1 Kunanqa qapariyyá, ¿pillas uyarisunki? ¿Mayqen angelmanmi hap'ipakunki? 2 Mana yuyayniyoqqa phiñakuspallapunin wañun, mana yuyayniyoqqa sientekuspallapunin wañun. 3 Rikullanitaqmi mana yuyayniyoqpa t'ikarisqanta, kaq ratopachataqmi wasinqa ñakasqa. 4 Wawankunapas wikch'usqa hinan kanku, chaninchana wasipipas mana yanapaqniyoqmi kanku, chay hinapin sarunchasqa kapunku. 5 Chaypa cosechantan yarqasqakuna mikhukapunku, khiska sonqomantawanpas lliwtan pallarqapunku, qhapaq kaynintan ch'akisqakuna ch'usaqyachipunku. 6 Millay-kayqa manan pampamantachu phutumun, hatun llakipas manan hallp'amantachu paqarimun, 7 aswanpas runa kikinmi chaykunata paqarichin, imaynan ninamantapas phinchikilla t'akakun hinata. 8 Qan hina kaspayqa Diostachá waqyakuyman, paymanchá kay hina kayniyta willakuyman. 9 ¡Payqa hatuchachaq musphanakunatan ruwan! ¡Mana yupay atina milagrokunatan ruwan! 10 Payqa kay pachamanmi parata chayachimun, chaywantaq hallp'ata qarpaykun. 11 Paymi pisichasqakunata hatunchan, paymi llakisqakunata kusichin. 12 Paymi yuyaysapaq yuyaykusqanta qaqapachin, hinaspan paykunata pisipachin. 13 Paymi waktasqanta ruwaqtapas llulla-kayninpi hap'irparin, chay hinapin mana chanin yuyaykusqankunata qolluchin. 14 Sut'i p'unchaypin paykunataqa laqha tutapi hina purichin, chawpi p'unchaypin tutayaqpi hina thampiykachachin. 15 Diosqa wakchatan wañunanmanta qespichin, awqa sonqo runakunaq makinmantan kacharichin. 16 Chay hinapin wakchakunaqa wakmanta suyakunku, awqa sonqo runaq siminpas wisq'asqan kapun. 17 Kusisamiyoqmi Diospa anyaykusqan runaqa, chay hinaqa, ama pisichaychu Tukuy-atiyniyoqpa kunaykusqantaqa. 18 Señor Diosmi k'irin, payllataqmi hampin, makinwan nanachin chayqa, payllataqmi thanichinqa. 19 Askha kutipin qespichisunki hatun llakimantaqa, chay hinapin mana chayamusunkichu mana allin kayqa. 20 Hatun yarqay kaqtinpas horqosunkipunin wañuymantaqa, hatun maqanakuy kaqtinpas qechusunkipunin espadamantaqa. 21 Amachasunkin nina qallu runamanta, manan manchakunkichu hatun llaki chayamuqtinqa. 22 Asikunkin thunina p'unchay chayamuqtinqa, asikunkin yarqay p'unchay chayamuqtinqa, manataqmi manchakunkichu salqa animaltaqa, 23 chakrapi rumikunaqa manan sasachasunkichu, salqa animalkunaqa mansomanmi tukupunqa. 24 Wasiykipipas mana ima llakiyoqmi kawsakunki, lliw kaqniykita qhawaykuqtiykipas llapallanmi kapushanqa. 25 Wawaykikunapas askhapunin kapushanqa, mirayniykikunapas qora hinaraqmi kapushanqa. 26 Kaq kallpallaykipin wañukapunki, poqosqa trigo marq'ay hinan apasqa kanki. 27 Allinta rikuspan yachaspan rimayku, chay hinaqa, uyariwaypuni, hinaspa hap'iqakuy kawsayniykipi, nispa.
