Job 6

1Chaymi Jobqa nirqan: 2–Llakikuyniyta pesaqtinkuqa, phutikuyniyta balanzaman churaykuqtinkuqa, 3llasaykunmanchari qocha aqomantapas astawanraq, chayraykun ima atisqayta thawtini. 4Tukuy-atiyniyoq Diosmi wach'inwan aychayman t'urpuykuwan, chaypa venenonmi lliw ukhuyman ch'eqeykuwan, Diosmi imaymana manchay llakikunawan q'aqchaykuwan. 5¿Asnori q'achun kashaqtin hawchikinchu? ¿Toropas mikhunan kashaqtin waqanchu? 6¿Runapas q'ayma mikhunata mikhunchu kachiwan mana yapaykuspa? ¿Hat'aqoq raphinri sumaqchu mana kachiyoq? 7Chay hina mikhunataqa manan munanichu, mikhuqtiypas onqochiwanmi. 8¡May allinchá kanman mañakusqayta Dios qowanman chayqa! ¡May kusachá kanman munasqayta Dios haywariwanman chayqa! 9¡May allinchá kanman hukpaqkama Dios ñit'irqapuwanman chayqa! ¡May kusachá kanman Dios wañuchipuwanman chayqa! 10Wañupuspayraqchá aswantapas kusikuyman, nanashawanmanña chaypas q'ochukuymanpunin, allintapunin yachakuni Ch'uya Diospa kamachin hunt'asqaytaqa. 11Manan kallpaypas suyakunaypaq kapunñachu, manan kawsanaypaq suyakuyniypas kapunñachu. 12¿Ñoqari qaqapunitaqchu kani? ¿Cuerpoyri broncemantachu kanman? 13Ñoqa kikiyqa manan imanakuytapas atinichu, manataqmi piqpa yanapaykuynintapas tarinichu. 14Huk amigo muchushaqtinqa khuyapayankun, manaña Tukuy-atiyniyoqman sonqollikun chaypas. 15Qankunan ichaqa, wawqeykuna, askha unuyoq mayu ch'akirqon hinaraq yanqa yuyarayachiwankichis. 16Chay mayukunan suchushan chhullunkuwan hunt'a, chay mayukunan phawashan rit'iq chullusqan askha unuyoq. 17Ch'aki tiempo chayamuqtintaq, mayupas ch'akirqapun, ruphay q'oñiriqtintaq, unupas chinkarqapun. 18Camellokunapi puriq comerciante t'aqakunan ñanninmanta chay mayuman q'ewirinku, mana unuyoqta tarispataq ch'inneq purisqankupi wañupunku. 19Temán llaqtayoq comerciante t'aqakunan unuta maskhanku, Sabá suyumanta comerciante t'aqakunan chay unu ukyaykuqllaña rinku. 20Chayaspankutaq ch'aki mayuta tarinku, ukyaykuqllaña rishaspanku laq'opi rikukunku. 21Chay hinan qankunapas ñoqapaq kankichis, kay hina nanay muchusqayta rikushaspan mancharikunkichis, manataq yanapaykuwankichischu. 22¿Qankunatari: Ñoqamanta pagaykapuwaychis, nirqaykichischu? ¿Qhapaq kayniykichismanta lluk'iykuychis yanapaykuwanaykichispaq nirqaykichischu? 23¿Awqaypa makinmanta kacharichiwaychis, nirqaykichischu? ¿Awqa sonqoq makinmanta horqowaychis, nirqaykichischu? 24Imallatapas yachaykachiwaychis, ch'inllan uyariykusqaykichis. Imapi pantasqaytapas reqsichiwaychis. 25Chanin simikunaqa sonqomanmi chayakun, qankunan ichaqa yanqapacha huchachashawankichis. 26¿Qankunari rimasqaymantachu huchachayta munawankichis? ¿Phutisqa rimasqaytachu yanqa rimasqapaq yuyankichis? 27Kusamá kasqankichis mana tayta-mamayoqta rantinapaq sorteaqkuna, kusamá kasqankichis amigoykichista vendeqkuna. 28Kunanqa qhawaykuwaychis uya-uyapura, llullakushani chayqa sut'inchawaychis. 29¡Upallaychis! ¡Amayá mana chanin rimaqkunaqa kaychischu! Wakmanta yuyaykuychis. Ñoqaqa chaninmi kani. 30¿Ñoqari llullachu kashani? ¿Allin mana allin kaqtapas mana reparaqchu kashani?

will be added

X\