Job 36

1Eliuqa nillarqantaqmi: 2–Pisillatawan suyaykuway, yachachisqaykin, kanraqmi Diosmanta rimarinay. 3Allin yuyayniymantan rimarimusaq, Kamaqniypa chanin kasqantan rikuchisqayki, 4allin mana pantasqatan nisqayki, yachaysapawanmi kashanki. 5Diosqa atiyniyoqmi, manan runataqa pisichanchu, Diosqa munayniyoqmi, manan chanin runataqa saqerparinchu. 6Manallataqmi millay runatapas hinataqa qhawanmanchu, wakchakunatan ichaqa chanintapuni ruwan. 7Payqa qhawarinpunin chanin sonqo runakunataqa, reyta hinan kamachikunanpaq tiyachin, paykunataqa wiñaypaqmi hatunchan. 8Cadenakunawan watasqa ñak'arishaqtinkuqa, llakikuykunawan ñit'isqa muchushaqtinkuqa, 9Diosqa rikuchinpunin mana allin ruwasqankunatapas, uma hoqariywan huchallikusqankutapas. 10Diosqa anyaspan rimapayan, huchankuta saqenankupaqmi kamachin. 11Uyarikuspachus Diosta kasukuspa servinqaku chayqa, sumaq kusi kawsaytan tarinqaku, kusisqallataqmi ch'isiyanqaku. 12Manataqchus uyarikunqaku chayqa, wañuy mayutan chimpanqaku, manaraq reparakushaspan wañunqaku. 13Mana chanin runaqa phiñakullanpunin, watasqaña kashaspapas, manan yanapaytapas mañakunkuchu. 14Waynallaraq kashaspan wañukapunkupas, qharipura t'inkikushaspan chinkaripunkupas. 15Diosqa ñak'ariypa chawpintan muchuqtaqa qespichin, nanaypa chawpintan yuyayta hap'ichin. 16Qantapas hatun llakimantan horqorqasunki, mana imaq mat'iykunanmantaq apamurqasunki, mesaykitapas sumaq mikhunakunawanmi wasapachirqan. 17Kunantaq ichaqa millay runa hina muchuchisqa kashanki, chanin kaypa taripasqanmi kashanki. 18Allinta cuidakuy ama lluk'iykachikunaykipaq, amallataq askha qolqewan sonqoykita suwachikuychu. 19Llakikuyniykiqa manan imapaqpas valenchu, qhapaq kayniykipas kallpachakusqaykipas manan valenchu. 20Ama munaychu tutaq chayamunanta, tutapiqa qonqayllan llaqtakunapas chinkapun. 21Ñak'ariyta mana munaspa mana allin ruwayta akllakushanki chayqa, paqtataq mana allinman k'askakuwaq. 22Qhawariy Diospa hatun atiyninta, mayqen yachachiqpas manan kanchu pay hinaqa. 23Manan pipas kamachinmanchu ima ruwanantapas, manan pipas ninmanchu mana allin ruwasqantapas. 24Pachantinmi takinku ruwasqankunamantaqa, qanpas yuyarillaypuni yupaychayta. 25Llapa runan Diospa ruwasqanta rikunku, karumantaraqmi qhawanku. 26¡Diosqa sinchi hatunmi, manapunin yuyayninchispas aypanmanchu! ¡Watankunatapas manan yupayta atisunmanchu! 27Payqa sut'uy unutan huñun, chaymantataq paraman tukuchin. 28Parataq phuyumanta phaqcharimun, unu parapas hallp'a pataman chayamun. 29¿Pitaq yachan imanaqtinsi phuyuq phawasqanta? ¿Pitaq yachan hanaq pachamanta roqhoqeq t'oqyamusqanta? 30Diosmi illapata hinantin ladoman lliphllikichin, lamar-qochaq ukhunmanraq aypachin. 31Chay hinapin llaqtakunata kawsachin, askha mikhunata qospa. 32Makinpin illapata hap'in, may munasqallanmanmi chayachin. 33Kunununuyqa wayrantin paraq hamunantan willakun, uywakunapas chikchiq hamunantan willakun.

will be added

X\