Job 39

1¿Yachankichu hayk'aqchus k'ita cabraq wachananta? ¿Rikunkichu china taruka wachashaqta? 2¿Yachankichu hayk'a killamantas wachanku chayta? ¿Yachankichu ima killapis wachananta? 3Wachananpaqqa qhopuchaykukunmi, chay hinapin uñanqa lloqsimun. 4Hinaspan pampapi qorallawan wiñanku, wiñaspataq manaña kutimuq ripunku. 5¿Pitaq kacharirqan salqa asnotari? ¿Pitaq kacharirqan mana watasqa purinanpaqri? 6Ñoqan ch'inneqta tiyananpaq qorqani, kachi-kachi pampata kawsanankupaq qorqani. 7Paykunaqa asikunmi llaqtaq ch'aqwasqanwan, manan kasunkuchu asno qatiqpa waqyakachakusqantapas. 8Orqon-orqontan phawaykachanku q'achuta maskhaspa, ima q'omerllapas kaqtinqa mikhuykunankupaq. 9¿Salqa toro qanpaq llank'anmanchu? ¿Kanchaykipipas tuta puñunmanchu? 10¿Atiwaqchu yugota wataykuspa llank'achiyta? ¿Atiwaqchu qatiykukuspa chakra yapuchiyta? 11¿Kallpayoq kasqanpi hap'ipakuwaqchu? ¿Sasa llank'anata llank'achiwaqchu? 12¿Yuyankichu chakraman kachaqtiyki q'epintin eraman kutimunanta? 13Suriqa kusisqan pharpachakushan, chaywanpas manan pariwana hinaqa phalanmanchu. 14Aqo-aqomanmi runtuntapas wikch'un intiq ruphayllan oqllananpaq. 15Manan yuyarinchu pipas ñitirqonantaqa, ima uywapas sarurqonantaqa. 16Chiwchinkunapaqpas millayllañan manapas wawanchu kanman hina, manataq llank'asqan yanqapaq kasqantaqa yuyaykunchu. 17Chhaynaqa, ñoqan yuyayta mana qonichu, allin yuyayniyoq kananta mana munanichu. 18Sayarispa raphracharikuspataq phawarillanña, caballopi phawaq runakunamantapas asikunmi. 19¿Qanchu caballoman kallpata qoqqa kanki? ¿Qanchu much'unta chukchawan k'achanchanki? 20¿Qanchu t'isku-t'iskuta hinaraq p'itachinki, wihihihispapas runataraq mancharichinanpaq? 21Umanta chhaphchirikuspan pampata thallmirin, mana manchakuspataq maqanakuyman phawarin. 22Manchakunanmantaqa asikunmi, manataq llaksakunpaschu, espadataña apaykachaqtinkupas manan reparaqpas tukunchu. 23Runaq wach'i q'epinmi wasanpi chhaqllaqen, maqanakuqpa lanzanwan espadanwanmi chhipipipin. 24Karu pampakunatapas phawarispa manaraqmi tarirqonchu, trompetata tocaqtinkuqa manañan sayaykuytapas munanchu. 25Wihihihispan trompeta waqaqtinpas kutichin, paypaqqa maqanakuypas karumantaraqmi q'apamun, ch'aqwaytapas kamachikuqkunaq waqyakusqantapas karumantaraqmi uyarin. 26¿Qanchu waman ankaman phalayta yachachirqanki? ¿Qanchu uray ladoman phalananpaq yachachirqanki? 27¿Qanchu kamachirqanki hatun ankata aswan wichayman phalananpaq, ranra qhatapi q'esachakunanpaqpas? 28Payqa tuta-p'unchaymi ranrallapi tiyakun, ranraq k'awchinpitaq qhariraq sayanpas. 29Chaymantapachan makilla qhawamun, karumantapachan ñawinqa mikhunata rikumun. 30Chiwchinkunapas yawarwanmi kallpachakun, maypichus ima wañusqapas kasqanpin ankaqa rikhurin.

will be added

X\