Job 4

1Hinan Temán llaqtayoq Elifazqa Jobta nirqan: 2–¿Imatapas rimapayaqtiy, phiñakuwaqchu? Manan ch'inlla kaymanñachu. 3Qan, askha runaman yachachiqpas, qan, pisi kallpayoqta kallpachaqpas, 4qan, urmaqkunata sayarinanpaq kallpachaqpas, qan, kumpanayakuqta sayarichiqpas, 5llakiq ñit'isqan rikukuspaykichu laqhoyarqapullankitaq, ñak'ariypi kaspaykichu pisi kallpayarqapullankitaq. 6Qanqa Diospa hunt'aq kamachinmá kanki, allin kawsaypi puriq runamá kanki, ¿imaynataq manari kanchu cheqaq hap'ipakuyniykiqa? 7Yuyariyyá, ¿mana huchayoqqa hukllapas chinkachisqachu karqan? ¿Maypin chanin runaqa ch'usaqyachisqa karqan? 8Yachaspaymi rimani, mana allin ruwaqqa, mana allin ruwasqallataqmi rikukun, runa ch'aqwachiqqa, ch'aqwallapitaqmi rikukun. 9Diosqa chay hina runataqa phukuspallaraqmi ch'usaqyachipun, k'arakta phiñakuspan hukpaqkama thunipun. 10Imaynatapas waqakuchun, león hinapas qaparichun, Diosmi upallachin, kiruntaraq chhalluspa. 11Mana mikhunayoq león hinan wañupun, uñankunapas lliwmi ch'eqechisqa kapun. 12Pakayllapin huk willakuy chayarqamuwan, ñak'ayllatan chhiwchisqata uyarirqoni. 13Llapa runakuna misk'i puñuypi kashaqtinkun manchanata ñit'ishawasqa. 14Pasaqtapuni llaksakushasqani, tulluykunapas manaraq takyashawasqachu. 15Uyaytapas samay hina pasarpariwan, cuerpo peloykunapas ch'uskuchakuwanraq. 16¡Pichá chaypi kashasqa! Yanarayashaqtan rikurqoni, ichaqa manan reparanichu imaynachus kasqanta. Ch'inllataq karqanpas, chaymantaraq uyarirqani: 17Runari, ¿Diospa ñawpaqenpi chaninpuni kanmanchu? Wañuq runari, ¿Kamaqninpa qayllanpi ch'uyapuni kanmanchu? 18Diosqa hanaq pachapi kamachinkunapipas manan confiakunchu, Diosqa angelninkunapipas tarinmi huchata. 19¡Imaynataraqtaq hallp'amanta ruwasqa runapiqa tarinqa! Runaqa hallp'a patapi t'urumanta ruwasqa wasi hinan, ñit'ispa wañuchina thuta hinan. 20Runaqa pacha paqarmanta ch'isinkama thuninan, mana piqpa reparasqanmi wañupun. 21Karpa chutaq waskha p'itisqa hinan runaq kawsayninqa p'itikun, yachayta mana aypaspan wañupun, nispa, nishaqta.

will be added

X\