Job 41

1Leviatán manchakuy hatun animaltari, ¿challwa hap'inawan aysarqowaqchu? ¿Qalluntapas watullawan aysarqowaqchu? 2¿Senqanta watuwan khipurqoyta atiwaqchu? ¿Qhaqllinmanta anzuelowan aysarqoyta atiwaqchu? 3¿Payri khuyapayaykunaykipaq valekusunkimanchu? ¿Sumaq simiwanchu rimapayasunkiman? 4¿Payri qanwan rimanakunmanchu wiñaypaq kamachiyki kananpaq? 5¿Pichinchukunawan hinachu qanri pukllakuwaq? ¿Ususiykikunaq pukllananta hinachu watawaq? 6¿Challwa qhatuqkunari Leviatanta vendenakuspa ch'aqwankumanchu? ¿Qhatunankupaqri kuchurqarinkumanchu? 7¿Qarantari wach'ispa t'oqorqoyta atiwaqchu? ¿T'urpunawan umanta t'oqorqowaqchu? 8Makiykiwan aychanta llamiykuy, imaynataraq tupapakunqa, manataq chaytaqa qonqankichu, chaymi mana llamipayankiñachu. 9Leviatantaqa rikurqospallaraqmi pasaqta llaksakunku, manan atikunchu imaynamanta hap'iypas. 10Pillapas llamipayaqtinqa kutirimunpachan, manataqmi pipas churanakuyta atinmanchu. 11Chhaynallataq, ¿pin ñoqawan churanakuspa mana imanasqalla ayqenman? Llapan teqsimuyuntinmi ñoqaqkama. 12Willallasqaykitaq chakinkunamanta, chay musphana kallpanmanta sumaq rikch'ayninmantawan. 13¿Pitaq atinman chaypa qaran ch'utiyta? ¿Pitaq chay hark'aqnin phatu q'aqlachunta t'oqonman? 14¿Pitaq siminta qhaqllariyta atinman chay hina manchakuy kirukunayoqtari? 15Wasa sarphanpas hatuchaq escudowan qatasqa hinan, chaykunataq allin k'askasqa ch'illa rumi hinaraq. 16Allin-allin mat'illañan kashan, mana wayraqpas haykuy atinan. 17Allin-allin k'askachisqallañan kashan, mana piqpa paskay atinan. 18Chhullisqanpas illapa hinaraqmi lliphllikin, ñawinkunapas pacha paqar inti hinaraqmi k'anchan. 19Siminmantapas ninaraqmi rawrarin, nina phinchikillaraqmi t'akarikun. 20Senqanmantapas q'osñiraqmi lloqsimun, t'impushaq manka waksi hinaraqmi lloqsimun. 21Samayninpas sansa hinaraqmi rupharin, siminmantapas ninaraqmi wach'imun. 22Paypa kallpanqa much'unpin, paypa qayllanpiqa lliwmi khatatatanku. 23Ukhu aychanpas allin talullañan mana imanay atina. 24Sonqonpas qaqa hina ch'ilan, maran rumi hina mana atiymi. 25Leviatán sayariqtinqa llapa dioskunan llaksakunku, q'aqchasqaraqmi ayqerikapunku. 26Piña espadantin taripaspapas, manan imanaytapas atinchu, jabalinapas, lanzapas, rawrashaq wach'inapas manan haykuyta atinchu. 27Leviatanpaqqa fierropas ichhu hinan, broncepas ismusqa k'ullu hinan. 28Wach'isqapas manan ayqechinchu, rumiwan warak'asqapas ichhuwan chanqasqa hinan. 29Marunawan q'asusqapas soqos hinan paypaqqa, asikunmi lanzawanña chanqasqapas. 30Qhotunpas p'akisqa k'arpawan k'askachisqa hinan, suchuriqtinpas fierro kiruyoq saruchina hinan t'uruta wayq'on. 31Lamar-qochatapas mankapi unuta hinaraqmi t'impuchin, chhaqrusqa hawina t'impuchisqa mankaq phosoqonta hinaraq. 32Unupi purisqanpas phosoqo ñanmi ruwakun, yuraq k'anchashaq soqo chukcha hinaraq. 33Kay pachapiqa manan imapas kanchu chay hinaqa, chay animalqa mana imatapas manchakuqmi. 34Llapan qhariykachaq animalkunatapas Leviatanqa pisichanmi, Leviatanqa llapan salqa animalkunaqpas reyninmi, nispa.

will be added

X\