Job 7

1Kay pachapi runaq kawsayninqa mit'anipi llank'ay hinallan, llank'apakuq runaq p'unchaynin hinallan, 2ch'isiyaq ruphaypi llank'apakuq kamachiq tardeyanallantaña suyakuq hinan, llank'apakuqpa llank'ayta tukuspa pagonta suyarayaq hinan, 3ñoqapas killan-killanmi yanqapaq suyakushani, tutan-tutan muchuspaymi kaykushani. 4Puñuykuqtiypas tutaqa manan illariyta atinchu, illarimunantan yanqallaña suyaykushani, puñunapipas manan takyaniñachu. 5Aychaypas kuruq suksurqosqan kharkallañan kashan, aycha qaraypi k'iriykunan lleq-niripuwanña. 6P'unchayniykunan awaqpa lanzaderan hina phawashan, imaynan q'aytupas tukurqokun hinatan kawsayniypas tukukapun. 7Diosnilláy, yuyariy kawsayniyqa huk phukurqoyllan, manañan hayk'aqpas kusikuymanñachu. 8Diosnilláy, kunanqa rikushawankuraqmi, chaymantan ichaqa qan qhawariwaqtiyki mana kapusaqñachu. 9Imaynan phuyuqa kashaspapas ch'usaqyarqapullan, chay hinallataqmi hallp'aq sonqonman chinkaykapuq runapas, chaymantaqa manañan kutimunñachu. 10Wasinmanpas manan kutipunñachu, ayllunkunapas manan rikunkuñachu. 11Chayraykun manapuni upallakuymanchu, kay wañunayayniypin qaparisaq, phiñasqa kaspaymi quejakusaq. 12¿Imaraykun mana kacharispa hap'iwanki? ¿Ñoqari lamar-qochachu kani? ¿Ñoqari lamar-qochapi manchakuy hatun animalchu kani? 13Puñunapi samaykusaqchá nishaqtiypas, puñuqtiyqa thaniykunqachá nanayniy, nishaqtiypas, 14aswantaraqmi puñukushaqtiy mancharichiwanki, imaymanawanraq musphapachiwanki, 15aswanpas kunkaymanta q'apirqapuwachunku, aswanpas wañukapusaq kawsanaymantaqa. 16¡Hina kachun! Manan kawsayta munaniñachu. ¡Samarichiway! Kawsayniymi sinchi llakikuy. 17¿Imanaqtinpunitaq qanpaqri sinchi chaniyoq runari? ¿Imanaqtinpunitaq runamantari sinchita llakipakunki? 18¿Imanaqtintaq p'unchay-p'unchayri qhawapayanki? ¿Imanaqtintaq sapa rato hinari probashallanki? 19¿Hayk'aqkamataq makillari qhawawanki? Manañan thoqayllaytapas millp'uykachiwankiñachu. 20Huchallikuniña chaypas, qan, runaq kawsaynin qhawaqtari, ¿ima mana allintataq ruwayki? ¿Imanaqtinmi sapa rato hina p'anawanki? ¿Ñoqari llasa q'epichu qanpaqqa kani? 21¿Manachu huchaytaqa pampachaykuwankiman? ¿Mana allin ruwasqaytapas manachu pampachaykuwankiman? Kunallanmi hallp'aman chinkaykapusaq, maskhawankin, manataq kapusaqñachu, nispa.

will be added

X\