Jonás 2

1Hinaqtinmi Jonasqa challwaq wiksanpi Señor Diosmanta mañakurqan: 2Llaki-phutiyniypin qan Señor Diosman waqyakamurqayki, qantaq uyariwarqanki. Wañuy-pacha sonqomantan waqyakamurqayki, qantaq kunkayta uyariwarqanki. 3Lamar-qochaq ukhu-ukhumanmi wikch'uykuwarqanki, phawaq unun millp'uykuwarqan. Llapa phullchiqechisqaykikunan, phoqchiqechisqaykikunan wasapawarqan. 4Hinan nirqani: ¡Qayllaykimantan wikch'usqa kani! Chaypas ch'uya wasiykitaqa rikusaqraqmi, nispa. 5Unun heq'epanaykama muyuykuwarqan, chinkay-chinkay ukhun millp'uykuwarqan, orqokunaq teqsinpi qocha yuyun umayman mayt'uykukurqan. 6Ukhu-pachaman chinkaykuqtiymi wiñaypaq wisq'aykuwarqan. Qanmi ichaqa, Señor Diosníy, Wañuy-pachamanta horqowarqanki. 7Wañunayña kashaqtinmi Señor Diosniyta yuyarirqayki, mañakusqaytaq ch'uya wasiykiman chayamurqasunki. 8Yanqa idolokunata yupaychaqkunaqa manan qan sonqoñachu kapunku. 9Ñoqan ichaqa yupaychasqayki, sacrificiota haywasqayki, prometekusqayta qopusqayki. ¡Qan Señor Diosllan qespichiytaqa atinki! nispa. 10Chaymantataq Señor Diosqa challwata kamachirqan, hinan Jonasta ch'aki pataman aqturparirqan.

will be added

X\