kasqallanpi sayarparirqan Israel runakuna awqankuta atipanankama. Intin kuskan cielopi sayarparirqan, huk p'unchay ch'isiyaqta hinapuni mana haykuspa. (Chaytaqa Chanin Runaq Qelqan nisqapin willakun). 14Chay p'unchaymi Señor Diosqa Israel runakunarayku maqanakurqan, runaq mañakusqantapas uyarispa. Manataq chay hina p'unchayqa hayk'aqpas karqanchu, ñawpaqpas qhepamanpas. 15Chaymantataq Israel runakunaqa Josuepiwan Gilgalpi karpankuman kutipurqanku. 16Phisqantin reykunataq ayqekuspa Maceda qaqa wasipi pakakurqanku. 17Chaymantataq Josueman willarqanku: –Phisqantin reytan Maceda qaqa wasipi pakakushaqta tarirqamuyku, nispanku. 18Hinan Josueqa kamachirqan: –Qaqa wasi punkuta wisq'arqoychis hatuchaq qaqakunata tanqaykuspa, runakunatataq qhawananpaq saqeykunkichis. 19Chaykamaqa aman chayllapichu qhepakunkichis, aswanpas awqanchistan qatinkichis, qhepa riq soldadokunamantaq phawaykunkichis. Llaqtankumanqa aman kutichinkichisñachu, Diosninchis Señor Diosmi makinchismanña hap'iykachipuwanchis, nispa. 20Josuemi Israel runakunantin askhatapuni wañuchispanku Amor runakunata pasaqtapuni atiparqanku, wakillanmi Amor runakunaqa ayqekuspa allin perqayoq llaqtankupi pakakurqanku. 21Israel soldadokunataq Josuepa kasqan Macedapi karpankuman allin qhali mana imanasqa kutipurqanku. Manataq pillapas Israel runakuna contra rimaqqa karqanchu. 22Hinan Josueqa nirqan: –Qaqa wasi punku wisq'asqa qaqakunata tanqaqaychis, hinaspa phisqantin reykunata pusamuwaychis, nispa. 23Chaymi Israel runakunaqa qaqa wasimanta Jerusalenpa, Hebronpa, Jarmutpa, Laquispa, Eglonpa reyninkunata horqomurqanku. 24Josuepa ñawpaqenman apamuqtinkutaq, Josueqa llapan Israel runakunata waqyarispa paywan riq soldado umallikunata nirqan: –Asuykamuychis, hinaspa kay reykunaq kunkanta saruychis, nispa. Paykunataq sarurqanku. 25Payqa nillarqantaq: –Ama mancharikuychischu, ama pisi kallpayaychischu, aswanpas kallpachakuychis, qhalichakuychis. Kikin Señor Diosmi llapan awqaykichista kay hinata ruwanqa, nispa. 26Chaymantataq Josueqa reykunata wañuchirqan, hinaspa sapankata mallkiman warkurqan, chaypin ch'isiyaqta warkurayarqanku. 27Inti haykuytataq Josueqa mallkimanta apaqachimurqan, hinaspa kaq pakakusqanku qaqa wasiman ayakunata wikch'uykachimurqan. Chaymantataq hatuchaq qaqakunawan punkuta wisq'achirqan, chaymi hinallapuni kashan. 28Chay kikin p'unchaymi Josueqa Maceda llaqtaman phawaykuspa runakunata wañuchirqan, llaqtatapas lliwta thunirqan. Manataq ch'ullallatapas kawsashaqtaqa saqerqanchu, imaynatan Jericó reyta ruwarqan, chay hinallatataqmi Maceda llaqta reytapas ruwarqan. 29Chaymantataq Josueqa Israel runakunawan Libna llaqtaman rispa maqanakurqan. 30Señor Diostaq chay llaqtata reynintinta paykunaman hap'iykachirqan, manataq ch'ullallatapas kawsashaqtaqa saqerqanchu. Imaynatan Jericó llaqtata reynintapas ruwarqan, chay hinallatataqmi Libna llaqtata reynintapas ruwarqan. 31Chaymantataq Josueqa Israel runakunantin Libnamanta Laquisman rispa llaqtata muyuykurqanku phawaykunankupaq. 32Qhepantin p'unchaytaq Señor Diosqa paykunaman Laquista hap'iykachirqan, chaymi Libnapi ruwasqankuta hina Israel runakunaqa llapan chaypi tiyaq runakunata espadawan wañuchirqanku. 33Gezer llaqta rey Horamtaq soldadonkunantin Laquis llaqtata yanapaq hamurqan, Josuetaq ichaqa atipaspa chay runakunatapas lliwta wañurachirqan. 34Laquismantataq Josueqa llapan Israel runakunantin Eglón llaqtaman rirqan, llaqtata muyuykuspataq phawaykurqan. 35Chay kikin p'unchaymi chay llaqtata hap'irqan, hinaspan llapan chaypi tiyaqkunata wañurachirqan Laquispi ruwasqanta hina. 36Eglonmantataq paykunaqa Hebrón llaqtaman wicharqanku, chaytapas phawaykullarqankutaq. 37Hap'ispankutaq reyta llapan runankunatawan espadawan wañurachirqanku, hinallataq huch'uy llaqtankunatapas hap'irqanku. Lliwtapunin thunirqanku Eglonpi ruwasqankuta hina. 38Chaymantapas Josueqa Israel runakunantin Debir llaqtamanñataq kutiykamurqanku, chaytapas phawaykullarqankutaq. 39Hap'irqorqankutaq reyninta huch'uy llaqtankunatawan, lliw chaypi tiyaqkunatataq espadawan wañurachirqanku, manataq huk runallapas kawsarqanchu. Imaynatan Hebronta Libnata reyninkunatapas ruwarqan, chay hinallatataqmi Debir llaqtata reynintapas ruwarqan. 40Chay hinatan Josueqa munaychakurqan orqo-orqo hap'iyta, Neguev hap'iyta, Shefela moqo-moqo hap'iyta, Shefelawan orqo-orqowan tupaypi hap'iytawan, chay hap'iykunaq reyninkunata atipaspan llapan kawsaqkunatapas ch'usaqyachipurqan, Israelpa Diosnin Señorpa kamachikusqanman hina. 41Josueqa lliwtan atiparqan Cades-barnea llaqtamanta Gaza llaqtakama, hinallataq Gosén hap'iytapas wichay lado Gabaón llaqtakama. 42Señor Diosmi Israel runakunata maqanakuyninkupi yanaparqan, chaymi Josueqa hukpaqkamallaña llapan reykunata atiparqan, hinaspan hallp'ankuta qechupurqan. 43Chaymantataq Josueqa llapan Israel runakunantin Gilgalpi karpankuman kutipurqanku.

will be added

X\