1 Pascua Fiestapaq soqta p'unchayraq kashaqtinmi, Jesusqa kawsarichisqan Lazaroq llaqtan Betaniata rirqan. 2 Chaypin cenayta Jesuspaq wayk'urqanku. Martan servirqan, Lazarotaq Jesuswan mikhunanpaq tiyaqkunapiwan kuska tiyarqan. 3 Mariataq ancha chaniyoq huk botella nardo q'apaq hawina aceitewan Jesuspa chakinta hawiykurqan, hinaspan chukchanwan ch'akichirqan. Wasimantaqmi hawinaq sumaq q'apaynin hunt'aykurqan. 4 Hinan Jesuspa yachachisqankunamanta huknin hap'ichinanpaq kaq, Judas Iscarioteqa nirqan: 5 –Kay q'apaq hawinaqa kinsa pachak jornal qolqemanmi vendekunman karqan, hinaspa wakchakunaman qosqa kanman karqan, nispa. 6 Chaytaqa nirqan manan wakchakunata khuyapayaspachu, aswanpas suwa kaspanmi. Paymi qolqe hap'iq karqan, hinaspan chay qolqemanta suwakullaqpuni. 7 Chaymi Jesusqa nirqan: –Ama kay warmita hark'aychu, p'ampasqa kanay p'unchaypaqmi kaytaqa waqaychasharqan. 8 Wakchakunaqa qankunawanpunin kashan, ñoqan ichaqa mana tukuy tiempochu qankunawan kasaq, nispa. 9 Askha judío runakunan yacharqanku Jesuspa Betaniapi kashasqanta, hinaspan rirqanku Jesusta qhawaq, wañusqanmanta kawsarichisqan Lazarotawan qhawaq. 10 Chaymi sacerdote umallikunaqa rimanakurqanku Lazarotapas wañuchinankupaq, 11 Lázaro hawa askha judío runakuna paykunamanta t'aqarikuspa Jesuspi iñisqankurayku. 12 Qhepantin p'unchaymi fiestaman riq askha runakuna Jerusalén llaqtaman Jesuspa chayamunanta yachaspa, 13 palma k'allma hap'intinkama payta chaskiq lloqsirqanku, hinaspan kunkayoqta nirqanku: –¡Yupaychasqa kachun qespichiqqa! ¡Saminchasqa kachun Señor Diospa sutinpi hamuqqa! ¡Saminchasqa kachun Israelpa Reyninqa! nispa. 14 Jesusmi malta asnota tarispa chaypi sillaykukurqan. Diospa Simin Qelqan nin: 15 “Sión llaqta ama manchakuychu, qhawariy, Reyniykin hamushan huk malta asnopi sillaykusqa”, nispa. 16 Chaykunatan yachachisqankunaqa chaypacha mana entienderqankuchu, ichaqa Jesús hanaq pachaman wicharipuqtinñan yuyarirqanku chaykunaqa paymanta qelqasqa kasqanta, chay ruwasqankupas Jesuspaq kasqantawan. 17 Jesuswan kashaq runakunan willakurqanku imaynatachus Jesusqa Lazarota aya p'ampana t'oqomanta waqyaspa wañusqanmanta kawsarichisqanta. 18 Chaymi askha runakuna Jesusman taripaq lloqsirqanku, chay milagro ruwasqanta yachasqankurayku. 19 Hinan fariseokunaqa ninakurqanku: –Rikushanchismi, manan ima ruwaytapas atinchischu. Qhawariychis, llapallanmi paypa qhepanta ripushanku, nispa. 20 Fiestapi yupaychanankupaq Jerusalenman wichariqkunataq wakin karqan Greciamanta kaq runakuna. 21 Paykunan Galileapi Betsaida llaqtayoq Felipeman asuykuspa valekurqanku: –Wiraqocháy, Jesustan rikuyta munashayku, nispa. 22 Hinan Felipeqa rispa Andresman willamurqan, Andrestaq Felipewan kuska rispa chayta Jesusman willamurqanku. 23 Chaymi Jesusqa paykunata nirqan: –Ñan tiempoña Runaq Churin hatunchasqa kananpaq. 24 Cheqaqtapunin niykichis, trigo ruruchus hallp'aman mana haykunchu, manataq wañunpaschu chayqa, sapallanmi qhepan, wañuspanmi ichaqa askhata rurun. 25 Kawsayninta munakuqqa chinkachinqan, kay pachapi kawsayninta cheqnikuqmi ichaqa wiñay kawsaypaq waqaychanqa. 