Job 38

1Chaymantataq Señor Diosqa manchay wayra chawpimanta Jobta rimapayarqan: 2–¿Pin qan kanki allin yuyaykusqaykunamanta iskayrayanaykipaq, yanqa rimaykunata thawtispayki? 3Kunan atispaqa allin qhari kasqaykita rikuchiway, tapusqaykunata kutichiway. 4Kay pachata kamashaqtiy, ¿maypitaq kasharqanki? ¡Niwayyá, allintapuni yachaspaqa! 5¿Pitaq yuyaykurqan hayk'achus hallp'aq tupunanta? ¡Niway, yachankipuni chayqa! ¿Pitaq hallp'ata waskhawan tupurqan? 6¿Ima patapi churasqan kashan teqsinkunapas? ¿Pin churarqan esquina rumita, 7pacha paqar ch'askakuna ima sumaqta takirashaqtinku, hanaq pacha kamachiykuna kusisqa q'ochukushaqtinku? 8Lamar-qochapas pampamanta paqarimushaqtin, ¿pin punkunkunata hark'aq churakurqan? 9Ñoqan p'achakunanpaq phuyuta qorqani, p'istukunanpaq laqhayaq phuyuta qorqani. 10Ñoqan lamar-qochaq qorpantapas churarqani, punkunkunatapas p'utiwan wisq'aykurqani. 11Kaykamallan chayamunki, nirqani, kaykamallan manchay phoqchiqeyniyki chayamunqa, nirqani. 12¿Hayk'aqllapas kamachirqankichu paqarimunanta? ¿Hayk'aqllapas illarichimurqankichu, 13pachantinta sut'irimuqtin suwakuna mana pakakunankupaq? 14Pacha paqarimuqtinmi rikukunña orqokuna wayq'okuna p'achaq sip'unkuna hina, selloq ñit'isqan hina aswan sut'i. 15Mana allin runamantaqa k'anchayninpas qechusqan kapun, manchachikuq atiyninmanpas p'uchukaymi churakapun. 16¿Haykurqankichu lamar-qochaq phullpumusqankama? ¿Purirqankichu lamar-qochaq sonqontakama? 17¿Qanqa rikunkichu wañuyman rina punkuta? ¿Qanqa rikunkichu chay ch'ampiq ukhupi punkuta? 18¿Yachankichu hayk'as tupunman kay pacha chayta? ¡Llapanta yachanki chayqa, niway! 19¿Mayqen ñannintan k'anchayman rin? ¿Maypin laqhayaqpa wasin? 20¿Laqhayaqtapas k'anchaytapas wasinkuman pusawaqchu? ¿Rikunkichu wasinkuman rinanku ñanta? 21¡Yachankipunichá askha watayoqtaq kasqanki chayqa, chaypaqqa ñachá nacerqankiña riki! 22¿Qanqa haykurqankichu rit'i waqaychanayman? ¿Qanqa rikunkichu chikchi waqaychanayta? 23Chikchitapas rit'itapas waqaychani awqa-tinkuy p'unchaypi hatun llaki p'unchaypiwan horqomunaypaqmi. 24¿Yachankichu maynintan rin q'aqyaqe lliphllikimunanman? ¿Imaynatan inti lloqsimuy lado wayra hallp'a patapi mast'arikun? 25¿Pin para chayananpaq punkuta kicharin? ¿Pin q'aqyaqeman purinanpaq ñanta kicharin? 26¿Pin ch'in pampakunapi parata chayachin? ¿Pin mana runaq tiyasqan cheqaskunapi parachin? 27¿Pin mana tarpuna pampakunata qarpan qorakunata ch'ikchirichimunanpaq? 28¿Taytayoqchu kanman para? ¿Pin sullaq taytan? 29¿Pin chhullunkuta wacharqan? ¿Pin qhopaq maman? 30¿Pin unuta tukuchin rumi hina kananpaq? ¿Pin lamar-qochaq patantapas tikayachin? 31¿Qanqa atiwaqchu Qotuta huñulla takyachiyta, Hatun Cruztataq karu-karupi takyachiyta? 32¿Qanqa atiwaqchu Pacha Paqar Ch'askata lloqsimunallanpi lloqsichimuyta? ¿Qanqa atiwaqchu Phisqa Qolqa pusayta? 33¿Qanqa yachankichu imayna kamachikuykunas ch'askakunapaq kasqanta? ¿Qanqa atiwaqchu kay pachapaq kamachikuykuna churayta? 34¿Qanqa atiwaqchu phuyukuna waqyayta qan pataman yanqa nisqa parawan ch'aranchanasuykipaq? 35¿Illapata kamachiwaqchu mayninta lliphllikinanta? ¿Q'aqyaqeri: Kaypin kashayku kamachinaykipaq nisunkimanchu? 36¿Pin yuraq phuyuman yuyayta qorqan? ¿Pin pacha phuyuman yachayta qorqan? 37¿Pitaq aswan yachayniyoq, phuyuta yupananpaq? ¿Pitaq atinman hanaq pachamanta parachimuyta 38hallp'aq t'uruman tukunanpaq, k'urpakuna paykunapura k'askanakunanpaq? 39¿Qanchu kanki china leonpa mikhunan maskhaq? ¿Qanchu uñankunatapas t'oqonpi chutarayashaqtin, qora sonqoman suchuykuspa hap'irqonanpaq pakakushaqtin saksachinki? 41¿Pin alqamarikunaman mikhunata qaran, chiwchinkuna mikhunata maskhaspa puriqtin, chhiwchikikuspa mikhunata mañakuqtin?

will be added

X\