1 Señor Diosmi Jonasman huktawan rimaykurqan: 2 Phaway, hatun Nínive llaqtata riy, chaypitaq ñoqaq nisqayta willamuy, nispa. 3 Chaymi Jonasqa Señor Diosta kasukuspa puririrqan, hinaspan Niniveta rirqan. Niniveqa sinchi hatun llaqtan karqan, llaqtantinqa kinsa p'unchay puriymi karqan. 4 Jonasmi llaqta haykuyta qallarispa, p'unchay ch'isiyaqta purirqan: ¡Kay tawa chunka p'unchaymantan Nínive llaqta thunisqa kanqa! nispa, kunkayoqta waqyakuspa. 5 Nínive runakunataq Diospa siminta chaskispa ayunanankupaq yuyaykurqanku, hinan hatunpas huch'uypas llakikuymanta qhasqa p'achawan p'achakurqanku. 6 Nínive reytaq chay willakuyta yachaspa kamachikuy tiyananmanta sayarispa, p'achanta ch'utikuspa qhasqa p'achawan churakurqan, uspha patapitaq tiyaykurqan. 7 Hinaspan reyqa kayta willachirqan. Reymi kamachikuqninkunapiwan kamachikun: Ama pipas imatapas mikhuchunchu ukyachunpaschu, animalkunatapas, ovejakunatapas, wakakunatapas ama michichunkuchu, amallataq unutapas ukyachichunkuchu. 8 Aswanpas llakikuymanta qhasqa p'achawan llapalla p'achakuchunku, hinaspa Diosmanta anchatapuni waqyakuchunku, sapankataq millay kawsayninta mana chanin ruwasqankunatapas saqepuchun. 9 Ichapaschá Diosqa huk-hinata yuyaykapunman, hinaspa k'arak phiñakusqanpas tiyaykunman, chhaynapi mana wañunanchispaq, nispa. 10 Diostaq rikurqan chay ruwasqankuta, millay kawsasqanku saqepusqankutapas, hinan huk-hinata yuyaykapurqan, manañataq paykunata muchuchirqanñachu.