26 Pipas serviwaqniyqa qhepayta hamuchun, serviqniyqa maypichus kasqaypin kallanqataq. Pipas serviwaqniytaqa Yayaymi hatunchanqa. 27 Kunanmi almayqa sinchi llakisqa kashan. ¿Ima nisaqtaq? Icha, ¿Yayáy, kay llakikuymanta qespichiway, nisaqchu? Manan, aswanpas ñak'ariqpunin hamurqani. 28 Yayalláy, sutiykita hatunchay, nispa. Hinan hanaq pachamanta huk kunka nimurqan: –Hatuncharqaniñan, wakmantataq hatunchasaq, nispa. 29 Chaypi kashaq runakunataq kunkata uyarispa nirqanku: –Q'aqyaqeqpa kunununuyninmi, nispa. Wakintaq nirqanku: –Angelmi payta rimaykamun, nispa. 30 Hinan Jesusqa nirqan: –Manan ñoqaraykuchu kay kunkaqa uyarikun, aswanpas qankunaraykun. 31 Kunanmi kay pachapi kaqkunaqa juzgasqa kanqa, kunanmi kay pachapi kamachikuq qollanapas qarqosqa kanqa. 32 Hallp'a patapi hoqarisqa kaspaymi llapa runata ñoqa kikiyman asuykachikamusaq, nispa. 33 Chaytaqa nirqan imaynatachus wañunanta entiendechispanmi. 34 Chaymi runakunaqa payta nirqanku: –Ñoqaykuqa kamachikuy simipin yacharqayku Cristoqa wiñaypaq kawsananta. ¿Imaynataq qanri ninki: Runaq Churinqa hoqarisqapunin kanan, nispayki? ¿Pitaq chay Runaq Churinqa? nispa. 35 Hinan Jesusqa paykunata nirqan: –Pisi tiempollatañan k'anchayqa qankunawan kanqa, k'anchay qankunawan kashaqtinraq puriychis ama laqhayaq hap'inasuykichispaq. Laqhayaqpi puriqqa manan yachanchu maytachus risqantapas. 36 K'anchay qankunawan kashaqtinqa k'anchaypi iñiychis, k'anchaypi kashaq runakuna kanaykichispaq, nispa. Chaykunatan Jesusqa rimarqan, hinaspan ripuspa paykunamanta pakakurqan. 37 Runakunaqa manan Jesuspi iñirqankuchu askha milagrokunataña ñawpaqenkupi ruwashaqtinpas. 38 Chaykunan karqan profeta Isaiaspa qelqasqan hunt'akunanpaq. Paymi nirqan: “Señor, ¿pitaq creerqan willasqaykuta? ¿Pimantaq Señor Diosqa atiyninta rikuchirqan?” nispa. 39 Chaymi mana iñiyta atirqankuchu. Isaiasqa nillarqantaqmi: 40 “Ñawinkutan ñawsayachirqani, sonqonkutan rumiyachirqani, ñawinkuwan ama rikunankupaq, sonqonkuwan ama entiendenankupaq, ahinapi ama kutirikamuwanankupaq, ama qhaliyachinaypaqwan”, nispa. 41 Chaykunatan Isaiasqa nirqan Jesuspa qhapaq-atiyninta rikuspa, chaymi paymanta rimarqan. 42 Chaywanpas, judío umallikunamantaqa askhan Jesuspi iñirqanku, ichaqa fariseokunata manchakuspankun mana rimarirqankuchu, sinagogamanta ama qarqosqa kanankupaq. 43 Paykunaqa runakunaq hatunchanallankutan munarqanku Diospa hatunchananmantaqa, nispa. 44 Jesusmi kunkayoqta nirqan: –Pipas ñoqapi iñiqqa manan ñoqallapichu iñin, kachamuwaqniypipas iñillantaqmi 45 Pipas ñoqata rikuqqa kachamuwaqniytapas rikunmi. 46 Ñoqa k'anchaymi kay pachaman hamuni, pipas ñoqapi iñiqqa manan laqhayaqpichu kanqa. 47 Pipas simiykunata uyarishaspa mana hunt'aqtaqa manan ñoqachu juzgasaq. Manan runakunata huchachanaypaqchu hamuni, aswanpas runakunata qespichinaypaqmi. 48 Pipas pisichawaspa simiykunata mana kasukunqachu chayqa, kanmi payta juzgaq. Rimasqay simin paytaqa p'uchukay p'unchaypi huchachanqa. 49 Manan ñoqaqa kikillaymantachu rimani, aswanpas kachamuwaqniy Yayan kamachiwarqan imaynatachus rimanayta imatachus ninaytapas. 50 Yachanitaqmi kamachikuyninqa wiñaypaq kawsachiq kasqanta. Chaymi rimaspayqa Yayaq kamachiwasqanman hina rimani, nispa.
