Job 34

1Eliuqa nillarqantaqmi: 2–Uyariwaychis, yachaysapakuna, uyariwaychis rimasqayta, hamawt'akuna. 3Ninriwanmi reparankichis rimasqata, simiwanmi reparankichis sumaq mikhunata. 4Chay hinallataq chaninkaqtapas reparasun, allinkaqtapas huñulla yachaqasun. 5Jobmi nin: –Mana ima huchayoqmi kani, Diostaq mana chaninta hina qhawariwan. 6Cheqaqta rimashaqtiypas payqa llullakunmi, mana ima huchaymantan mana thaniq k'iriwan churaykuwan, nispa. 7¡Manan pipas Job hinaqa kanchu! Paymanqa Dioswan churanakuymi misk'iykun, unuta ukyaykuy hinaraq. 8Millaykunawanmi huñukuyta munan, mana chaninkunawanmi puriyta munan. 9Payqa ninmi: Runaqa manan imatapas tarinchu, Diospa sonqonman chayaqta ruwaspaqa, nispa. 10Chay hinaqa, hamawt'akuna, uyariwaychis. ¡Diosqa manan hayk'aqpas mana allintaqa ruwanmanchu! ¡Tukuy-atiyniyoqqa manan hayk'aqpas mana chanintaqa ruwanmanchu! 11Payqa sapankamanpas ruwasqanman hinan pagapun, sapankamanpas tupaqninman hinan qopun. 12Cheqaqtapunin Diosqa mana chanintaqa mana ruwanmanchu, cheqaqtapunin Tukuy-atiyniyoqqa chaninkaqtaqa mana q'ewinmanchu. 13¿Pitaq Diostari kay pacha kamachiqta churarqan? ¿Pitaq paytari teqsimuyuntinta qhawananpaq churarqan? 14Diosqa yuyaykukuspan lliw runamanta kawsayninta samaynintawan qechunman, 15paykunataq llapallan kuskapacha wañunkuman, wakmanta hallp'aq ñut'unman tukupunkuman. 16Yuyayniyoq kaspaqa uyariway, rimasqayta makilla uyariway. 17Chanin-kayta Dios cheqnikuspari, ¿kamachinmanchu? Qanri, ¿atiyniyoq chanin Diosta huchachawaqchu? 18Diosqa reykunatapas: Manan imapaqpas valenkichischu, ninmi, umalli kamachikuqkunatapas: Mana chaninkunan kankichis, ninmi. 19Paymi llapanta kamarqan, chaymi umalli runakunaman mana sayapakunchu, paypaqqa qhapaqpas wakchapas kaqkamallan. 20Runaqa huk ratomanta huk raton tutaq sonqollanpi wañurqapun, runaqa withapakushasqanpin chinkariykapun, munayniyoq runatapas mana kallpachakuspallan Diosqa ch'usaqyachin. 21Runaq purisqanqa Diospa qhawasqallanmi, llapan purisqanpas reqsisqallanmi. 22Imayna niraq laqhapas manan kanchu mana chanin ruwaqta pakaqqa. 23Diosqa ñan yachanña imaynachus runaq kawsaynin kasqanta, payqa manan runataraqchu tapun ima huchatapas yachananpaqqa. 24Chaymi mana tapuspalla munayniyoq runata chinkachin, hinaspan rantinpi hukta churan. 25Diosqa ima ruwasqakunatapas yachanmi, chayraykun tutaq sonqollanpi hap'irqospa ñit'irqapun. 26Millay runata hinan hasut'in, llapa runaq rikushasqan, 27payta mana kasuyta munasqanmanta, munayninman hina mana purisqanmantawan. 28Paykunaq sarunchasqanmi wakchakunaqa Diosman qaparirqan, Diostaq chay pisichikuqpa waqyakusqanta uyarirqan. 29Dios upallakuqtinri, ¿piñataq huchachanman? Uyanta pakaykukuqtinri, ¿piñataq rikunman? Paymi llaqtakunatapas runakunatapas kamachin, 30ama millay runakuna llaqtanta kamachinanpaq, ama millay runakuna llaqtanta q'otunanpaq. 31Huk runachus Diosta ninman: Huchallikusqanipunin, kunanmantaqa manañan ruwasaqchu. 32Rikuchiway mana rikusqay huchaykunata, mana allinta ruwarqani chayqa, amaña ruwasaqchu, nispa chayqa, allinmi. 33Chay hinaqa, Diospa yuyaykusqanta mana chaskishaqtiyki, ¿yuyaykusqaykiman hina Diosqa allinkaqta qosunkimanchu? Chaytaqa qanmi yuyaykukunayki, manan ñoqachu, chay hinaqa niway yachasqaykita. 34Uyariqniy yachaysapa runakuna, willawaychis, yuyayniyoq kaqpiwan niwaychis: 35Jobqa manan yachaywanchu rimashan, rimasqankunapas manan reparakunchu. 36Jobtaqa imanmanta imankama taripachunku, rimasqankunaqa sut'illan kashan, millay runakunaq hina. 37Jobqa huchan patamanpas mana kasukuytawanmi yapaykukun, ñoqanchiswanmi pukllakun, Dios contrataq imaymanata thawtin.

will be added

X\