1 Chayrayku, Job, rimasqayta uyariway, nisqaykunaman ninriykita k'iraykamuway. 2 Simiy patapiñan kutichinaypaq kashan. 3 Chanin-kay sonqowanmi rimarisaq, imatachus yuyaykusqaytan cheqaq-kaywan rimarisaq. 4 Diospa Espiritunmi ruwawarqan, Tukuy-atiyniyoqmi kawsayta qowarqan. 5 Atispaqa kutichimuway, wakichikuy churapakamunaykipaq. 6 Qanpas ñoqapas Diospa ñawpaqenpiqa kaqkaman kanchis, ñoqapas t'urumanta kamasqallan kani. 7 Chay hinaqa, manan imapas kanchu manchakuwanaykipaq, chaywanpas manan qantaqa ñit'iykusqaykichu. 8 Qan kikiykin niwarqanki, kay nisqaykitan uyarirqani: 9 Mana ima huchayoq ch'uyan kani, manan pantasqaypas huchaypas kanchu. 10 Ichaqa Diospunin yanqa tumpawan, awqanpas kayman hinan qhawariwan, 11 Chakiykunatan thunkuwan, purisqaytapas makillan qhawan, nispa. 12 Chay hina rimasqaykiqa manapunin chaninchu, Diosqa runakunamantaqa aswan hatunmi. 13 ¿Imanaqtinmi: Runaq rimasqanta mana kutichimunkichu, nispa, Diosta quejakunki? 14 Diosqa imaymana rikch'aypin rimapayawanchis, ñoqanchisqa manan reparanchischu. 15 Mayninpiqa tutan ruwan mosqoypi otaq rikhuriypipas, lliw runakuna puñurqapuqtinña, misk'i puñuypi kashaqtinkuña. 16 Diosqa runaman rimasqanta uyarichinmi, anyaspanmi lliwtaraq llaksan 17 millay ruwayninkumanta t'aqananpaq, uma hoqariq-kayman mana kutinankupaq. 18 Chay hinapin wañuymanta waqaychan, wañuy mayu chimpanatapas hark'an. 19 May kutinpiñataq Diosqa runata cheqanman churan onqoykunawan, tullunkunaman imaymana nanaykunata churaspa. 20 Chaymi mikhunakunata millakun, sumaq mikhunatawanpas cheqnikun. 21 Aychanpas lliwmi thantakapun tullunkunapas rikhurinankama. 22 Kawsayninpas aya p'ampana patallapiñan kashan, wañuypas punkullanpiñan kashan. 23 Diospa waranqa angelninmanta huk ángel hamuspa payman sayapakunman, chanin kasqanmantawan sut'inchaspa, 24 payta khuyapayaykuspataq Diosta ninman: Wañuymanta qespichiy, kacharisqa kananpaq pagota tariniñan, nispa chayqa, 25 chay hinapin aychanqa qholla wawaq hinaraq kanqa, waynaq hinaraq cuerponpas kapunqa. 26 Diosmantan mañakunqa, paypas uyarinqataq, kusikuywanmi Diosta uya-uyapura qhawarinqa, Diostaqmi wakmanta payta chaninta hina qhawarinqa. 27 Hinan runakunata ninqa: Ñoqaqa huchallikurqanipunin, chanin-kaykunatan q'ewirqani, chaytukuywanpas Diosqa manaraqmi muchuchiwanchu. 28 Aswanmi wañuymanta horqoykuwan, hinan k'anchaytapas rikuykuniraq, nispa. 29 Chay hinatan Diosqa runata ruwan, iskay kinsa kutita. 30 Wañuyman mana haykunanpaq, kawsashasparaq k'anchayta rikunanpaq. 31 Amigo Job, allintapuni uyariway, rimasqayta ch'inlla uyariway. 32 Imachus rimanayki kashan chayta kutichiway, niway, chanin kasqayki rikuchiytan munani. 33 Mana chaytaq, ch'inllaña uyariway, ñoqan allin yachaysapa kayta yachachisqayki.
