Job 9

1Chaymi Jobqa nirqan: 2–Ñoqaqa allintan yachani chayqa hinapuni kasqanta. Runaqa manan atinmanchu Diospa qayllanpi chaninchakuyta. 3Pipas Dioswan churanakuyta munanman chayqa, waranqanpi Diospa nisqanmanta manan hukllatapas kutichiyta atinmanchu. 4Diosqa hatun atiyniyoqmi, hatun yachayniyoqmi, ¿pitaq paywan churanakuspa altoman lloqsinman? 5Diosqa phiñakuspallaraqmi orqokunatapas kuyurichin, thuniykapuntaq mana piman willaspa. 6Paymi kay pachata chhaphchin, teqsintaraq kuyuykachachin. 7Paymi intita mana lloqsimunanpaq kamachin, ch'askakunatapas mana k'anchananpaq kamachin. 8Mana piqpa yanapasqanmi hanaq pachatapas mast'arirqan, lamar-qochapi manchakuy hatun animaltapas sarurqan. 9Paymi kamarqan Puka Ch'askatapas Hatun Cruztapas, paymi ruwarqan Qotutapas Ch'isin Ch'askatapas. 10Runaqa manan entiendeyta atinmanchu Diospa musphana ruwasqankunataqa, runaqa manan yupayta atinmanchu Diospa milagro ruwasqankunataqa. 11Qayllaytaña Dios purishanman chaypas, manan rikuyta atiymanchu, purikushanmanña chaypas, manapunin reparaymanchu. 12Imatapas hap'ikapuqtinqa, ¿pitaq qechupakunman? Paytari, ¿pitaq imatan ruwashanki ninman? 13Diosqa phiñakuspa manan llamp'uyanchu, lamar-qochapi hatun manchana Rahab nisqa animalpa yanapaqninkunapas Diospa ñawpaqenpiqa ima khuyaytan khatatatanku. 14Chay hinaqa, ¿imaynatataq paywan churanakuyman? Diosta kutipakunaypaqri, ¿ima nispataq niyman? 15Mana ima huchayoqña kayman chaypas, manan kutichiymanchu, payqa Juezmi, chaymi khuyapayanallawantaña mañakusaq. 16Chaninchanaman waqyachiqtiy, pay hamunman chaypas, ñoqaq rimasqaytaqa manan uyariwanmanchu. 17Tutuka hatun wayrawan hinan waqtachiwan, k'iriykunatan yanqapacha aswantaraq yapaykuwan. 18Manan ratollapas samaykachiwanchu, sasachaykunawanmi ñit'iykachiwan. 19Maqanakuymanña chaypas payqa aswan atiyniyoqmi. Chaninchanaman waqyachiyman chaypas, ¿pitaq chayachimunman? 20Mana ima huchayoqña kayman chaypas, simiymi huchachawanman, chaninña kayman chaypas, rimasqaymi tanqaykuwanman. 21Mana huchayoqña kakushani chaypas, imanasaqyá kanpas, amikuniñan kawsasqaywanpas, 22kaqkamataq kashanpas, chaymi khaynata yuyaykuni: Señor Diosmi kuskata muchuchin huchayoqtapas mana huchayoqtapas, nispa. 23Hatun llakiman chayaspa mana huchayoq qonqaylla wañuqtinqa, Diosqa asikunchari muchusqanmantaqa. 24Millay runakuna kay suyuta munaychakuqtinmi, chaninchaqkunaq ñawinta Diosqa wisq'arqosqa, manataq Dioschu wisq'an chayri, ¿pitaq ruwan? 25Kawsayniyqa chaski hinan phawashan, mana huk chhikallantapas kusikuyta tarispa, 26qochapi phawaq balsa hinan phawashan, mikhunaman phalaykuq anka hinan phawashan. 27Quejaykunata qonqaspa kusikusaq nishani chaypas, kusisqaman tukuspa asikusaq chaypas, 28sinchi nanaypi rikukuspan llaksakuni, allintan yachakuni Diosqa huchasapamanta qhawaykuwasqanta. 29Diostaq huchasapamanta qhawariwan chayqa, manan imapaqpas valenchu kallpachakusqayqa. 30Jabonwanña makiyta maqchikuyman chaypas, lejiawanña allinta qhaqokuyman chaypas, 31Diosqa t'uru-t'urumanmi winaykuwanqa, p'achaypas qhellita rikuwaspa millakuwanankama. 32Manan Dioswanqa hap'inakuymanchu runawan hinaqa, manataqmi niymanchu runata hinaqa: Chaninchana wasiman haku, nispaqa. 33May kusachá Diostawan ñoqatawan chaninchaq kanman chayqa, iskayniykutan allipunachiwankuman, 34Diospa muchuchiwananmantan hark'aykuwanman, kay hinata llaksawasqanmantan amachaykuwanman. 35Chay hinaqa, mana manchakuspachá rimariyman, ñoqaqa yachakunin pichus kasqaytaqa.

will be added

X\