1 Chaymantataq Shúa suyumanta Bildadqa Jobta nirqan: 2 –¿Hayk'aqkamataq kay hinata rimaspallari kanki, tutuka hatun wayra hina kunununuspayki? 3 ¿Diosri chanin-kayta q'ewinchu? ¿Tukuy-atiyniyoqri “siwk” nisqata q'ewinchu? 4 Wawaykikunachá Dios contra huchallikurqanku riki, chaymantachá paykunata muchuchirqan. 5 Tukuy-atiyniyoq Diosman kutirikuy, tukuy sonqoykiwantaq mañakuy. 6 Ch'uyataqchus chanintaqchus kanki chayqa, kunanpachan Diosqa hamuspa yanapasunki, lliw ima kaqniykitapas wakmantan t'ikarichinqa. 7 Qhapaq kayniyki kapurqasunki chayqa manan imapasraqchu qhepaman kapusunki chaywan tupachiqtiykiqa. 8 Ñawpa runakunata tapurikuy, paykunaq yachasqankupi yuyaymanay. 9 Ñoqaykuqa qayna p'unchay runallan kayku, manan imatapas yachaykuraqchu, p'unchayniykupas kay pachapiqa llanthu hinallan kashan. 10 Paykunan ichaqa yachachisunkiman, yachasqankutapuni kay hinata willasunkiman: 11 ¿T'otorari hatunta wiñanchu mana ceneja t'uruq kasqanpi? ¿Llach'u qorari allinta wiñanchu mana unuq kasqanpi? 12 Chaytukuywanpas mana rutusqa q'omer kashaspallaraqmi wakin qorakunamantaqa ch'akirqapun. 13 Chay hinallataqmi Diosta qonqarpariqkunapas wañupun, Diosmanta mana imapas yuyariq millay runaq suyakuyninpas chinkapun. 14 Millay runaq suyakuyninqa ñañu q'aytu hinallan, millay runaq hap'ipakuyninqa kusikusiq llikan hinallan. 15 Hap'ipaykukuyta munaqtinpas p'itikunmi, k'iraykuyta munaqtinpas ch'usaqmi tukun, nispanku. 16 Millay runaqa allin qarpasqa ruphaypi wiñaq q'achu hinallan, huerta kanchapi ch'ikchimuq qora hinallan. 17 Saphinkunapas qaqamanraqmi saphiykun, wiñaspapas rumitaraqmi p'ampan. 18 Pillapas saphinmanta t'irarqoqtintaq, wiñasqan huertapiqa rikuypas kanñachu. 19 Chay hinan millay runaq kusikuyninqa huk ratolla, rantinpitaq hukkuna rikhurimun. 20 Diosqa mana huchayoqtaqa manapunin saqerparinchu, millay runakunatapas manapunin yanapanchu. 21 Payqa wakmanta asichisunkiraqmi, qanqa kusikuymanta qaparinkiraqmi. 22 Awqaykikunataqmi p'enqasqa rikukunqa millay runaq wasintaqmi thunisqa kapunqa, nispa.
