Jonás 4

1Nínive runakunata Dios mana muchuchisqanmi mana Jonaspa sonqonpaq hinachu karqan, chaymi phiñakurqan. 2Señor Diosmanta mañakuspataq nirqan: –Señor Diosníy, kay hinapuni kanantan llaqtaypi kashasparaq yacharqani. Chaymi Tarsisman ayqekapuyta munarqani, ñoqaqa yacharqanin sumaq sonqo, khuyapayakuq, mana usqhay phiñakuq Dios kasqaykita. Tukuy tiempo munakuqmi kanki, muchuchinayki kashaqtinpas huk-hinata yuyaykuqmi kanki. 3Kunanqa, Señor Diosníy, wañuchipuwanaykitan mañakuyki, aswan allinmi wañukapunay kawsashanaymantaqa, nispa. 4Señor Diostaq payta nirqan: –¿Allinchu qanpaq kay phiñakusqayki? nispa. 5Hinan Jonasqa llaqtamanta lloqsispa llaqtaq inti lloqsimuy ladonpi tiyarqan, chaypi ch'ukllakuspataq chay ukhupi llanthukurqan llaqtapi imachus kananta rikunanpaq. 6Señor Diostaq calabazata wiñachirqan, chay calabazan wiñarqan Jonaspa umanta llanthuykunanpaq, allinpi kananpaq. Hinaqtinmi Jonasqa chay calabazata qhawarispa anchatapuni kusikurqan. 7Paqarisnin p'unchay illarimuqtintaq Diosqa huk kuruta kachamurqan, hinan chay kuru calabazata k'uturqan, chaymi ch'akipurqan. 8Inti lloqsimuqtintaq Diosqa inti lloqsimuy ladomanta rupha wayrata wayrachimurqan, Jonaspa umanta inti kankaqtintaq yuyaynin chinkarqan, hinan wañuyta mañakurqan: –Aswan allinmi wañukapunay kawsashanaymantaqa, nispa. 9Diostaq ichaqa Jonasta nirqan: –¿Allinchu calabazaq ch'akisqanmanta sinchita phiñakusqayki? nispa. Paytaq kutichirqan: –¡Arí, sinchi phiñasqapunin wañusaqpas! nispa. 10Hinaqtinmi Señor Diosqa payta nirqan: –Calabazataqa manan qanchu plantarqanki, wiñachirqanki, huk tutallapin wiñamurqan hukkaq tutapitaq ch'akipurqan, qantaq chay calabazamanta llakikushanki. 11Chayri, ¿manachu ñoqaqa chay hatun Nínive llaqtata khuyapayayman? Chaypin pachak iskay chunka waranqa kurak runakuna kashan, paykunaqa manan reparankuchu allinkaqta mana allinkaqmanta, kallantaqmi askha animalkunapas, nispa.

will be added

X\