Juan 21

1Chaykuna qhepatan Jesusqa huktawan yachachisqankunaman Tiberias qocha cantopi kay hinata rikhurirqan. Chaypin huñunasqa kasharqanku: 2Simón Pedro, Mellizo Tomás, Galileapi kaq Caná llaqtamanta Natanael, Zebedeoq churinkuna, iskay yachachisqankunapiwan. 3Simón Pedron paykunata nirqan: –Challwaqmi rishani, nispa. Paykunataq nirqanku: –Ñoqaykupas qanwan risaqku, nispa. Rispataq boteman haykurqanku, ichaqa manan chay tuta huk challwallatapas hap'imurqankuchu. 4Paqarimushaqtinñataq Jesusqa qocha cantopi sayasharqan, yachachisqakunataq ichaqa Jesús kasqanta mana reqsirqankuchu. 5Chaymi Jesusqa paykunata nirqan: –Wawallaykuna, ¿manachu challwaykichis kan? nispa. Paykunataq: –Manan, nirqanku. 6Jesustaq paykunata nirqan: –Boteq paña ladonman llikata wikch'uykuychis, chaypin hap'inkichis, nispa. Chaymi wikch'uykurqanku, ichaqa manan horqomuyta atirqankuchu askha challwata hap'isqankurayku. 7Hinaqtinmi Jesuspa munasqan yachachisqaqa Pedrota nirqan: –¡Señor Jesustáq! nispa. Simón Pedrotaq Señor Jesús kasqanta uyarispa hina, q'ala wasalla kashasqanrayku p'achanwan churarqokuspa qochaman saltaykurqan. 8Wakin yachachisqakunataq botepi hamurqanku challwantin llikata aysamuspa, qocha cantomanqa manan karupiñachu kasharqanku, aswanpas pachak metro hinallapiñan. 9Qocha cantomanqa lloqsimuspataq nina sansa patapi rikurqanku huk challwata t'antatawan. 10Jesustaq paykunata nirqan: –Hap'imusqaykichis challwata apamuychis, nispa. 11Chaymi Simón Pedroqa boteman haykuspa llikata qocha cantoman aysamurqan, pachak phisqa chunka kinsayoq hatuchachaq challwakunantin hunt'ata, chay hinaña kashaqtinpas, manan llikaqa llik'ikurqanchu. 12Jesustaq paykunata nirqan: –Hamuychis, mikhuychis, nispa. Manataqmi mayqenninkupas tapurqankuchu: –¿Pitaq qanri kanki? nispaqa. Paykunaqa yacharqankun Señor Jesús kasqanta. 13Jesustaq paykunaman qayllaykuspa t'antata challwatawan paykunaman qorqan. 14Kaywanmi kinsa kutiña karqan Jesuspa wañusqanmanta kawsarimpuspa yachachisqankunaman rikhurisqan. 15Mikhuyta tukuqtinkuñan Jesusqa Simón Pedrota nirqan: –Juanpa churin Simón, ¿paykunamanta aswantachu munakuwanki? nispa. Paytaq nirqan: –Arí, Señor, qanta munakusqaytaqa yachankin, nispa. Hinan Jesusqa payta nirqan: –Corderoykunata michipuway, nispa. 16Huktawan payta nirqan: –Juanpa churin Simón, ¿munakuwankichu? nispa. Paytaq nirqan: –Arí, Señor, qanmi yachanki munakusqayta, nispa. Hinan payta nirqan: –Ovejaykunata michipuway, nispa. 17Kinsa kutipin payta nirqan: –Juanpa churin Simón, ¿munakuwankichu? nispa. Hinan Pedroqa kinsa kutipi “¿Munakuwankichu?” nisqanmanta llakirqokurqan, chaymi payta nirqan: –Señor, qanmi yachanki tukuy imaymanata, qanta munakusqaytapas yachallankitaqmi, nispa. Chaymi Jesusqa payta nirqan: –Ovejaykunata michipuway. 18Cheqaqtapunin niyki: Waynallaraq kaspaykiqa qan kikiyki p'achakuspan may munasqaykita riq kanki, yuyaqña kaspaykin ichaqa makiykikunata mast'arinki, hinan huk p'achachisunki, hinaspan mana riy munasqaykiman apasunki, nispa. 19(Chaytaqa nirqan imaynata wañuspachus Diosta hatunchananmanta entiendechispan). Chayta nispataq Pedrota: Qhepayta hamuy, nirqan. 20Hinan Pedroqa qhepanta qhawarispa Jesuspa munasqa yachachisqan hamushaqta rikurqan, paymi cenapi Jesusman k'iraykurisqa kashaspa tapuykurqan: –Señor, ¿pitaq hap'ichiqniykiri? nispa. 21Pedrotaq chay yachachisqata rikuspa Jesusta nirqan: –Señor, ¿imaynataq payri kanqa? nispa. 22Jesustaq payta nirqan: –Munaqtiyqa payqa kawsanmanmi kutimunaykamapas, ¿imataq qanmanqa qokusunki? Qanqa qhepayta hamuy, nispa. 23Hinaqtinmi iñiqkuna ukhupi wakin rimarqanku: –Chay yachachisqaqa manan wañunqachu, nispa. Jesusqa manan nirqanchu “manan wañunqachu” nispaqa, aswanpas nirqanmi: Munaqtiyqa payqa kawsanmanmi kutimunaykamapas, ¿imataq qanmanqa qokusunki? nispa. 24Chay yachachisqanqa kaykunaq cheqaq kasqantan willakurqanpas qelqarqanpas. Yachanchistaqmi willakusqanqa cheqaq kasqanta. 25Askharaqmi kashan Jesuspa tukuy imaymana ruwasqankunaqa, sapankachus qelqasqa kanman chayqa, yuyaykunin manan kay pachantinpas aypanmanchu chay qelqakunata churanapaq.

will be added

X\