Job 37

1Chikchi t'oqyaqtinqa sonqoyraqmi tiktikin, sonqoypas phatarqoshanman hinaraqmi kawan. 2¡Uyariychis Diospa manchay q'aqyaq kunkanta! ¡Uyariychis siminmanta kunununuy lloqsimusqanta! 3Diosmi phuyu sonqokunapi hinantinman q'aqyaqechin hallp'aq huk k'uchunmanta huk k'uchunkamaraq. 4Chaymantataq kunununuyllaña uyarikun hatun manchana kunkan rimariqtin, kunununumushanankamaqa q'aqyayninqa manan thaninchu. 5Diosninchis kunkanta kunununuchimuqtinqa musphanakunan kan, imaymanakunan ruwakun mana piqpapas entiendey atinan. 6Rit'itapas pampaman chayananpaqmi kamachin, paratapas sinchi kallpawan chayananpaqmi kamachin. 7Chay hinapin runakunaqa wasinkupi qhepakunku, chay hinapin Diospa llapa ruwasqanta yachanku. 8Salqa animalkunapas t'oqonkumanmi winaykukunku, chay ukhupin pakakunku. 9Tutuka hatun wayran uray ladomanta lloqsimun, wichay lado rit'i wayramantan chiriqa hamun. 10Diospa phukusqanwanmi chhullunkuqa ruwakun, Diospa samayninwanmi qocharayaq unukunaqa tikayan. 11Paymi phuyukunata parawan ch'aranyachin, chaykunapin lliphllikiyqa q'enqochakunraq. 12Diospa kamachisqanmi phuyuqa pukllan, hinantin hallp'a patakunapi Diospa ima munasqanta ruwananpaq. 13Diosqa paratan kay pachaman chayachin runata muchuchinanpaq, wakin kutipitaq munakuyninta rikuchinanpaq. 14Job, makilla uyariykuway, Diospa imaymana musphana ruwasqankunata qhawariy. 15¿Yachankichu imaynatachus Diospa phuyukunata kuyuykachachisqanta? ¿Yachankichu imaynatachus illapata q'enqochachisqanta? 16¿Yachankichu imaynatachus phuyuq takyasqanta? Chaykunan Diospa musphana ruwasqankuna, payllapunin hunt'asqa yachayniyoqqa. 17Qanqa p'achayki ukhullapiraqmi rupharinki, uraymanta ruphashaq wayra suyuta hunt'aykuqtin. 18Chay hinari, ¿atiwaqchu Diosta yanapayta hanaq pacha kamaypi, ch'ila qespita hina ruwayta? 19Yacharichiwayku, ¿ima niykumantaq Diosta? Kunan raton tutayaqpi hina kashayku, manan ima niytapas atiykuchu. 20Ñoqaqa manan rimariyllatapas munaymanchu, kawsayniytachá chinkachiyman. 21Wayra hamuspan inti pakaq phuyuta picharqon, hinan ima sumaqta inti k'anchamushaqtin mana pipas intita qhawarinmanchu. 22Wichay ladopin rikhurin qoriq chhipipiyninkuna, manchana atiyniyoq Diosmi hamun. 23Tukuy-atiyniyoqqa sinchi atiyniyoqpunin, ñoqanchisqa manan taripasunmanchu, payqa chaninmi, chanintapunitaqmi kuskachanpas, manan pitapas llakichinchu. 24Chayraykun runakunaqa Diosta manchakunku, cheqaqtapunin llapan yachaysapakunapas Diostaqa manchakun, nispa.

will be added

X\