Job 40

1Señor Diosqa Jobta nillarqantaqmi: 2–Yaw, Job, ñoqa Tukuy-atiyniyoqwanmi churanakushanki, ¿ñoqata anyawankimanchu? Qanqa huchachawankin, chay hinaqa, kutichimuway, nispa. 3Hinan Jobqa nirqan: 4–¿Ima niymanñataq kanpas, ñoqa mana imapaq valeqri? Aswanpas ch'inllaña kakusaq. 5Rimarqaniñan huk kuti, manan ima rimanaypas kanñachu, rimaniñan iskay kutipi, manan imatapas niymanñachu, nispa. 6Hinan Señor Diosqa tutuka hatun wayraq chawpinmanta Jobta rimapayarqan: 7Kunanqa allin qhari kasqaykita rikuchiway, tapusqaykunatapas kutichiway. 8¿Qanchu mana chanin kasqayta rikuchiwankiman? ¿Chaninmi kani nispachu huchachawankiman? 9Qanri, ¿ñoqamanta aswan kallpayoqchu kanki? ¿Qanpa rimasqaykiri ñoqaq hina kununununmanchu? 10Chay hinaqa, hatun atiyniyoq-kaywan p'achakuy, lliphipipiq qhapaq-atiyniykiwan p'istukuy. 11Llaksakuytaraq phiñakuy, uma hoqariqkunatapas qhawarispallaraq k'umuchiy. 12Arí, qhawarispalla thunirpariy, millay runakunataqa maychus kasqanpi sarurpariy. 13Pampamanraq llapanta p'ampay, wañusqakunaq kasqanmanraq wisq'ay. 14Chay hinapin ñoqapas reqsisaq qanpa atiyniyki lliw imapipas llallichisqasuykita. 15Qhawariy, haqay hina hatun Behemot animalta, qan hina kamasqallataqmi paypas, waka hinan q'achuta mikhun. 16Qhawariy, haqay hinaraqmi wasankunapas, cheqaq kallpallayoqñan wiksanpas. 17Chupanpas cedro kurku hinaraqmi, chaki hank'unkunapas qhopuchakushanraqmi. 18Tullunkunapas broncemanta soqos hinaraqmi, chakinkunapas fierro tawnakuna hinaraqmi. 19Kayqa kamasqay animalkunaq aswan ñawpaqninmi, ñoqallapunin kani kamaqninpas wañuchiqninpas. 20Salqa animalkunaq pukllanan orqokunapin mikhunanpaq q'achukunaqa wiñan. 21Khiska ch'aphraq llanthun ukhumanmi suchuykun, t'otora ukhukunamanmi t'uru-t'uruman winaykukun. 22Ch'aphrakunapin pakakun, mayupi saucekunan muyuykun. 23Jordán mayuña askhayamun chaypas, manan mancharikunchu, senqanmanña unu taripashan chaypas, llakhillan kashan. 24¿Pitaq ñawsayachispa hap'irqonman? ¿Pitaq senqanmanta watucharqoytapas atinman?

will be added

X\