Joel 3

1Señor Diosmi nin: Judá suyutapas Jerusalén llaqtatapas wakmantan sayarichisaq, 2chay p'unchaykunapin llapa suyukunata huñuykamusaq, hinaspan chaykunata “Diospa Juzganan Wayq'o” nisqaman uraykachisaq. Chaypin paykunata juzgasaq, ñoqaq kaqniy Israel llaqtayta mana allinta ruwasqankumanta. Paykunan Israel runakunata hinantin suyukunaman ch'eqechirqanku, hinaspan hallp'ayta paykuna rakinakurqanku. 3Llaqtay runakunatan sorteaspa rakinakurqanku, rabona warmiwan puñuyta munaspan qhari wawakunata pagarqanku, vino ukyayta munaspan warmi wawakunata qorqanku. 4Yaw, Tiro llaqta, yaw, Sidón llaqta, yaw, Filistea suyu, ¿imanaytan munawankichis? ¿Aynita kutichiwaytachu munankichis? Aynita kutichiwaqtiykichisqa contraypi ruwasqaykichismantan usqhaylla muchuchisqaykichis. 5Qankunan qolqeytapas qoriytapas suwawarqankichis, ídolo yupaychana wasiykichiskunamanmi aswan chaniyoq kaqniykunatapas aparqankichis. 6Judá runakunatapas Jerusalén runakunatapas Grecia suyu runakunamanmi venderqankichis, ahinapin hallp'ankumanta karuncharqankichis. 7Ichaqa rikunkichismi, maymanchus vendesqaykichismantan ñoqa paykunata pusampusaq, hinaspaymi qankunatapas kaqllatataq muchuchisqaykichis. 8Churiykichiskunatapas ususiykichiskunatapas Judá runakunamanmi vendesaq, paykunataq karupi kaq Sabá suyu runakunaman vendenqaku. Ñoqa Señor Diosmi chayta nini. 9Kayta suyukuna ukhupi willariychis: Yaw, hatun suyukuna, ¡awqa-tinkuypaq wakichikuychis! ¡Kallpasapakunata waqyaychis! ¡Maqanakuqkuna hamuchunku hinaspa maqaq phawaykuchunku! 10Rejaykichista takaspa espadata ruwakuychis, ichhunaykichismantataq lanzata ruwakuychis. Pisi kallpayoqpas nichun: ¡Kallpasapan kani! nispa. 11Muyuriqpi kashaq llapallan suyukuna, usqhamuychis, hinaspa chayman huñukuychis, nispa. ¡Señor Diosnilláy, chayman kachay kallpasapa soldadoykikunata! 12Señor Diosmi nin: Llapan suyukuna sayarichunku, hinaspa “Diospa Juzganan Wayq'o” nisqaman uraykuchunku, chaypin tiyaykusaq muyuriq llapa suyukunata juzganaypaq. 13Millay ruwasqankuqa askhayaykapunmi, chayrayku poqosqaña trigota hina ichhuychis, hamuychis, sarunapi hunt'a uvasta hina paykunata saruychis, vino waqaychanakunapas llimp'arichun, nispa. 14¡Aqo t'iyu hinan runaqa “Chaninchana Wayq'o” nisqapi kashanqa! Señor Diospa muchuchinan p'unchaymi chayamushan, chay wayq'opin paykunata taripanqa. 15Intipas killapas tutayaykunmi, ch'askakunapas laqhayaykunmi. 16Señor Diosmi Sión orqomanta manchakuyta qaparimun, Jerusalenmantan kunununumun, hinan hanaq pachapas kay pachapas khatatatan. Señor Diosmi ichaqa llaqtanpa pakakunan kanqa, Israel runakunaq pukaran kanqa. 17Señor Diosmi nin: Chay qhepatataq yachankichis ñoqa Diosniykichis Señor Diosqa kasqayta, ch'uya orqoy Sionpi tiyasqaytapas. Ch'uyan Jerusalenqa kanqa, manañan chayninta wak llaqtayoqkunaqa purinqachu. 18Chay p'unchaykunan orqokunamanta upi vino phawamunqa, moqokunamantan leche lloqllarimunqa, Judapi llapan ch'aki yarqhankunatan unu phawamunqa. Yupaychana wasiymantan unu pukyu phullpumunqa, chaymi Acacia Sach'ayoq Wayq'ota qarpanqa. 19Egipto suyun purunyachisqa kanqa, Edom suyutaq ch'inneqman tukuchisqa kanqa Judá runakunata millayta maqasqankurayku, hallp'ankupi mana huchallikuqta wañuchisqankurayku. 20Judá suyun ichaqa runakunaq wiñaypaq tiyanan kanqa, Jerusalenpas runakunaq wiñaypaq tiyananmi kanqa. 21Ñoqan Judá runakuna wañuchisqankumanta aynita kutichipusaq, huchallikuqtaqa manan pampachasaqchu, ñoqa Señor Diosmi Sionpi tiyasaq, nispa.

will be added

X\